နေပျဳဒဝ် ၊ သိပ်တေမ်ပါ ၉
သွက်ဘာတန်ဗ္တောန်ယိုက်ဝန်ပၞာန် ညးဍုၚ်ကွာန် ညံၚ်ဂွံထပေၚ်ကဵုလၟိဟ်ကောန်ပၞာန်မာန် ပရေၚ်ရပ်ပဝ်တာ ဂၠိုၚ်တိုန်မံၚ်ဏံ PDF တံ သီုကဵုလွဟ်မကမ်လုပ်စိုပ်ကၠုၚ်မံၚ် အပ္ဍဲဗွိုၚ်ဥပဒေရဂှ် အလဵုအသဳပၞာန်ဆက်တုဲ တြးမံၚ်ဝါဒရ။
အပ္ဍဲကိုန်အစဳဇန်ပွိုၚ် ၁၀၀ တ္ၚဲ အလဵုအသဳပၞာန်ကော်ဘိက်လဝ် PDF တံ ဂွံကၠုၚ်ဖျေံလွဟ်တုဲ ကြဴနူဂှ် ညးကၠိုဟ်ခၠၚ်ညာတ်ကၠုၚ် လတူပရေၚ်ကမၠောန်ၜိုဟ်လလမ် ရးနိဂီုဍုၚ်ဒပ်ပၞာန်တံတုဲ ကောန်ဒပ် PDF လၟိဟ်ကဵုကၠံတံ လုပ်ဖျေံလဝ်လွဟ်ဂှ် အပ္ဍဲလိက်ပရိုၚ်တြးဝါဒအလဵုအသဳတံ လလောၚ်တြးဒၟံၚ် မွဲဏှမွဲဏှရ။
အကြာ နူကၞောတ်ဂိတုအဝ်ဂတ်တေံ စိုပ်သတ္တဟပထမ ဂိတုသိပ်တေမ်ပါဏံ ဒၞာဲဌာန်ဂအုပ်ပၞာန်ရးအဂၞဴကီု ဌာန်ဂအုပ်ပၞာန် ရးဗာယပ်ကီု ဌာန်ဂအုပ်ပၞာန်ရးလဒေါဝ်တံကီုဂှ် ကောန်ဒပ် PDF တံ ၃၂၂ တၠပြၚ် သီုကဵုလွဟ်မကမ် လုပ်ကၠုၚ်မံၚ်အပ္ဍဲဗွိုၚ်ဥပဒေရဂှ် နူအလဵုအသဳပၞာန် သ္ဂးရ။
ရဲ PDF တံဗွဲမဂၠိုၚ် လုပ်ဖျေံလွဟ်ဂှ်တှ်ေ ဒှ်ရဲဒးဒုၚ်ပကောံလဝ် အတေၚ်အဓမ္မတံမဒှ်တုဲ ဟွံစှ်ေစိုတ်ကဵု ပရေၚ်ပကီုပရာတ် ဒုၚ်တဲဟွံမာန်ကီု အပ္ဍဲဂကောံဂှ်လေဝ်ပါ်ခြာမံၚ်အဆံၚ်နွံတုဲ ဇကုကဵုဇကု ပၠံၚ်ဗိုလ် ဍဵုဍိုက်၊ ဂစိုတ်ထောံ ပလီုပလာ်ကောန်သမ္ဘာ ညးတၞဟ် နကဵုတၚ်စောစပ်တံဏံ ပလီုမံၚ်ရုပ်ရဴဂကောံပၠန်ဂတးတံရ။
တုဲပၠန် ဟိုတ်နူဒုၚ်ခဳဗတိုက် ပရေၚ်ဒပ်ပၞာန်ထပက်ပၞာန်ဟွံမာန်တုဲ စိုတ်ဓါတ်စှ်ေမံၚ်သၟးဟွံက ဟိုတ်နူမိက်ဂွံမံၚ်စံၚ်အာ ၜိုဟ်ဟ်သြိုဟ်ဟ်ကီု ထောံကၠေံဂၠံၚ်တရဴရပ်လွဟ်တုဲ ကလေၚ်လုပ်ကၠုၚ် အပ္ဍဲဗွိုၚ်ဥပဒေရဂှ် နူကဵုအလဵုအသဳပၞာန်တြးမံၚ်ဝါဒ မဒှ်ရ။
လတူပရေၚ်တြးမံၚ်ဝါဒ တၚ်စောစပ်ဗီုဗီုတံဏံဂှ်တုဲ သွက်သ္ဂောံဂွံ ပရေၚ်ခၠေဝ်သှ် နူကဵုညးတာလျိုၚ် ဂကောံပၠန်ဂတးတံမာန်ဂှ် နူကဵုဌာန်ပရိုၚ်သြၚ်လောန်တိုၚ်မ် ဆက်စၠောံသၟာန်အာလဝ် ညးတာလျိုၚ်ဂကောံ PDF လ္ၚဵု ဖျေံလဝ်သ္ဇိုၚ် ဒေသသၠုၚ်ကျာ တံကီုလေဝ် ဟွံကလေၚ်ကဵုနၚ်ပရိုၚ်ပုဟ်။
နူကဵုအလဵုအသဳပၞာန်ဂှ်တှ်ေ လ္တူညးလုပ်ဖျေံလွဟ်တံ မွဲတၠမ္ဂး ကဵုမံၚ်သြန် ၅ လက်ဒကေဝ် စဵုကဵု ၁ ကိုတ်နွံတုဲ ညးကေတ်နၚ်သီုကဵုလွဟ်မကမ်တံဂှ်လေဝ် ဇိုန်ဏှၚ်ကဵုသြန်လာပ် ကဵုထပက်စၟတ်တဲပရေၚ်ဒုၚ်ဝန်စဝ်တုဲ ပအပ်ဗ္စိုပ်ကဵုဇရေၚ်မိမ ညးမၚ်မွဲပကၚ်ရင်တံရောၚ် သ္ဂးရ။
မွဲလပါ်ပၠန် လ္တူဍုၚ်ဇၞော်ဇၞော် လ္ဂုၚ်၊ မာန္တလေဝ်၊ အပ္ဍဲရး၊ တွဵုရး အလဵုအသဳပၞာန်ထိၚ်ဒဝ်လဝ်တံဂှ်မ္ဂး အခိၚ်တ္ၚဲဗ္တံဟွံဟီု သွက်သ္ဂောံဂွံသၟတ်အဝဲယိုက်ဝန်ပၞာန်တံတုဲ နူကဵုဒပ်ပၞာန်၊ ဗၠာဲသၟိၚ်ကေုာံ ဂကောံဒပ်မၚ်ကွာန်တံ ဗက်ဂၠာဲရပ်မံၚ်ပဝ်တာ အဆက်က်ရ။
တုဲပၠန် ပ္ဍဲကဵုပေါဲဗတိုက်မုက်ပၞာန်ဗလးတိ ဒးဆဵုဂဗမံၚ်ကဵု ဂကောံပၠန်ဂတးရပ်လွဟ်ကောန်ဍုၚ်အရၚ်တံမ္ဂး ကောန်ပၞာန် ရဲနူလပါ်ဒပ်ပၞာန်သီအဝဵုတံဗွဲမဂၠိုၚ် ဒုၚ်ပယျလဝ်နွံမံၚ်ကီု၊ လပါ်မုက်ပၞာန် ရခေၚ်ဂှ်လေဝ် အကာဲအရာဟွံခိုဟ် ဒှ်မံၚ်ကီုရ။
အပ္ဍဲအကာဲအရာဏံမ္ဂး နကဵုပရေၚ်ပၞာန် လပါ်ဒပ်ပၞာန်သီအဝဵုဂှ်တှ်ေ သွက်ဂွံကေတ်ဇၞးပိုတ်တ်ဂှ် ဒှ်ဟွံမာန်တုဲ စကာသုၚ်စောဲကၠုၚ် ဗျူဟာပါ်ဒကးဆီ လ္တူ PDF စိုတ်ဓါတ်ဟွံခိုၚ်တံရောၚ် နူကဵုပွဳဗွိုၚ် CDM တံ သ္ၚဳဂၠိပ်လဝ်ရ။
ဟိုတ်နူပရေၚ်ယိုက်ဝန်ပၞာန်တုဲ ဇြဟတ်ဒပ်ပၞာန်သာတိုန်ကၠုၚ်တုဲ ညံၚ်ရဴဂွံမံၚ်ဇၞး လ္တူဂကောံပၠန်ဂတးတံယံၚ်ၚ် ပရေၚ်တြးဝါဒဏံ အခိၚ်ၜၚ်ပၞာန်တံတိုန်စိုပ်မံၚ်ဗာန်မဝ်ဂှ် ပကိတ်အခိၚ်တုဲကၠောန်ကၠုၚ်လဝ်ရောၚ် အကြာပ်ဇၞော်ဒပ်ပၞာန်ကျာ CDM ဇေယျ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“လၟုဟ်ဏံ ဒပ်ပၞာန်ဟိုတ်နူကော်ဂွံ ပရေၚ်ယိုက်ဝန်ပၞာန်တုဲ ဇြဟတ်မၞိဟ်ဍေံတံတှ်ေ ခိုဟ်ကၠုၚ်ဗွဲမလောန်။ ဇြဟတ်လွဟ်တှ်ေ စနူတမ်တေံရ သၠုၚ်မံၚ်တုဲတုဲ။ ပ္ဍဲအကာဲအရာဗီုဏံမ္ဂး လတူပၠန်ဂတးဂှ် ညံၚ်ရဴဂွံမံၚ်ဇၞးယံၚ်ၚ် လပါ်ဍေံတံလေဝ် တြးမံၚ်ဝါဒရ။ ဗီုပြၚ် ဍိုက်ကၠုၚ်ကဵုဇြဟတ်ဗီုဏံ။ တၚ်မွဲပၠန်ဂှ် အခိၚ်လၟုဟ် ပေါဲလုပ်ဖျေံလွဟ်တံ ကၠောန်လဝ်ဂှ်တှ်ေ ဒၞာဲလဵု အာကိတ်ညဳရောတှ်ေ ၜၚ်ပၞာန်တံတိုန်အာ နူဍုၚ်ယှိုဲကူ အာဍုၚ်ဗာန်မဝ်ဂှ် နူကဵု KIA မာတ်ဆိုအ်ဗတိုက်တုဲ ပရေၚ်ဖျေံလွဟ်တံ၊ ပွမချိုတ်တံ၊ သီုကဵုၜၚ်ပၞာန် ၇ မ လီုလာ်အာဂှ်တှ်ေ၊ ကရောံပရိုၚ်လီုလာ်သရိုဟ်မံၚ်တံဂှ်ရ ဍေံတံပကိတ်အခိၚ်တုဲ ကၠောန်ကၠုၚ်ပရေၚ်ဏံ ဒှ်ဏောၚ်” သာ်ဝွံ သ္ဂးရ။
ပ္ဍဲဂိတုသိပ်တေမ်ပါ ၂ တေံ နူကဵုဍုၚ်ယှိုဲကူ အတိုၚ်ဂၠံၚ်ၜဳဧရာဝတဳ ၜၚ်ပၞာန်တိုန်အာဍုၚ်ဗာန်မဝ်တံဂှ် ဒပ်ပံၚ်တောဲ KIA တံဗတိုက်လဝ်တုဲ ပရေၚ်လီုလာ်လ္ၚဵုနွံ ကောန်ပၞာန် ၁၀၀ တၠပြၚ်တံ ဒးဒုၚ်ရပ်နကဵုဂၠုဲပၞာန်ရဂှ် ဂွံတီကေတ် နူကဵုပရိုၚ်အပ္ဍဲဒေသတံရ။
အပ္ဍဲကဵုပေါဲဗတိုက် မုက်ပၞာန်ဗလးတိတေံ ဇၟာပ်ပ်ပေါဲဗတိုက်ဒှ်ကဵု ဂကောံပၠန်ဂတးရပ်လွဟ် ကောန်ဍုၚ်အရၚ်တံတုဲ အခိၚ်ကျဆောံလေၚ်ကၠုၚ်မ္ဂး နူကဵုဒပ်ပၞာန်သီအဝဵုဂှ်တှ်ေ ကဵုပရန်ကဵု PDF ပါလုပ်လဝ်ပ္ဍဲပရေၚ်ပၠန်ဂတးတံတုဲ ပတိတ်သုၚ်စောဲမံၚ် နကဵုဗျူဟာ ပါ်ဒကးဆီလၟိုန်ရ။
လၟုဟ်လေဝ် လ္တူရဲညးမိက်ကလေၚ်လုပ်စိုပ် အပ္ဍဲဗွိုၚ်ဥပဒေတံမ္ဂး ကေတ်အဆက်ပလံၚ်ပရိုၚ်ကဵု ဂကောံပရေၚ်အုပ်ဓုပ် ခရိုၚ်၊ ပွိုၚ်ဍုၚ်၊ ဒပ်ပၞာန်၊ ဗ္ဒိုပ်ဗၠာဲသၟိၚ်တံမာန်တုဲ ဒုၚ်တၠုၚ်ဖျေံကဵုသြန်လာပ်တံရောၚ် တြးမံၚ်ဝါဒရ။
စပ်ကဵုပရေၚ်ဏံတုဲ ပ္ဍဲဂိတုသိပ်တေမ်ပါ ၇ ဒၞာဲဌာန်ဂအုပ်ပၞာန်ရးလဒေါဝ် ရးမာန္တလေဝ်ဂှ်တှ်ေ ကောန်ဂကောံ PDF ညးတြုံညးဗြဴ ၁၉၅ တၠတံ သီုကဵုလွဟ်မကမ် ထပ်လုပ်ကၠုၚ်ဖျေံလဝ်လွဟ်ရဂှ် အလဵုအသဳပၞာန် လလောၚ်တြး ပတိတ်လဝ်ပရိုၚ် ရ။
ဗီုဂှ်ကီု ဂိတုသိပ်တေမ်ပါ ၅ ဂှ် ဌာန်ဂအုပ်ပၞာန်ရးအဂၞဴ ဍုၚ်မတ်မလီုဂှ် ကောန်ဒပ် PDF ၁၇ တၠ သီုကဵုလွဟ်မကမ်တံ လုပ်ဖျေံလဝ်လွဟ်ရဂှ် ပ္ဍဲလိက်ပရိုၚ်တြးဝါဒ ထမံက်ထ္ၜးလဝ်ရောၚ်။
တုဲပၠန် ဂိတုအဝ်ဂတ် ၂၈ လောန်ကၠုၚ်တေံလေဝ် ပ္ဍဲဌာန်ဂအုပ်ပၞာန်ရးဗာယပ် ရးသကိုၚ်တေံဂှ် ညးတြုံညးဗြဴ ၁၄၀ တၠ သီုကဵုလွဟ်မကမ် ထပ်လုပ်ဖျေံလဝ်လွဟ်တုဲ သၠောဲပအပ်ကဵုလဝ်မိမတံ နကဵုဗီုပြၚ်သၞောတ်စှ်ေစှ်ေရောၚ် သ္ဂးရ။
ညးလုပ်ဖျေံလွဟ် ပ္ဍဲဒပ်ပၞာန်တံဏံဂှ်တှ်ေ ကောန်ဂကောံ PDF ဟွံသေၚ်ပုဟ် ညးတာလျိုၚ်ဂကောံပၠန်ဂတးတံ ဟီုလဝ်နွံတုဲ သ္ဂံၚ်ပၞာန် အဆက်ပိုတ်မံၚ်ကဵုဒပ်တံဂှ်တှ်ေ ညံၚ်ဂွံကလေၚ်ဆက်စၠောံပလံၚ်ပရိုၚ် ကုညးတာလျိုၚ် တမ်ဒပ်တံဂှ်လေဝ် ကဵုလဝ်သမ္တီနွံမံၚ်ရောၚ်။
ပရိုၚ် – သြၚ်လောန်တိုၚ်မ်
Photo – MOI