ဇြပ်ဗု၊ သိပ်တေမ်ပါ၇
အပ္ဍဲတွဵုရးမန် ပွိုၚ်ဍုၚ်ဇြပ်ဗု ဗြဴကဵုတြုံၜါတၠ နွံမံၚ်ပ္ဍဲကွာန်ဝၚ်ရာဲ ကၠောန်မံၚ်ကမၠောန်ခွာတ်ရာဘာဂှ် ဒပ်ပၞာန်သီအဝဵုတံစောဲစပ်စုတ်ဒုဟ် ရဲကဵုပရိုၚ် PDF ဂးတုဲ ကၠုၚ်ရပ်ဏာလဝ်ရဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
အပ္ဍဲဂိတုသိပ်တေမ်ပါ ၄ ဂှ် ဒပ်ပၞာန်သီအဝဵု ဇြဟတ်ၜိုတ် ၃၀ တံကၠုၚ်ရပ်ဏာ ရဲကၠောန်မံၚ်ကမၠောန် ခွာတ်ရာဘာ ကိုအံၚ်မျအ်မိုရ်ထက် အာယုက် ၃၁ သၞာံကေုာံ သမ္ဘာညး ဒဝ်ဖျုဖျူအံၚ် ဒၞာဲကၠအ်ရာဘာညးတံမံၚ်စံၚ်ဒၟံၚ်ဂှ် မဒှ်ရ။
ဗြဴကဵုတြုံၜါတၠဏံဝွံ ပရေၚ်ဂကောံပၠန်ဂတးတံ ချဳဒရာၚ်အာကၠုၚ်မံၚ်ဂှ်တီဒၟံၚ်ကီုလေဝ် ဟွံကဵုပရိုၚ်တုဲ ပရေၚ်ကရောၚ်ပၞာန်တံ ချဳဒရာၚ်ဂှ်တှ်ေ ပလံၚ်ကဵုပရိုၚ် PDF တံဂးတုဲ ထ္ၜးဟိုတ် သာ်ဂှ်တုဲ နူလပါ်ဒပ်ပၞာန် ကၠုၚ်ရပ်ဏာရ။
အတိုၚ်ညးဒေသတံ ဟီုလဴမ္ဂး ကွာန်ဝၚ်ရာဲဝွံ ဒှ်ဒေသဂကောံရပ်လွဟ်စုၚ် ချဳဒရာၚ်မံၚ်တုဲ၊ ပရေၚ်ရပ်စပ်ဏံဂှ်တှ်ေ ဟိုတ်နူရဲပလံၚ်ပရိုၚ် ဒပ်ပၞာန် (ဒလန်)တံ ဒှ်မာန်ရောၚ် သ္ဂးရ။
ဒပ်ပၞာန်ရပ်ဏာလဝ် ဗြဴကဵုတြုံၜါတၠဏံဂှ်တှ်ေ ပံက်လဝ်အမှု နကဵုသၞောဝ်ဗတိုက်ပလီုပရေၚ်ပကီုပရာတ် ၝောံပိုဒ် ၅၂ (က) ပ္ဍဲဗ္ဒိုပ်ဗၠာဲသၟိၚ် ၝောံဍုၚ်ဇြပ်ဗုရဂှ် ဂၠိုက်ဂၠာဲသၟာန်သၟုက်တုဲ ဂွံတီလဝ်ရ။
အပ္ဍဲတွဵုရးမန်မ္ဂး ညးဆက်စပ်မံၚ်ကဵု ဒပ်စဵုဒၞာညးဍုၚ်ကွာန် PDF တံကီု၊ ညးလုပ်ချူ Comment သၟဝ်အကံက် Facebook ဂကောံပၠန်ဂတးတံ ညးကဵုလဝ်ဗီုဂြိုဟ်တံဂှ်ကီု အလဵုအသဳပၞာန် ပြံၚ်လဝ်ဗီုပြၚ်တံ မၚ်ရံၚ်လ္ၚတ်တုဲ ဗက်ရပ်ကေတ်မံၚ်ဆက်က်ရောၚ်။
အပ္ဍဲသတ္တဟဒုတိယ ဂိတုအဝ်ဂတ်လောန်ကၠုၚ်တေံလေဝ် ညးလုပ်ချူ Comment ပ္ဍဲအကံက် Facebook ပရေၚ်မှာဇန် ဂကောံလကိုဟ်ရေဝ် ကောန်ကွာန်ဗလံက်ညံၚ်ဝိုၚ် ပွိုၚ်ဍုၚ်မုဟ်ဍုၚ် မွဲတၠ ဒးဒုၚ်ဖျေံလဝ်အမိၚ်ထံၚ် ၇ သၞာံနွံရ။
ပရိုၚ် – သြၚ်လောန်တိုၚ်မ်
Photo – Social Media