မတ်မလီု၊ သိပ်တေမ်ပါ ၉
ကောံဓရီု စၠတ်ထဝ်တွဵုရးမန် အလန်တတိယ လၟေၚ်ဍာံ စတုတ္ထဝါ သၟဝ်အလဵုအသဳပၞာန်ပြံၚ်လဝ်ဗီုပြၚ်ဂှ် ပ္ဍဲဂိတုသိပ်တေမ်ပါ ၂၉ ဂတဏံ စကၠောန်ဗဒှ်အာရောၚ်ဂှ် နူစၠတ်ထဝ်တွဵုရးမန် လလောၚ်တြးလဝ်ရ။
သွက်သ္ဂောံကလေၚ်စ ကောံဓရီုစၠတ်ထဝ်ဂှ် ညးစၞးစၠတ်ထဝ်တံကီု သီုဂကောံအလဵုအသဳတွဵုရးတံလေဝ် ဒဒှ်ရကဵုလဝ်သမ္တီတုဲ ပ္ဍဲစၟတ်တ္ၚဲ သိပ်တေမ်ပါ ၇ ဂှ် လလောၚ်တြးလဝ်ရ။
အပ္ဍဲပေါဲကောံဓရီုစၠတ်ထဝ်ဂတဏံမ္ဂး အကြာလတူဍုၚ်တံပရေၚ်ဂီုကၠီုဟၟဲမံၚ်ဂှ်ကီု၊ ဟိုတ်နူပရေၚ်ရပ်ကပေါတ် ဗၞိက်သေံတုဲ ၚုဟ်မးကပေါတ်တံသၠုၚ်တိုန်အာ၊ ပရူဂၠံၚ်လီုလာ်မံၚ်ဇၞော်ကဵုဇြဟတ်တံဂှ် ညးဒေသတံ နွံမံၚ်ပၟိက်မိက်ဂွံကဵုသၟာန်အာ တၚ်သၟာန်တံရောၚ် သ္ဂးရ။
တုဲပၠန် ကိုန်အစဳဇန်အလဵုအသဳ သွက်သ္ဂောံထမံက်အာရုပ်ရဴပရေၚ်ကိုန်အစဳဇန် ကၠောန်မံၚ်ပြဟ်ဟ်လၟုဟ်ဏံကီု ပါဲနူဂှ်တုဲ ဟိုတ်နူကိစ္စသၟတ်တံယိုက်ဝန်ပၞာန်တုဲ ပရေၚ်ဂီုကၠီုဟၟဲဒှ်မံၚ်တံဂှ် ညံၚ်သ္ဂောံသၟာန်ကဵု တၚ်သၟာန်တံဂှ်လေဝ် အာတ်မိက်လဝ်အိုတ်ရ။
ကောံဓရီုလၟေၚ်ဍာံ အလန်တတိယ စၠတ်ထဝ်တွဵုရးမန်ဂှ် ပ္ဍဲအဝ်ဂတ် ၁၀ စဵုကဵုစိုပ် ၁၃ တေံ ကၠောန်ဗဒှ်လဝ်တုဲ၊ ပ္ဍဲပေါဲကောံဓရီု သၟာန်လဝ်တၚ်သၟာန် ဍောၚ်သၞံၚ် ၃၀ နွံတုဲ ဒက်ပ္တန်ကၠုၚ်လဝ် ကမ္မတဳမွဲရ။
အပ္ဍဲပေါဲကောံဓရီုလောန်ကၠုၚ်တေံဂှ် စပ်ကဵုပရေၚ်ဒက်ပ္တန်လဝ် ကမ္မတဳကဵုကသပ်အထံက်အပၚ် ကမ္မတဳပရေၚ်ကေၚ်ကာစၠတ်ထဝ် တွဵုရးမန် ခရိုနဳမတ်မလီု ဥူမဵုကျဝ် ပါလုပ်လဝ်ဂှ်တှ်ေ ပရေၚ်ပါ်ပါဲ အကြာညးဍုၚ်ကွာန်ဒေသတံ သၠုၚ်တိုန်မံၚ်ရောၚ်။
ပရိုၚ် – သြၚ်လောန်တိုၚ်မ်
Photo – MOI