သဓီု၊ သိပ်တေမ်ပါ ၁၂
ပ္ဍဲတွဵုရးမန် လ္တူဍုၚ်သဓီုဂှ် က္ဍိုပ်သ္ကိုပ်ပျူသဝ်ထဳ ဂကောံဖိုဝ်ထူတံ ထ္ၜးဟိုတ်ပရေၚ်ယိုက်ဝန်ပၞာန်တုဲ လ္တူညးဍုၚ်ကွာန်တံဂှ် ကၠောန်မံၚ် ပရေၚ်တံၚ်ဓရတ်သြန်ပဵုပရေံတိုန်မံၚ်ရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စနူဂိတုသိပ်တေမ်ပါဏံမံက်တုဲ လ္တူဍုၚ်သဓီု ပ္ဍဲအကြာအရာပ်ဆေၚ်အရက်ဗဳယာတံကဵု အကြာဂၠံၚ် ဃရံက်ဇျှော်တံလေဝ်ဟွံသှ်ေ ရပ်သေနာတ်ဘပဠတုဲ ဗက်ရပ်မံၚ်ပဝ်တာတံ ကီုရ။
ပ္ဍဲအကြာတ္ၚဲတံဏံပၠန် လ္တူဍုၚ်သဓီုဂှ် က္ဍိုပ်သ္ကိုပ်ပျူသဝ်ထဳ ဂကောံဖိုဝ်ထူ ရပ်လဝ်ညးဒေသ ဟွံအောန်နူ ၅၀ နွံတုဲ ကၠောန်မံၚ်ပရေၚ်ဘပဠ ဗက်အာတ်မံၚ်သြန်တံ မဒှ်ရ။
ရဲညးဒေသ ရပ်ချုက်ကၠေၚ်လဝ်တံ ပ္ဍဲကဵုရုၚ် ဌာနပရေၚ်ဗြဲကျာတြေံ ကရပ်ရုၚ်ဂကောံဌာနပရေၚ်ဗဂဵုလဟဵု ပွိုၚ်ဍုၚ်သဓီုတုဲ သီုကဵုပရေၚ်ၜုၚ်တက်ပျဲပျာံ ညံၚ်ရဴမၞိဟ်ဟွံသေၚ်လေဝ် ကၠောန်မံၚ်ကီုရောၚ် ညးဒးဒုၚ်လဝ်ဘဲတံ ဟီုရ။
အပ္ဍဲကဵု ညးဒးဒုၚ်ရပ်တဏံ ယဝ်ရ အာယုက်ပရေၚ်ယိုက်ဝန်ပၞာန် ဟွံပေၚ်ဏီမ္ဂး မွဲတၠ သြန် ၆၅ ကိုတ်ဒကေဝ်၊ ညးလုပ်အဝေါၚ် ယိုက်ပၞာန်ဂှ် ၁၅၀ ကိုတ်ဒကေဝ်၊ ရဲအာယုက်လောန်ၜက်အာ ပရေၚ်ယိုက်ဝန်ပၞာန်တံဂှ် မွဲတၠ ၃၀ ကိုတ် အာတ်မံၚ်တုဲ ရဲကဵုသြန်ဟွံမာန်တံဂှ် ပလံၚ်ဗစိုပ်ဏာ ဇရေၚ်ဘာပၞာန်တေံရောၚ်။
ဟိုတ်နူ ဂွံလဝ်ဒယံက် ဝန်ဇၞော်ပရေၚ်ဂီုကၠီု (လုံနယ်) တုဲ က္ဍိုပ်သ္ကိုပ်ပျူသဝ်ထဳ ဂကောံဖိုဝ်ထူတံ ဍိက်ထ္ၜးအဝဵုကၠောန်မံၚ် ဗီုဒးစိုတ်ရောၚ် ရဲလ္တူဍုၚ်သဓီုတံ သ္ဂးရ။
သွက်ပရေၚ်ယိုက်ဝန်မ္ဂး ၜိုတ်နွံပၟိက် က္ဍိုပ်သ္ကိုပ်ပျူသဝ်ထဳ ဂကောံဖိုဝ်ထူတံ ဗက်ဂၠာဲကဵုမံၚ်ဂှ်ရ ဝန်ဇၞော်ပရေၚ်ဂီုကၠီု ဒေသပယျဵုတွဵုရးမန် သ္ကိုပ်ဗိုလ်ဇၞော်ကျဝ်ဇွာမျေအ် ကဵုလဝ်အဝဵုရောၚ် ညးဒေသတံ ဟီုရ။
က္ဍိုပ်သ္ကိုပ်ပျူသဝ်ထဳ ဖိုဝ်ထူကၠောန်မံၚ် ပရေၚ်ဟွံဒးကေတ်သၞောဝ်ဥပဒေဗီုတံဏံဂှ် နူကဵုအလဵုအသဳ ဟွံကေတ်ကဵုအရေဝ်တုဲ ဒပ်ပၠန်ဂတးတံညံၚ်ဂွံကေတ်ကဵုအရေဝ်ပိုတ်တ်ဂှ် ပရေၚ်အာတ်မိက်တံ နွံမံၚ်ရ။
က္ဍိုပ်သ္ကိုပ်ပျူသဝ်ထဳ ဂကောံဖိုဝ်ထူတံဂှ် ဂကောံတံၚ်မၞိဟ်ဓရတ်ကေတ်သြန်မွဲရောၚ် စၟတ်သမ္တီလဝ်တုဲ ဍေံတံ ထ္ၜးလွဟ်ကေတ်ဇၞး သ္ပမာန်လ္တူညးဍုၚ်ကွာန်တံဂှ် ညံၚ်ဂွံကေတ်ကဵု အရေဝ်ပိုတ်တ်ညိဂှ် ညးဒေသဍုၚ်သဓီုတံ နွံမံၚ်ပၟိက်ကွေံကွေံရောၚ်။
ပရိုၚ်-သြၚ်လောန်တိုၚ်မ်
Photo – Social Media