ကျာ်မြဟ် ၊ သိပ်တေမ်ပါ ၁၂
အပ္ဍဲကဵုတွဵုရးမန် ထံၚ်ဗဟဵုကျာ်မြဟ် ဟိုတ်နူဒှ်မံၚ်ယဲမနက်ဟွံဂွံအခေါၚ်ဝဳယဲဂှ် အကြာပွိုၚ်တ္ၚဲတံဏံ ကောန်ထံၚ် ၆ တၠ ချိုတ်အာလဝ်နွံမံၚ်ဂှ် ညးကြပ်ကဵုထံၚ်တံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဟိုတ်နူဒှ်ယဲမနက် ဟွံဂွံအခေါၚ်ဝဳယဲတုဲ ကောန်ထံၚ်ညးတြုံ ၄ တၠကဵု ကောန်ထံၚ်ညးဗြဴ ၂ တၠတံ ပ္ဍဲဂိတုသိပ်တေမ်ပါ ၉ ဂှ် ၜါတၠ၊ သိပ်တေမ်ပါ ၁၀ ဂှ် ပန်တၠချိုတ်အာလဝ် မဒှ်ရ။
နူကဵုသၞာဲဒါယိုက်ဝန် ဌာနသ္ကိုပ်က္ဍိုက်ပ်ထံၚ်တံ ဟွံကဵုအခေါၚ်ပရေၚ်ဝဳယဲကီု ဟိုတ်နူဂဥုဲဇဗတံဟွံရုံဂပ်ကီုတုဲ ကောန်ထံၚ်က္တဵုဒှ်ယဲမနက်တံ ဒးချိုတ်အာလဝ်ရောၚ် ဂွံတီရ။
သွက်အခေါၚ်ဝဳယဲတံဂှ် ဟိုတ်နူတံၚ်လဝ်အခိၚ်ပရေၚ်ဝဳယဲကီု ဗွဲမဂတာပ်အခိၚ်ဝဳကဵုဟွံမာန်တုဲ ကောန်ထံၚ်တံဏံ ဒးချိုတ်အာလဝ်ရောၚ် ညးကြပ်ကဵုထံၚ်မွဲတၠဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ဒေါအ်လဝ် အခေါၚ်ဝဳယဲ၊ ဒေါအ်လဝ်ဟီုဂှ် ဒးအာပတိုန်ကဵု အဆံၚ်လ္တူတေံတုဲ အခိၚ်မၞိဟ်ယဲစိပ်အာမှ ဂွံပတိတ်အာမ္ၚးရ။ ဗီုလဵုမှ ဂြိပ်တိတ်အာဟွံမာန်ပုဟ်။ စိုပ်ရုၚ်ဂဥုဲမ္ၚးတှ်ေ ဒးကွက်လကံက်ဇိုၚ်ဏီ။ ဂွံကွက်လကံက်ဇိုၚ်ဂှ် ဒးမံၚ်မၞိဟ်ပၠန်။ အခေါၚ်ဝဳယဲ ဟွံဂတာပ်အခိၚ် ဒှ်အာတုဲ ဃရေက်ကေတ်လဝ်ဟွံဂွံပုဟ်” သာ်ဝွံ သ္ဂးရ။
တုဲပၠန် ယဲမနက်က္တဵုဒှ်မံၚ် ပ္ဍဲကဵုထံၚ်ဗဟဵုကျာ်မြဟ်ဂှ် စနူတုဲကၠုၚ်ဂိတုအဝ်ဂတ် ဒုတိယသတ္တဟကီုလေဝ် နူကဵုဌာနသ္ကိုပ်က္ဍိုက်ပ်ထံၚ်တံ ထၜေက်လဝ်မတ်တုဲ ပရေၚ်ချိုတ်အာဗီုတံဏံဒှ်အာလဝ်ရောၚ် ညးဆက်ဟီုရ။
ပြဟ်ဟ်ဏံ ဟိုတ်နူယဲမနက် ကောန်ထံၚ်ချိုတ်အာလဝ်တံဂှ်တှ်ေ ကောန်ထံၚ်ပရေၚ်ဍုၚ်ကွာန် မွဲတၠလေဝ်ဟွံပါတုဲ ဒှ်မံၚ်ကောန်ထံၚ် အမှုတၞဟ်ဟ် ညးဒှ်လဝ်ဒုဟ်ဒဏ်တံသၟးရဂှ် ဂွံတီရ။
ပြဟ်ဟ်ဏံ ဟိုတ်နူယဲမနက် ပရေၚ်ကောန်ထံၚ်တံချိုတ်ဂၠိုၚ် ဒှ်အာတုဲ ညးတာလျိုၚ်ထံၚ်ဗဟဵုကျာ်မြဟ်တံ ကဵုလဝ်အခေါၚ်ဝဳယဲ ပ္ဍဲကဵုရုၚ်ဂဥုဲညးဍုၚ်ကွာန် မတ်မလီု နနဲအယောၚ်အလာထ္ၜးစလဝ်ရောၚ်။
ပ္ဍဲကဵုရုၚ်ဂဥုဲ မတ်မလီု ကဵုလဝ်အခေါၚ်ဝဳယဲ ကောန်ထံၚ်ဒှ်မံၚ် ယဲမနက်တံဂှ်လေဝ် ပတေၚ်လဝ်ပရေၚ်ဂီုကၠီု ဗွဲတၟေၚ်နွံတုဲ ပရေၚ်ထတ်ယုက်ကလေၚ်ခိုဟ်တိုန် ညိညဗက်ဟွံဂတာပ် ကလေၚ်ကော်ဏာထံၚ်တေံပၠန် ဂွံတီရ။
ပ္ဍဲကဵုထံၚ်ဗဟဵုကျာ်မြဟ်ဂှ်တှ်ေ ပတေၚ်ဓရတ်လဝ် ပရေၚ်လိက်လုပ်ထံၚ်တံဂှ်ရ ဂဥုဲဇဗနာနာကီု စၞစတံကီု ကဵုပြၚ်ပၠုပ်နၚ်ထံၚ်ဟွံဂွံဒှ်မံၚ်တုဲ ကောန်ထံၚ်တံ က္တဵုဒှ်ယဲဇၞော်ကဵုဇြဟတ် ပရေၚ်ဒးချိုတ်အာလဝ်နွံကၠုၚ် မဒှ်ရ။
ပရိုၚ်-သြၚ်လောန်တိုၚ်မ်
Photo – Social Media