သဵု(လ်) ၊ နဝ်ဝေမ်ဗာ (၃)
နကဵုဂကောံဒပ်ဗၠာဲသၟိၚ် ဍုၚ်သဵု(လ်) အခိၚ်ဂွံဒုၚ်လဝ်တဲ ဖုၚ်ကာတၟေၚ် ကၠာလၟေၚ်ဒဒှ် အပံၚ်မၞိဟ် (၁၅၀) ပြၚ် မဒးချိုတ်အာ ပ္ဍဲပေါဲသ္ဘၚ်ဟဝ်လဝေန် ဍုၚ်သဵု ဂွိုအ်ဒှ် နာဍဳညိညဂှ် သွက်ဂွံသောၚ်ကလးကဵုညးဍုၚ်ကွာန်တံ သာ်လဵုကလေၚ်ခၠေဝ်ပလန်လဝ်ရောဂှ် သ္ကိုပ်ဝန်ဇၞော် ဂကောံအလဵုအသဳကိုဝ်ရဳယျာသၠုၚ်ကျာ ဟာန်ဒက်သဵု အာတ်မိက်လဝ် ပ္ဍဲဂိတုနဝ်ဝေမ်ဗာ (၂) တေံရ။
ဟိုတ်နူလၟေၚ်ဒဒှ်ဂှ်တုဲ မၞိဟ် (၁၅၆) တၠ ချိုတ်အာလဝ်တုဲ (၃၃) တၠ မကလိဂွံလဝ်ဝပ်ဂှ်ဝွံ ဒှ်ဒၟံၚ်ကဆံၚ်ဒးဂွိၚ်တုဲ ပ္ဍဲကဵုညးမဒးချိုတ်အာတံဂှ် ကောန်ဍုၚ် နူကဵုကၟိန်ဍုၚ် အပံၚ် (၁၄) ဍုၚ်တံ လၟိဟ် (၂၆) တၠဟွံက ပါလုပ်လဝ်ရ။
“ဂကောံဒပ်ဗၠာဲသၟိၚ်တံ စၟဳစၟတ်ချိုတ်တ်ပၠိုတ်တ်တုဲ ဒးပ္တိုန်ထ္ၜးကဵု ညးဍုၚ်ကွာန်တံ ကၠးကၠးမှးမှးရောၚ်” သ္ကိုပ်ဝန်ဇၞော် ဟာန် ဟီုဂးလဝ် ပ္ဍဲကောံဓရီုကမၠောန် စပ်ကဵုဘဲအန္တရာယ် သဘာဝရ။
ပ္ဍဲကရေပ်ဂၠံၚ် ခရိုၚ် Itaewon မဒယှ်တှ်ပြာကတ်ဒၟံၚ် အကြာညးဂမၠိုၚ်တံဂှ် ကၠောန်ဗဒှ်လဝ် ပေါဲသ္ဘၚ် Halloween မဒှ်ကိုပ်ကၠာအိုတ် အပ္ဍဲပွိုၚ်ပိသၞာံဏံဂှ်တုဲ ညးသၟတ် ဂၠိုၚ်ကဵုဠက် ကောံကလောံ ကၠုၚ်ဂေတ်ဝေၚ်လဝ်ရ။
စၟတ်သမ္တီ ကော်လဝ်ဖုၚ်ကာတၟေၚ် နူဒပ်ဗၠာဲသၟိၚ်တံ မလလောၚ်ပ္တိတ်လဝ် ပ္ဍဲဂိတုနဝ်ဝေမ်ဗာ (၁) ဂှ်ဝွံ ကၠာပရူပရာဏံ ဂွိုအ်ဒှ် လလအ်ဗၞတ် (၄) နာဍဳဂှ် စကော်ကၠုၚ်လဝ်တုဲ ဒဒှ်မကော်လဝ်ဖုၚ်တံဏံဂှ်ဝွံ မၞိဟ်ချိုတ်ဂျိုၚ်ဒှ်မာန် ဒှ်အရာကဵုသမ္တီကိုပ်ကၠာအိုတ်ရဂှ် သ္ဂးရ။
ဒပ်ဗၠာဲသၟိၚ်တံ ဂွံဒုၚ်လဝ်တဲ ဖုၚ်ကာတၟေၚ် မကော်လဝ် (၁၀) လတုန် လအာတုပ်သာ်ဏံဂှ်တုဲ ညးမကော်လဝ်ဖုၚ်တံဝွံ ဒဒှ်ရဒှ်ဒၟံၚ်အကာဲအရာကာတၟေၚ် ဟီုဂးလဝ်တုဲ ဒုၚ်လဝ်ဂုဏ် သီုကဵုစိုတ်အိုတ် မအောန်ကဵုဇြဟတ်တံဂှ် ဂွံတီကေတ်ရ။
မၞိဟ်မၞုံဒၟံၚ် ပ္ဍဲကရေပ်ဂၠံၚ်ဍန်န် မကယျောဝ်စှ်ေဒၟံၚ် ကၠာဂွိုအ်ဒတုံစှ်ေ ဍိုက်ဒးညးသ္ကအ် မိနေတ်ညိညဂှ် ကော်လဝ်ဖုၚ် လက္ကရဴအိုတ်ဂှ်လေဝ် ဂွံဆဵုကေတ်ရ။
စၟတ်သမ္တီ ညးသက်သဳတံဂှ်ဝွံ ဗၠာဲသၟိၚ်လ္ၚဵုတံ ပသောၚ်ဒၟံၚ် ကွဳစက်ကြေပ်ၜေတ် လ္တူဂၠံၚ်ဇၞော်သၟးဂှ်ဟေၚ် ဂွံဆဵုလဝ်တုဲ ပ္ဍဲကဵုဒၞါဲကရေပ်ဂၠံၚ် ကေုာံ သကဲဂၠံၚ် ဒၞါဲမၞိဟ်ဂၠိုၚ်တံဂှ် သၞာဲဒဴဗၠာဲသၟိၚ် ညိညဟေၚ် နွံဂှ် စၟတ်သမ္တီ သက်သဳဂွံဆဵုနမတ်တံ ထ္ၜးပျးဒၟံၚ်ရ။
ပ္ဍဲဗ္တံပရူပရာက္တဵုဒှ် ပ္ဍဲ Itaewon မဒှ်ဒၞါဲဒယှ်တှ်ဒၟံၚ် ဟိုတ်နူဂၠံၚ်ကရေပ်တံကဵု ကုန်ဒဵုတံဂှ် အပံၚ်မၞိဟ် ဗၞတ် (၁) ကိုဋ်နွံရောၚ်ဂှ် ချိၚ်ခယျဂွံတုဲ သၞာဲဒဴဗၠာဲသၟိၚ် မဒးတာလျိုၚ်တံ (၁၃၇) တၠမၞုံဂှ် သၟိၚ်တၠအဝဵုတံ ဟီုရ။
သၞာဲဒဴဗၠာဲသၟိၚ်မွဲတၠ ဟီုလဝ်ကဵု အ္စာပရိုၚ်တံဂှ်မ္ဂး ဟိုတ်ဂွံအာလဝ် ပ္ဍဲဒၞါဲဒှ်ပရူဂှ်ဝွံ ဒၟါနူဖုၚ်မကော်လဝ် (၄) လတုန် ပ္ဍဲကဵုဖုၚ်လုပ်လဝ် (၁၁) လတုန်ဂှ် မဒှ်ရ။
“အခိၚ်မၞိဟ်မွဲမွဲ ကော်လဝ် (၁၁၂) တှ်ေ အကာဲအရာဏံဂှ် ဒှ်အရာပၟိက်ဇၞော်ကွေံကွေံတုဲ ဒှ်အခိၚ်မနွံပၟိက်ဒၟံၚ်ကဵု အရီုဗၚ်ဒပ်ဗၠာဲသၟိၚ်တံ ကွေံကွေံရောၚ်” ဂှ် သ္ကိုပ်ဝန်ဇၞော် ဟာန် နိဿဲကေတ် အကာဲအရာလာၚ်ဖုၚ်ကာတၟေၚ် ဂကောံဒပ်ဗၠာဲသၟိၚ် ကိုဝ်ရဳယျာသၠုၚ်ကျာတံတုဲ ဟီုဂးလဝ်ရ။
လ္တူပြဝမဗၠေတ်မှာ ဒပ်ဗၠာဲသၟိၚ်တံ မရေၚ်တၠုၚ်ကၠုၚ်လဝ် ပ္ဍဲပရေၚ်ဂဒိုအ်ဗၠိုက် ပ္ဍဲသၞာံ ၂၀၁၄ မၞိဟ် (၃၀၄) တၠ မဒးချိုတ်အာလဝ်တံဂှ်လေဝ် ပရေၚ်ပါ်ပါဲတံ ထပ်သၠုၚ်တိုန်ကၠုၚ်လဝ်ရ။
သွက်ဂွံပ္တိတ်ထောံ ဝန်ဇၞော်ကာအပ္ဍဲဍုၚ် ကေုာံ ဂအုပ်ဗၠာဲသၟိၚ်ကောန်ဂကူတံ လွာဲဂှ်ဂှ် အမာတ်ကၠတ်ထဝ်တံလေဝ် အာတ်မိက်ဒၟံၚ်အိုတ်ရ။
သ္ကိုပ်ဗိုလ် Yoen Hee-keun ဇၞော်သ္ကိုပ်ဒပ်ဗၠာဲသၟိၚ် ကိုဝ်ရဳယျာသၠုၚ်ကျာဂှ် ဒဒှ်မရေၚ်တၠုၚ်လဝ် ရုမ်မ်ဂပ်ပ် ဟွံမွဲ သွက်ဂွံထိၚ်ဗွဝ်မၞိဟ် ပ္ဍဲဒၞါဲဒှ်ပရူဂှ် သ္ပလဝ်သမ္တီတုဲ သွက်ဂွံကၠောန်သ္ပ ဂၠိုက်ဂၠါဲစၟဳစၟတ် ချိုတ်တ်ပၠိုတ်တ်ဂှ်လေဝ် ကဵုလဝ်ကတိရ။
Ref: CNA