မတ်မလီု၊ သိပ်တေမ်ပါ ၄
အပ္ဍဲကဵုဒၞာဲဗ္ဒိုပ်ထိၚ်ဒဝ် လဝက ရးနိဂီုမလေယှာတံဂှ် စၟဳစၟတ်သ္ပလဝ်ဒတန်တုဲတုဲ သွက်သ္ဂောံကလေၚ်ကော်ဖျဴနၚ် ဍုၚ်မိတိမဇကု ကောန်ဍုၚ်ဗၟာဒးဒုၚ်ရပ်ထိၚ်ဒဝ်လဝ် ၁,၄၇၆ တၠတံမာန်ဂှ် အကြာအလဵုအသဳ သီုၜါလပါ် ကၠောန်မံၚ်ပရေၚ်ညဳပ္ညပ်ရဂှ် နူဌာနဝန်ဇၞော် ပရေၚ်ဍုၚ်သအာၚ် သၟဝ်အလဵုအသဳပၞာန်ပြံၚ်လဝ်ဗီုပြၚ် လလောၚ်တြးလဝ် ပရိုၚ်ရ။
အပ္ဍဲရးနိဂီုမလေယှာမ္ဂး ဟိုတ်နူပွမ ပရေၚ်မံၚ်စံၚ်ဟွံလုပ်သၞောဝ်တံကီု ပွမပရေၚ်ဖံက်ပကဝ်လဝ် သၞောဝ်ဥပဒေ လဝကနာနာသာ်တံ နွံတုဲ ကောန်ဍုၚ်ဗၟာတံဏံ ကြဴနူဒုၚ်လဝ်ဘဲဒုဟ်တုဲဂှ် ဒးဒုၚ်ဆက်ရပ်ထိၚ်ဒဝ်လဝ် ပ္ဍဲဗ္ဒိုပ်ထိၚ်ဒဝ်တံရောၚ် အပ္ဍဲကဵုလိက်လလောၚ်တြး ထမံက်ထ္ၜးလဝ်ရ။
နူတမ်မူလဂှ်တှ်ေ ပ္ဍဲအဝ်ဂတ် ၂၇ -၂၈ တေံ သွက်သ္ဂောံကော်ဖျဴနၚ် နကဵုၜၚ်ပၞာန် ဖန်ဇန်လဝ်ကီုလေဝ် ပ္ဍဲကဵုတ္ၚဲတံဏံဂှ် သွက်သ္ဂောံကော်ဖျဴဏာ ဟွံပြေပြံၚ်ဏီပုဟ် နူလပါ်မလေယှာတံ ကလေၚ်ဟီုကၠုၚ်လဝ်ရောၚ် သ္ဂးရ။
ဟိုတ်ဂှ်ရ အတိုၚ်ဂလာန် နူလပါ်မလေယှာတံ အာတ်မိက်လဝ် ပ္ဍဲသိပ်တေမ်ပါ ၂၈- ၂၉ တံဂှ် သွက်သ္ဂောံကလေၚ်ကော်ဖျဴနၚ်မာန် ကလေၚ်ဖန်ဇန်လဝ် လၟေၚ်တရဴဂှ်ရောၚ် ဂွံတီရ။
ဆဂး လတူအစဳဇန်ကလေၚ်ပလံၚ်ဖျဴဏံဂှ် ပရေၚ်ဒှ်ဒဝိၚ် နူကဵုလပါ်ဂၠးကဝ်တံလေဝ် မံက်တိတ်ကၠုၚ်မံၚ်ရ။
ရုၚ်သၟိၚ်မဟာ သၟဝ်ကုလသမဂ္ဂ ဆေၚ်စပ်ကဵုပရေၚ်တၠဒဒိုက် UNHCR ဂှ်တှ်ေ ပ္ဍဲအစဳဇန် ကလေၚ်ပလံၚ်ဖျဴဗီုဗီုဏံဂှ် နကဵုညးတံလေဝ် ညိဟွံပါလုပ်ပုဟ် ဟီုလဴလဝ်ရ။
ဂကောံအခေါၚ်အရာမၞိဟ် Human Rights Watch ကေုာံ Fortify Rights တံလေဝ် ပ္ဍဲပရေၚ်စီရေၚ်ဖန်ဖက် ပရေၚ်အုပ်ဓုပ်ညးတၠဒဒိုက် ရးနိဂီုမလေယှာ ကေုာံ အစဳဇန်ပလံၚ်ဖျဴနၚ်ကဵု ဍုၚ်ဗၟာတံဂှ်တှ်ေ အကာဲအရာမၞိဟ်မွဲတၠတုဲမွဲတၠ စၟဳစၟတ်ညံၚ်သ္ဂောံချိုတ်ပၠိုတ်တုဲ အခေါၚ်အရာညးတၠဒဒိုက်တံ ညံၚ်ဟွံဂွံလီုလာ် ဒှ်ပရေၚ်ဇီုကပိုက်တံဂှ် ဒှ်အရာပၟိက်ဇၞော်ကွေံကွေံရောၚ် ထမံက်ထ္ၜးလဝ် ပရေၚ်ဒှ်ဒဝိၚ်အိုတ်ရ။
အစဳဇန် ကလေၚ်ပလံၚ်ဖျဴအာဗီုဏံဂှ် ဒှ်ပရေၚ်ကလေၚ်စဴ နကဵုဆန္ဒညးတံကေတ်တ်တုဲ ယဝ်ရကလေၚ်စဴအာတုဲ ဘဲအန္တရာဲလမျီုနွံမာန်ရောၚ် ယဝ်ရဆဵုညာတ်မ္ဂး ဟွံကလေၚ်ပလံၚ်ဖျဴပုဟ် အခိၚ်ကၠာတေံ နူလပါ်အလဵုအသဳမလေယှာ ဟီုလဝ်နွံရ။
ပရိုၚ် – သြၚ်လောန်တိုၚ်မ်
Photo – Social Media