လံၚ်လုၚ်၊ သိပ်တေမ်ပါ ၁၀
အပ္ဍဲကဵုရးတနၚ်သဳ ပွိုၚ်ဍုၚ်လံၚ်လုၚ် အကြပ်ဒပ်ၜါလပါ် ဟိုတ်နူပေါဲဗတိုက်ဒှ်လဝ် ကရပ်ကွာန်ဝေဒဳဂှ်တုဲ ညးဒေသၜိုတ် ၅၀၀၀ ဒးဂြိပ်ပါဲမံၚ်ဂှ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ဂိတုသိပ်တေမ်ပါ ၉ အခိၚ်နူဂယးဂှ် ကရောၚ်ပၞာန်ဒပ်ပၞာန်ဗမာ ဇြဟတ် ၁၂၀ ပြၚ်တံ ထပက်ကၠုၚ်တုဲ ဒှ်လဝ်ပေါဲဗတိုက်ကဵု ဂကောံမဟာမိတ် ဒပ်ပံၚ်တောဲပၠန်ဂတးတံ လံအာပွိုၚ်မွဲနာဍဳပြၚ်ၚ်ရ။
ဟိုတ်နူပရေၚ်ပေါဲဗတိုက်ဏံဒှ်တုဲ ရဲကွာန်ဝေဒဳ သ္ၚိဌာန်နွံ ၁၇၀၀ တံဂှ်တှ်ေ ပါဲနူကဵုညးအာယုက်ဇၞော်ဇၞော်တံတုဲ ကောန်ကွာန်သှ်ေမံၚ် ညးဒေသၜိုတ် ၅၀၀၀ တံဂှ် ဒးဂြိပ်ပါဲတိတ်အာ ဒၞာဲဗၠးဘဲမာန်တံအိုတ်ရ။
ပြဟ်ဟ်ဏံ ကရောၚ်ပၞာန်ဒပ်ဗမာ လုပ်ဖျေံဂဇအ်လဝ်ဒပ် ပ္ဍဲကွာန်ဝေဒဳတုဲ အကြာၜါလပါ ပေါဲဗတိုက် ကလေၚ်သကာတ်ကၠုၚ်မာန်ရောၚ် ညးတာလျိုၚ်ဒပ်ပၠန်ဂတးတံ ဟီုရ။
စနူဂိတုသိပ်တေမ်ပါ ၈ တုဲ နူကဵုဍုၚ်လံၚ်လုၚ်မွဲအဆံၚ် ကရေၚ်ပၞာန် ဒပ်ဗမာဏံ စိုပ်ကၠုၚ်ကွာန်ပျေၚ်ထိၚ်ဂှ် ထပက်ကရောၚ်ပၞာန် လုပ်ကၠုၚ်အပ္ဍဲကွာန်ဝေဒဳရ။
ဟိုတ်နူကရောၚ်ပၞာန် ထပက်လုပ်ဖျေံလဝ်ဒပ်တုဲ ကောန်ပၞာန်ဗမာတံ ကပှ်ဂၠံက်ကေတ်ဏာ ကပေါတ်ဒြပ်ရတ်ၚုဟ်မးနွံနွံ နူသ္ၚိဌာန်ညးတံဂှ် ကောန်ကွာန်ဝေဒဳတံ ဒှ်မံၚ်ဒဝိၚ်ကွေံကွေံရ။
စနူဂိတုသိပ်တေမ်ပါ သတ္တဟပထမဏံ နကဵုက္ဍိုပ်လိက် ပရေၚ်သ္အးဇ္ၚးတိဍာ်ဂးတုဲ ဒပ်ပၞာန်ဗမာတံ ကလေၚ်ထပက်မံၚ်ကရောၚ်ပၞာန် ပ္ဍဲကဵုရးတနၚ်သဳ ပွိုၚ်ဍုၚ်လံၚ်လုၚ်၊ တယိတ်ချံၚ်ကဵုပလဝ်တံ မွဲဝါပၠန်ရ။
အတိုၚ်လိက်ဒုၚ်စဳရေၚ် ဂကောံသုတေသနအကြာဒေသ FE5 Thanintharyi မ္ဂး ပ္ဍဲရးတနၚ်သဳ ဟိုတ်နူပရေၚ်ပေါဲဗတိုက် ဒပ်ၜါလပါ်တံကီု ကရောၚ်ပၞာန်ဗမာလုပ်ထပက်မံၚ်ကီုတုဲ ညးဒေသ ၈၅၀၀၀ ပြၚ်တံ ထောံသ္ၚိဌာန်ဒၞာဲဝါဲ ဒးဂြိပ်ပါဲမံၚ်အိုတ်ရ။
ပရိုၚ်-သြၚ်လောန်တိုၚ်မ်
Photo – CJ