လံၚ်လုၚ်၊ အဝ်ဂတ် ၁၈
အပ္ဍဲကဵုရးတၞၚ်သဳ ပွိုၚ်ဍုၚ်လံၚ်လုၚ် ကရောၚ်ပၞာန်ဗမာဂေတ်ထပက်မံၚ်ပၞာန်ဂှ် ဟိုတ်နူဇွောံမပိုတ်အာတုဲ ဇွောံမစၞစညးဒေသတံ နွံမံၚ်အပ္ဍဲကွာန်တံဂှ် လုပ်ပၠံၚ်ကေတ်ဏာအတေၚ်အဓမ္မရောၚ် ရိုဟ်ကၞက်ပရိုၚ်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲဂိတုအဝ်ဂတ် ၁၆ အခိၚ်ဒေါဝ်တ္ၚဲ လောန်ကၠုၚ်ဏံ ကရောၚ်ပၞာန်ဗမာလုပ်စိုပ်ကၠုၚ်ဗွဲခဏ ပ္ဍဲကွာန်ဂအ်အေန် ပွိုၚ်ဍုၚ်လံၚ်လုၚ်တုဲ လုပ်ပၠံၚ်ကေတ်ဏာ ကပေါတ်ဇွောံမစၞစ သ္ၚု၊ ကၠေၚ်၊ ၜဵု၊ ကသိုန်တံ ဗွဲအတေၚ်အဓမ္မတံရောၚ်။
ကရောၚ်ပၞာန်ဂှ်တှ်ေ စနူဂိတုဂျောန်တေံတုဲ ပ္ဍဲကွာန်နွံဗ္ဒာဲဗ္ဒာဲ ဍုၚ်လံၚ်လုၚ်တံဂှ် ဂေတ်တတ်အာလဝ် မွဲကွာန်တုဲမွဲကွာန် ထပက်ကရောၚ်ပၞာန် ဒးမံၚ်ဒၟံၚ်ပ္ဍဲဂြိုပ် ဟိုတ်နူဇွောံမစၞစပိုတ်အာဂှ်ရ ဒးလုပ်ပၠံၚ်ကေတ်ဏာ ဗီုဏံရောၚ် သ္ဂးရ။
ဒပ်ပၞာန်သီအဝဵုတံပန်သေနာတ်တုဲ လုပ်ကၠုၚ်အပ္ဍဲကွာန်ဂှ်ရ ညးဒေသဗွဲမဂၠိုၚ် ဒးဂြိပ်ပါဲဒဴအာအိုတ်တုဲ ကောန်ပၞာန်တံ ပၠံၚ်ကေတ်ဏာဇွောံမစၞစ နွံပ္ဍဲသ္ၚိတံ ဗွဲမပြဟ်တုဲ ကလေၚ်ဂြိပ်လုပ်အာ ပ္ဍဲဂြိုပ်တေံပၠန်ရောၚ် ညးဒေသမၞိဟ်တြုံမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
တုဲပၠန် အခိၚ်ကရောၚ်ပၞာန်လုပ်ကၠုၚ်အပ္ဍဲကွာန်ဂှ် ဆဵုညာတ်အာကောန်ကွာန် ၂ တၠ ပ္ဍဲဂၠံၚ်တုဲ ရပ်ဏာလေဝ်နွံမံၚ်ရောၚ် သ္ဂးရ။
ပြဟ်ဟ်ဏံ ကရောၚ်ပၞာန်တံဂှ် နွံမံၚ်ပ္ဍဲဂြိုပ် ဗ္ဒာဲဍုၚ်လံၚ်လုၚ်တုဲချဳဒရာၚ်အာကၠုၚ်မံၚ်တှ်ေ ညးဒေသလ္ၚဵုတံကလေၚ်မံၚ်စံၚ် စိုပ်မံၚ်ပ္ဍဲသ္ၚိနွံကီုလေဝ် ဒးမၚ်ရံၚ်အာအကာဲအရာကရောၚ်ပၞာန်တုဲမှ ဂံၚ်ချဳဒရာၚ်အာကၠုၚ်မံၚ်ရောၚ် ဂွံတီရ။
ပရိုၚ် – သြၚ်လောန်တိုၚ်မ်
Photo – Social Media