နေပျဳဒဝ် ၊ သိမ်တေမ်ပါ ၁၂
ပ္ဍဲကဵုမုက်ပၞာန် တွဵုရးရခေၚ်ကဵုကချေၚ်တံဂှ် ပရေၚ်ဒပ်ပၞာန် ထပက်မံၚ်လဝေၚ်ပၞာန်လၟုဟ်ဏံ အကာဲအရာဟွံခိုဟ် ဒှ်မံၚ်တုဲ နူကဵုရုၚ်သမ္မတ ပတိတ်လိက်အမိၚ် ပံက်လဝ် ဂကောံကဵုကသပ် ပရေၚ်ၜိုဟ်လလမ်ရ။
စပ်ကဵုလၟေၚ်ကမၠောန် ပရေၚ်ညဳသၟဟ်ကောန်ဂကူ ကေုာံပရေၚ်ၜိုဟ်လလမ် သွက်ဂွံထမံက်အာရုပ်ရဴမာန်တုဲ ဒက်ပတန် ဂကောံကဵုကသပ် ကမ္မတဳစန်ပကောံညဳသၟဟ်ကောန်ဂကူ ထမံက်ရုပ်ရဴပရေၚ်ၜိုဟ်လလမ် NSPNC နကဵု မၞိဟ်တြေံ နူလက်ထက် ဥူတိၚ်သိၚ်တံရ။
အလဵုဇကုခါန်ကၞက်လဝ်ကေတ်တ် သမ္မတ ဥူမေန်အံၚ်လှိုၚ် ထပက်စၟတ်တဲခၞံပံက်ဒက်ပတန်လဝ် ဂကောံကဵုကသပ် NSPNC ပ္ဍဲဂိတုအဝ်ဂတ် ၂၇ တုဲ နဒဒှ်က္ဍိုပ်ဂကောံဂှ် ဥူအံၚ်မေန်၊ ကောန်ဂကောံတံဂှ်တှ်ေ ဥူတိၚ်ဇြဝ်၊ ဥူအံၚ်နာၚ်ဥူ၊ ဒံက်တာမေန်ဇြဝ်ဥူ ကဵု ဥူတိတ်နိုၚ်တံ ပါလုပ်ရ။
ဒပ်ပၞာန်သီအဝဵုဝွံ ကၠောန်ကဵုပေါဲရုဲမာဲတုဲ အလဵုအသဳပၞာန် ထမံက်ဏာဗီုပြၚ်ညးဍုၚ်ကွာန် အပ္ဍဲကၠောန်လဝ် ကိုန်အစဳဇန်ပွိုၚ် ၁၀၀ ဂှ် ကော်ဘိက်ဏာ ဂကောံကောန်ဍုၚ်အရၚ်ရပ်လွဟ်တံ မုတင်ဒစးဒုၚ်လ္ပအာတ်မိက်ညိ သွက်ဂွံသဳကၠဳတက်အာကျာ ပရေၚ်ဍုၚ်ကွာန်ရ။
ပ္ဍဲအခိၚ်ပြဟ်ဟ်ဏံ ဂကောံရပ်လွဟ်ကောန်ဍုၚ်အရၚ် ဟွံကေၚ်ဒှ်လဝ်ပေါဲဗတိုက်ကဵုဒပ်ပၞာန်တံဂှ်ရ ဆဵုဂဗသဳကၠဳလဝ်ဏီတုဲ အပ္ဍဲကဵုဏံသွက်ပရေၚ်ကိစ္စ ပါ်ပရအ်တိဍာ်တံတုဲ ဂကောံလ္ၚဵုလ္ၚဵုတံ စိုပ်ကၠုၚ်ခုၚ်တက်ကျာ ပရေၚ်ၜိုဟ်လလမ်ရ။
မွဲလပါ်ပၠန် ဒၞာဲပရေၚ်ထိၚ်ချုက် ဒပ်ပၞာန်အာရက္ခ AA ကဵု ဒပ်ပၞာန်ဗၠးၜးကချေၚ် KIA တံ ပ္ဍဲကဵုတွဵုရးရခေၚ်ကဵု တွဵုရးကချေၚ်ဂှ် ပရေၚ်ထပက်ပၞာန်ဒပ်ပၞာန်ဗမာ အဃောဒးလဝ်ဘဲဂိမံၚ်ဏံ ပကိတ်လဝ်အခိၚ်ကာလတံတုဲ ပံက်ခၞံကၠုၚ်လဝ်ဂကောံကဵုကသပ် ဏံ မဒှ်ရ။
အကြာဏံလေဝ် သွက်ဂွံတက်ကျာပရေၚ်ၜိုဟ်လလမ်ဂှ် နူကဵုလပါ် ကမ္မတဳပ္ညဳပ္ညပ် ပရေၚ်ၜိုဟ်လလမ် NSPNC အလဵုအသဳပၞာန်တံ နကဵုစၟတ်တ္ရဲ ဂိတုသိပ်တေမ်ပါ ၄ ဂှ် ပလံၚ်လဝ်လိက်ဘိက်ကု ဂကောံ KIA၊ CNF ကဵု ABSDF တံနွံမံၚ်ရောၚ် ညးစုက်လုပ်ကဵုဂကောံတံဏံ ဟီုလဝ်ဂှ် နူကဵုဌာန်ပရိုၚ် BBC ဘာသာဗမာ ထမံက်ပတိတ်လဝ်ပရိုၚ်ကီုရ။
ဂကောံကောန်ဍုၚ်အရၚ် ရပ်လွဟ် ဒှ်မံၚ်ပေါဲဗတိုက်ကဵု ဒပ်ပၞာန်တံ ညံၚ်ဂွံဒေါအ်အာပန်ပှော်တုဲ ညံၚ်ဂွံကလေၚ်ထိၚ်ချုက်ကေတ် တိဍာ်တံမာန်ဂှ် နူကဵုအလဵုအသဳပၞာန်ဂစာန်ကၠောန်မံၚ် အိုတ်စောန်ရောၚ် ညးလ္ၚတ်တံသ္ၚဳဂၠိပ်လဝ်ရ။
ဗ္ဒိုပ်ဒပ်ပၞာန်ဗမာဖျေံလဝ်တံဂှ် ကလေၚ်ဆုတ်အာကဵု ဒှ်ဗီုပြၚ်ဏံမှလေဝ် ဝိုၚ်တက်ကျာပရေၚ်ၜိုဟ်လလမ် လမျီုလုပ်အာမာန်တုဲ ပံက်လဝ်ဂကောံကဵုကသပ်ဂှ် ဒှ်ကမၠောန်ဟွံသေၚ်ပုဟ် ဗိုလ်ဇၞော် CDM ဇြေၚ်ယျဝ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“အဓိက ရဲကြပ်အိုတ် MNDAA ဂှ်မှ ဗီုပြၚ်စိုပ်ကၠုၚ်နေပျဳဒဝ်ဂှ် ဟွံဂွံဆဵုဏီပုဟ်။ မုဒှ်ရောတှ်ေ ဒပ်ပၞာန်ဗမာဂှ် တိဍာ်ဍေံတံဆောံလဝ် ညံၚ်ဂွံကလေၚ်ကဵုဍေံတံပၠန်၊ အတိုၚ်ဗီုပြၚ်ကာလ နူကၠာအခိၚ်ဟွံသီအဝဵု အကာဲအရာဗီုတေံ ဍေံတံမိက်ဂွံဂွံလောန်အာတုဲ ဂကောံကောန်ဍုၚ်အရၚ်လဵု ကၠုၚ်သဳကၠဳဒှ်ဒှ် ပြေပြံၚ်ညးသ္ကံဟွံမာန်ပုဟ် အာဆဵုလဝ်ရ။ ကောန်ဍုၚ်အရၚ်တံ ကလေၚ်ကဵုတိဍာ်ဟွံသေၚ် ဒပ်ပၞာန်တံ ဖျေံလဝ်ဗ္ဒိုပ်ဂှ် ကလေၚ်ဆုတ်စဴအာ ဒှ်ကၠုၚ်ဗီုပြၚ်ဏံမှ ဝိုၚ်ခုၚ်တက်ကျာပရေၚ်ၜိုဟ်လလမ် လမျီုကလေၚ်လုပ်ကၠုၚ်ဏောၚ်။ သောၚ်ဂှ်ဟွံသေၚ် ဂကောံဂှ် ညးလဵုကၠုၚ်ၚ် ပံက်လဝ်ဒှ်ဒှ် ကမၠောန်ဒှ်ဟွံသေၚ်ပုဟ်” သာ်ဝွံ သ္ဂးရ။
ဟိုတ်နူပၞာန်ကျာ ဗတိုက်ကီု အလဵုအသဳကြုက်တံ ကဵုကၠုၚ် ပရေၚ်ဇြဟတ်ဟရိုဟ်တုဲ ဒပ်တအာၚ် TNLA ကဵု ဒပ်ကိုဝ်က MNDAA အာလဝ်က္ဍိုပ် လဝေၚ်ပၞာန် ၁၀၂၇ တံ ဒေါအ်လဝ်ပန်ပှော်ကဵုဒပ်ပၞာန် နကဵု Bilateral ရ။
ပေါဲတက်ကျာသဳကၠဳပရေၚ်ၜိုဟ်လလမ် အလဵုအသဳပၞာန် ဘိက်ကော်လဝ်ဂှ် ဒပ်တအာၚ် TNLA ကၠုၚ်စိုပ်နေပျဳဒဝ်တုဲ သဳကၠဳကီုလေဝ် MNDAA တံ ဒဵုကဵုအခိၚ်လၟုဟ် ကၠုၚ်စိုပ်သဳကၠဳလဝ် ဟွံမွဲဏီပုဟ်။
မွဲလပါ်တေံပၠန် ရဲပါလဝ်ဂကောံကောဒေံတံ AA ကီု ကောန်ဂကောံ ကံၚ်သဳပၠတရဴဖိတ်ဒရေဝ် KIA ၊ KNU ၊ CNF ကဵု ဂကောံကရေၚ်ဍာဲတံမ္ဂး အတိုၚ်အလဵုအသဳပၞာန်လးလဝ် ဂၠံၚ်တရဴပရေၚ်ၜိုဟ်လလမ်ဂှ်ဟွံဂါံကွာ်တုဲ ဆက်ပါလုပ်မံၚ် ပ္ဍဲပရေၚ်ပၠန်ဂတးတံရောၚ်။
ပ္ဍဲအကာဲအရာဏံ တာလျိုၚ်ပရေၚ်ကမၠောန် ဂကောံကဵုကသပ်အလဵုအသဳပၞာန်တံမ္ဂး ပတိုန်ထ္ၜးအာကု ကမ္မတဳဗဟဵု ပရေၚ်ညဳသၟဟ်ကောန်ဂကူကေုာံ ထမံက်ရုပ်ရဴပရေၚ်ၜိုဟ်လလမ်ကီု ကမ္မတဳပရေၚ်ကမၠောန်၊ ကမ္မတဳပ္ညဳပ္ညပ်၊ စပ်ကဵုပရေၚ်ၜိုဟ်လလမ်တုဲ အတိုၚ်နွံပၟိက်ဂှ် သွက်ဂွံကဵုအာကသပ် မဒှ်ရ။
စပ်ကဵုလိက်ကသုက် ပရေၚ်ဒေါအ်ပန်ပှော်အလုံဍုၚ် NCA တုဲ တၚ်တုပ်စိုတ် လၟေၚ်ပရေၚ်ကမၠောန်ဌာန်ဂတးတံ ဗွဲမစိုပ်တရဴ သွက်ဂွံထမံက်အာရုပ်ရဴမာန် တၚ်ကဵုကသပ်နတဲစှ်ေစှ်ေ သွက်ဂွံထမံက်ပတိတ်အာတံ ပါလုပ်ရ။
သ္ၚဳဂၠိပ်အာ လၟေၚ်ကမၠောန် ပရေၚ်ၜိုဟ်လလမ်တံတုဲ ကၠောန်သ္ပအာပရေၚ်သုတေသန၊ ပရေၚ်သ္ၚဳဂၠိပ်အကာဲအရာနာနာ၊ လိက်ကၞပ်တင်ကဵုကသပ်တံ သွက်ဂွံချူခၞံအာကီု ညးပါလုပ်ထေက်သီုဖအိုတ် ညံၚ်ဂွံပါလုပ်အာ ပ္ဍဲကဵုလၟေၚ်ကမၠောန်ပရေၚ်ၜိုဟ်လလမ်မာန် သွက်ဂွံလ္ၚတ်သ္ၚဳဂၠိပ်ပါ်ပါဲအာရောၚ်။
တုဲပၠန် အတိုၚ်နွံပၟိက် သွက်ဂွံဆက်စၠောံချိက်ကၠောန်အာကဵု ဂကောံကောန်ဍုၚ်အရၚ်ရပ်လွဟ်တံကီု၊ ဂကောံပရေၚ်မှာဇန်နာနာ တၠပညာ၊ ဂကောံညးရေၚ်တၠုၚ်ဖဵု ပရေၚ်ၜိုဟ်လလမ် အပ္ဍဲဍုၚ်မ္ၚးဍုၚ်တံဂှ်လေဝ် ခၞံစုတ်ကဵုလဝ် လၟေၚ်ပရေၚ်ကမၠောန် ဂကောံကဵုကသပ်ဏံ မဒှ်ရ။
ပရေၚ်ဒုၚ်စသိုၚ် အခေါၚ်စကာသြန် သွက်ဂကောံကဵုကသပ်မ္ဂး နူကဵုသြန်ဂအုံ ဌာနက္ဍိုက်ပ် ပရေၚ်ညဳသၟဟ်ကောန်ဂကူကေုာံ ထမံက်ရုပ်ရဴပရေၚ်ၜိုဟ်လလမ်တံ အတိုၚ်ကဵုလဝ်အခေါၚ် မကိတ်ညဳကဵုပရေၚ်ကမၠောန်တံဂှ် စကာသုၚ်စောဲအာရောၚ် ပ္ဍဲကဵုလိက်အမိၚ်ရုၚ်သမ္မတ လလောၚ်တြးလဝ်ဂှ် ချူထမံက်လဝ်ရ။
ပရိုၚ်-သြၚ်လောန်တိုၚ်မ်
Photo – MOI