အပ္ဍဲညးစၞးတိုၚ်ခဳ SCEF ကောန်ဂကောံထပ်ပဵုတိုန်

မတ်မလီု- သိပ်တေမ်ပါ ၁၀

ကံၚ်သဳပၠတရဴ ပရေၚ်ထမံက်ရုပ်ရဴ ဖိတ်ဒရေဝ်ဒဳမဝ်ကရေသဳ SCEF ဒက်ပတန်လဝ်ကဵု ပရေၚ်သ္ပစၞးတိုၚ်ခဳပိဒၞာဲ တွဵုရး/ ယူနေတ်ဖိတ်ဒရေဝ်/ ERO တံဂှ် ဒဵုကဵု ၇ ဂကောံ ပါလုပ်ကၠုၚ်မံၚ်ရောၚ်ဂှ် လလောၚ်တြးလဝ် ပ္ဍဲသိပ်တေမ်ပါ ၈ ရ။

ဂကောံဇြဟတ်ပၠန်ဂတးတမ်ကညံၚ်တံကဵု ဂကောံမဟာမိတ်ကောန်ဍုၚ်အရၚ်တံ ပံၚ်ကောံဒက်ပတန်လဝ် ပ္ဍဲကဵု SCEF ဂှ် ယူနေတ်သကိုၚ်၊ ယူနေတ်မဂွေကဵု ဒေသမာန္တလေဝ်တံပါလုပ်ကၠုၚ် နကဵုကောန်ဂကောံရဂှ် လလောၚ်တြးဏာ ပ္ဍဲစရၚ်ကံၚ်သဳတံရ။

SCEF ကၠောန်လဝ်ကောံဓရီု ပ္ဍဲဂိတုသိပ်တေမ်ပါ ၈ ဂှ် နဒဒှ်ကောန်ဂကောံတၟိ သ္ပဒတန်ဏာ ပရေၚ်သ္ပစၞးတိုၚ်ခဳပိဒၞာဲ သၟဝ်တွဵုရး/ ယူနေတ်ဖိတ်ဒရေဝ်/ ERO တံ မဒှ်ရ။

ဟိုတ်ဂှ်ရ ပ္ဍဲကဵု SCEF ပရေၚ်သ္ပစၞးတိုၚ်ခဳပိဒၞာဲ တွဵုရး/ ယူနေတ်ဖိတ်ဒရေဝ်/ ERO မ္ဂး ဂကောံမဟာမိတ်ကောန်ဍုၚ်အရၚ် KIA ၊ KNU ၊ CNF ကရေၚ်ဍာဲတံသၟးဟွံက လၟုဟ်ဏံ ဂကောံယူနေတ်သကိုၚ်၊ ယူနေတ်မဂွေ ကဵုဒေသမာန္တလေဝ်တံလေဝ် ပါလုပ်ကၠုၚ်ရ။

ကောန်ဂကောံပဵုတိုန်ကၠုၚ်မ္ဂး ဒှ်ပရေၚ်ဇြဟတ်စန်ပကောံမွဲကီုလေဝ် ချိက်ဆက်စၠောံအာကဵုဂကောံသှ်ေမံၚ် သေံ၊ ရခေၚ်ကဵု ဂကောံချေၚ်တံ ဟွံမာန်ဏီပုဟ် ဗိုလ်ဇၞော် CDM ဇြေန်ယဝ် ထံက်ထ္ၜးဟီုလဝ်ရ။

“ကောန်ဂကောံတံ ပဵုကၠုၚ်ဂှ် ဒှ်ဇြဟတ်ပရေၚ်ပံၚ်ကောံမွဲရ။ ဆဂး ကောန်ဂကူပဵုတိုန်ဟီုပၠန်လေဝ် ဒှ်မံၚ်ကောန်ဂကောံတောဲကၠုၚ်လဝ် သၟဝ် NUG/MOD တမ်မူလတေံရဏောၚ်။ ဂကောံလပါ်တေံ KIA KNU KNPP CAN ဟီုပၠန်လေဝ် ဂကောံမဟာမိတ်သဟာဲ နွံကၠုၚ်လဝ်တမ်မူလတေံရဏောၚ်။ အေဂှ်တှ်ေ အဲဒးဟီုမ္ဂး ကဵုဂကောံနွံမံၚ်တွဵုရးသေံတံ ရခေၚ်ကဵု ရဲဒေသဒဵုချေၚ်တံဂှ် အာချိက်စၠောံဟွံမာန်ဏီဂှ် ဂွံဆဵုညာတ်မံၚ်ရဏး” သာ်ဝွံ သ္ဂးရ။

နကဵု SCEF ဂှ်လေဝ် ဖျေံလဝ် “အတိုၚ်မူဝါဒမွဲ၊ မဟာဗျူဟာမွဲ”တုဲ ပရေၚ်ပၞာန်၊ ပရေၚ်ဍုၚ်ကွာန်ကဵု ကဏ္ဍပရေၚ်အုပ်ဓုပ်တံ ဇိုၚ်ဟယာညဳညဳ ပံၚ်တောဲအာတုဲ ပရေၚ်သ္ပစၞးညံၚ်ဂွံသၠဲလးတိုန်မာန် ဆက်ပံၚ်တောဲပ္ညဳပ္ညပ်အာကဵု ဂကောံဇြဟတ်မဟာမိတ်တံပၠန်ရောၚ် သ္ဂးလဝ်ရ။

သွက်ပရေၚ်ဏံ တုဲကၠုၚ်ဂိတုဂျူလာၚ် သတ္တဟတတိယတေံလေဝ် နူကဵု SCEF အလန်ပထမ ဆဵုဂဗလဝ်ကဵု ဂကောံဇြဟတ်ကောန်ဍုၚ်အရၚ် AA ၊ မန် ကဵု ပအိုဝ်တံဟွံက ဂကောံမဟာမိတ် ဒပ်ပံၚ်ကောံပၠန်ဂတးတမ်က္ညၚ် SRA ကေုာံ ဂကောံဇြဟတ်ပၠန်ဂတးတၞဟ်ဟ်တံ ဗွဲတၞဟ်ခြာကီု အတိုၚ်ဂကောံပံၚ်ကောံတံကီုရ။

ဗွဲကြဴဏံ အပ္ဍဲဂိတုအဝ်ဂတ်ဂှ် ကေတ်ဂွံတင်တုပ်စိုတ်ကဵု ဂကောံပၠန်ဂတးဒုၚ်သ္ဇိုၚ်ကဵုကောန်ဂကူဗမာတံ နူကဵု ယူနေတ်သကိုၚ်၊ ယူနေတ်မဂွေ ကဵု ဒေသမာန္တလေဝ်တံ ပါလုပ်ကၠုၚ်နကဵုကောန်ဂကောံ SCEF ရောၚ်။

ပြဟ်ဟ်ဏံ ပရေၚ်သ္ပစၞးတိုၚ်ခဳ တွဵုရး/ ယူနေတ်ဖိတ်ဒရေဝ်/ ERO တံဂှ် ကောန်ဂကောံ ၇ ဂကောံ၊ ပရေၚ်သ္ပစၞးတိုၚ်ခဳညးဍုၚ်ကွာန်ဂှ် အလဵုအသဳညဳသၟဟ်ကောန်ဂကူ NUG ကေုာံ ကမ္မတဳသ္ပစၞးစၠတ်ထဝ် ကၟိန်ဍုၚ် CRPH တံနွံကီုလေဝ် တိုၚ်ခဳသ္ပစၞးကဵု ညးစၞးညးဗြဴဂမၠိုၚ်တံဂှ် ပရေၚ်သ္ပစၞးဟွံမွဲဏီပုဟ်။

ဒုၚ်လဝ်သ္ဇိုၚ်ကဵု တိုၚ်ခဳပိတၚ်ဏံတုဲ သွက်ဂွံထမံက်အာရုပ်ရဴ ပရေၚ်ပၞာန်၊ ပရေၚ်ဍုၚ်ကွာန်ကဵု စပ်ကဵုပရေၚ်ကိစ္စ အေန်သတဳကျူယှေန်တံဂှ် ဒက်ပတန်လဝ် SCEF ပ္ဍဲသၞာံ ၂၀၂၆ ဂိတုမာတ် ၃၀ ဂှ်ရောၚ်။

စပ်ကဵု ပရေၚ်ပကောံဇြဟတ်ပၞာန်တံမ္ဂး နကဵု SCEF သွက်ဂွံဖျေံအာတင်သ္ဂုတ်သွာတ်မာန် ဒက်ပတန်လဝ် ကမ္မတဳပံၚ်ပစပ်ပ္ညဳပ္ညပ်တုဲ နူဂကောံပၠတရဴမဟာဗျူဟာကဵု မူဝါဒ SCEF တံ ကောပ်ကာဲအာတိုက်ရိုက်ရ။

တုဲပၠန် ဥက္ကဌ ပံၚ်တောဲကမ္မတဳပံၚ်ပစိုပ်ပ္ညဳပ္ညပ်ဂှ် ခါန်ကၞက်စုတ်လဝ် သ္ကိုပ်က္ဍိုက်ပ်ပၞာန် ဒပ်ပၞာန်ဗၠးၜးကချေၚ် KIA ကဵု ဗော်သွးကောန်ဂကူ ကရေၚ် KNU တံတုဲ တာလျိုၚ်ညးအုပ်ကာဂှ် ဝန်ဇၞော်ပရေၚ်စဵုဒၞာ NUG ကေတ်လဝ် မဒှ်ရ။

ညံၚ်ဂွံပါလုပ်အာ ကမ္မတဳပံၚ်ပစပ်ပ္ညဳပ္ညပ်ဂှ် တုဲကၠုၚ်ဂိတုအဝ်ဂတ် ပထမသတ္တဟတေံ ကၠောန်လဝ်ကောံဓရီု သ္ကိုပ်ဇၞော် ဒပ်ပၞာန်စဵုဒၞာညးဍုၚ်ကွာန်တုဲ နူဂကောံပၠတရဴ မဟာဗျူဟာကဵု မူဝါဒ SCEF ဖျေံလဝ် ပရေၚ်ကမၠောန်ဌာန်ဂတးရောၚ်။

အပ္ဍဲကဵု ဇၟာပ်ပ်ဒေသပၞာန်တံမ္ဂး ပံၚ်တောဲကၠောန်အာကဵု ဒပ်ပၠန်ဂတးမဟာမိတ် ဂကောံဇြဟတ်ကောန်ဍုၚ်အရၚ် ဆေၚ်စပ် တံတုဲ “နူကဵုပၞာန်ညးဍုၚ်ကွာန်ဒုၚ်ခဳဗတိုက်” ဂှ် ညံၚ်ဂွံတိုန်စိုပ်အာ “မဟာဗျူဟာထပက်ပၞာန်” မာန် ပတဝ်က္ဍိုပ်တုဲ သွက်ဂွံကၠောန်အာဂှ်လေဝ် ဖျေံလဝ်ပရေၚ်ကမၠောန်တံ နွံရ။

ဆဂး ပြဟ်ဟ်ဏံဂှ် ပရေၚ်လဝေၚ်ပၞာန် ဇိုၚ်ဟယာညဳညဳ ညံၚ်ရဴဗီုပြၚ် ဒပ်ပံၚ်ကောံဂှ် SCEF ထမံက်ရုပ်ရဴ ဟွံဂွံဆဵုညာတ်လဝ်တုဲ စပ်ကဵု ပရေၚ်ပၞာန်၊ ပရေၚ်ဍုၚ်ကွာန်ကဵု ကဏ္ဍပရေၚ်အုပ်ဓုပ်တံတုဲ ဂကောံပြးဇးမံၚ်တံ ညံၚ်ဂွံကလေၚ်ကောံမာန် ကၠောန်မံၚ်ပရေၚ်ဆဵုဂဗသဳကၠဳပ္ညဳပ္ညပ်တံ မဒှ်ကီုရ။

ပရိုၚ်-သြၚ်လောန်တိုၚ်မ်

Photo – NUG