မတ်မလီု၊ သိပ်တေမ်ပါ၇
အပ္ဍဲတွဵုရးမန် ဍုၚ်မတ်မလီု ကောန်ပၞာန်ဒပ်စဵုဒၞာညးဍုၚ်ကွာန် PDF ၁၇ တၠ လုပ်ဖျေံလဝ်လွဟ် ဇရေၚ်ဌာန်ဂအုပ်ပၞာန် ရးအဂၞဴရဂှ် လိက်ပရိုၚ်တြးဝါဒဒပ်ပၞာန် ပတိတ်လဝ်တံ ချူထမံက်ထ္ၜးလဝ်ရ။
အပ္ဍဲရဲဖျေံလွဟ်တံဂှ် ကောန်ပၞာန် PDF ညးတြုံ ၁၆ တၠ ညးဗြဴ ၁ တၠ တံပါလုပ်တုဲ၊ သီုကဵုလွဟ်မကမ်နာနာတံ လုပ်စိုပ်ကၠုၚ် အပ္ဍဲဗွိုၚ်သၞောဝ်ဥပဒေ သ္ဂးရ။
ရဲလုပ်ဖျေံလွဟ်တံဂှ် ကေတ်နၚ်သီုသေနာတ် ၉ ဇကိုအ်ကဵုကပေါတ်ဆက်စပ်လ္ၚဵုတံနွံတုဲ ဖျေံဏာကဵုလာပ် သြန် ၂၇၃ ကိုတ်ဒကေဝ်ကေုာံ သြန်လာပ်သကာလ္ၚဵုလ္ၚဵုတံ ဖျေံလဝ်ကီုရောၚ် ထမံက်ထ္ၜးလဝ်ရ။
ရဲဖျေံလွဟ်တံဂှ်တှ်ေ ကဵုထပက်စၟတ်တဲ ပရေၚ်ဒုၚ်ဝန်ကတိတံတုဲ ပအပ်ဗ္စိုပ်ကဵုဏာ ဇရေၚ်မိမညးမၚ်မွဲပကၚ်ရၚ်တံ နကဵုဗီုပြၚ်သၞောတ်စှ်ေစှ်ေ သ္ဂးရ။
ရဲလုပ်ဖျေံလွဟ်တံဏံမ္ဂး နူရးလ္ဂုၚ် ၆ တၠ၊ နူရးဗဂေါဝ် ၃ တၠ တွဵုရးကရေၚ် ၃ တၠ၊ နူကဵုတွဵုရးမန်ဂှ် ၂ တၠ၊ တွဵုရးသေံ၊ ရးဧရာဝတဳကဵု ရးတၞၚ်သဳ မွဲမွဲတၠတံ ပါလုပ်မံၚ်ဂှ် ထမံက်ထ္ၜးလဝ်ရ။
ပ္ဍဲအကြာတ္ရဲတံဏံ ရဲ PDF လုပ်ဖျေံလွဟ် ပ္ဍဲဒပ်ပၞာန်ဗမာ ဟၟဲပုဟ်၊ အကာဲအရာလၟုဟ်ဏံဂှ် ဒှ်ဆ ပရေၚ်တြးဝေၚ်ဝါဒ သက်သက်ရောၚ် ညးတာလျိုၚ် ဂကောံဇြဟတ်ပၠန်ဂတး ဖျေံသ္ဇိုၚ်ဒေသမန်တံ ကလေၚ်ခၠေဝ်လဝ်ရ။
ပရေၚ်တြးဝါဒ ဟီုမံၚ် PDF တံ လုပ်ဖျေံလွဟ်တံဏံဂှ် ဒှ်အစဳဇန် အခိုက်အလိုက်ဌာန်ဂအုပ်ပၞာန်တံ မဒးကၠောန်အာ လၟေၚ်ဂိတုရောၚ်ဂှ် နူပွဳဗွိုၚ် CDM တံ ဟီုလဝ်ရ။
ပရိုၚ် – သြၚ်လောန်တိုၚ်မ်
Photo – MOI