လ္ဂုၚ်၊ နဝ်ဝေမ်ဗာ (၃)
ကံၚ်ဇြဳပၞာန်သီအဝဵုဝွံ ကြဴနူသ္ပဒတန်စၞောန်ပျး သၞောဝ်ဥပဒေ မဒးမပ္တိုန်စရၚ် ဂကောံဗော်သွးတံတုဲဂှ် သွက်ဂွံထိၚ်ဒက် မ္ၚးနူလၟေၚ်ကမၠောန် ကေုာံ တၚ်ဒတူလိုၚ် ဂကောံဗော်သွးတံဂှ် သီုကဵုသြန်မဂေတ်ဂြိပ် ပ္ဍဲဂကောံတံဂှ်လေဝ် ဂ္စါန်ကၠုၚ် သွက်ဂွံထိၚ်ဒက်ရ။
ကံၚ်ဇြဳပၞာန်သီအဝဵုဝွံ ပ္ဍဲဂိတုအံက်တဝ်ဗာ (၂၈) တုဲကၠုၚ်တေံဂှ် စၞောန်ပျးသ္ပဒတန်လဝ် သၞောဝ်ဥပဒေ ဒးပ္တိုန်စရၚ်ဂကောံဗော်သွးတံတုဲ သၞောဝ်ဏံဂှ်ဝွံ ဒှ်သၞောဝ်မသီကၠေံ ကပေါတ်ဒြပ်ရတ် ဂကောံဗော်သွးတံပိုၚ် နဒဒှ်ဘဏ္ဍာကၟိန်ဍုၚ်မာန်ဂှ်ကီု၊ ဒှ်သၞောဝ်မဖျေံဒဏ်ထံၚ် ကုညးမပါလုပ် အပ္ဍဲဂကောံဗော်သွးတံမာန်ရ။
ပ္ဍဲကဵုသၞောဝ်ဏံဂှ် ဂကောံဗော်သွးအပ္ဍဲဍုၚ်တံ ကေုာံ ဂကောံဍုၚ်သ္အာၚ် ဟွံဆက်စပ်ကဵုအလဵုအသဳတံလေဝ် ပါလုပ် ဒးပ္တိုန်စရၚ်ကီုရ။
အတိုၚ်ၝောံပိုဒ် (၃၃) သၞောဝ်ဥပဒေ စပ်ကဵုဒးပ္တိုန်စရၚ် ဂကောံဗော်သွးတံဂှ်မ္ဂး ညးလဵုဟွံဟီု စၟတ်တဲပ္တိုန်လဝ်စရၚ် ဟွံမွဲမွဲသာ် ဒက်ဂကောံမ္ဂး ဒဏ်ထံၚ်စဵုကဵု (၃) သၞာံကဵုဒှ် ဒဏ်သြန် ဟွံပဵုနူကဵု (၁၀) ကိုဋ်တံကဵုဒှ် ဖျေံစၟတ်မာန်ဂှ် ထ္မံက်ထ္ၜးလဝ်ရ။
သ္အာၚ်နူဂှ်ပၠန် အတိုၚ်တၚ်စၞောန်ပျး ပ္ဍဲၝောံပိုဒ် (၃၄) ကဵု ၝောံပိုဒ် (၃၅) တံဂှ်မ္ဂး ညးလဵုဟွံဟီု အာယုက်စၟတ်တဲ မပ္တိုန်လဝ်စရၚ်တံ လောန်ၜက်အာကီု၊ ပလီုသီထောံ စၟတ်တဲပ္တိုန်လဝ်စရၚ်တံတုဲ ဆက်ကၠောန်သ္ပဒတူလိုၚ်အာ နဒဒှ်ဂကောံဗော်သွးဂှ် ကၠောန်သ္ပဟွံဂွံတုဲ ပွမပါလုပ်ရေၚ်တၠုၚ်၊ ရီုဗၚ်ကဵုဇြဟတ် နဒဒှ်ကောန်ဂကောံ ပ္ဍဲကဵုဂကောံဗော်သွး ဟွံမွဲကဵုစၟတ်တဲ ပ္တိုန်လဝ်စရၚ်တံဂှ်လေဝ် ကၠောန်သ္ပဟွံဂွံဂှ် စၞောန်ပျးလဝ်ရ။
ယဝ်ရဒုဟ်ဒဏ်ပြာကတ် ဒဒှ်ရဖံက်ပလီုကလိလောန်လဝ် တၚ်စၞောန်ပျး ပ္ဍဲကဵုၝောံပိုဒ် သီုၜါဂှ်မ္ဂး တပ်ဒဏ်သြန် ဟွံပဵုနူကဵု မသုန်ကိုဋ်မာန်တုဲ ယဝ်ရဟွံကဵုဒဏ်သြန်မ္ဂး ဒးဖျေံဒဏ်ထံၚ် စဵုကဵု (၂) သၞာံရောၚ် ထ္မံက်ထ္ၜးလဝ် ပ္ဍဲသၞောဝ်ဂှ်ရ။
ဖက်ဆောညးအုပ်ကာ (၁) ဂအုပ်ဂကောံညးဗြဴ (ဍုၚ်ဗၟာ) – WLB နာန်မိုအ်အ်ဂှ်မ္ဂး သၞောဝ်ဥပဒေဏံဝွံ ဒဒှ်ရကၟာတ်ဒၞါ ကမၠောန်ဂကောံမှာဇန်တံ မရေၚ်တၠုၚ်ဒၟံၚ်တံဂှ်တုဲ သွက်ဂွံထိၚ်ဒက် မဒါန်သြန်ဍုၚ်သ္အာၚ်တံဂှ် ကံၚ်ဇြဳပၞာန် ဂ္စါန်ဒၟံၚ်ရောၚ် ဟီုရ။
“အရီုဗၚ် ပရေၚ်ဗ္စာရဏာမၞိဟ် ဍုၚ်သ္အာၚ်တံဂှ် တတ်ကၠောံပယျဵုတုဲ ကဵုကၠုၚ်အရီုဗၚ်တံဂှ် ကၠောန်သ္ပကၠုၚ် နွံရ၊ ကံၚ်ဇြဳပၞာန် SAC ဂှ် အရီုဗၚ်ပရေၚ်ဗ္စာရဏာမၞိဟ် ဍုၚ်သ္အာၚ်တံဂှ် မိက်ဂွံကၠောန် နူကဵုဍေံတံ မွဲကဆံၚ်ရ၊ ဟီုတှ်ေ ပ္တိတ်လဝ် သၞောဝ်ဥပဒေ စပ်ကဵုဒးပ္တိုန်စရၚ်ဂှ်တှ်ေ မိက်ဂွံကၟာတ်ဒၞါ ကလောန်မၞိဟ်တံဏံ သောၚ်ၚ်ကၠးကၠးရ၊ မိက်ဂွံကၟာတ်တာဒၞါ ပရေၚ်ချဳဒရာၚ်ကတိုၚ်ကၟဟ် CSOs တံ ကမၠောန်ညးတံဂှ် မွဲသ္ကုတ်၊ သီုကဵုတၚ်ရန်တၟံ မိက်ဂွံသုၚ်စောဲ မဒါန်သြန် ဍုၚ်သ္အာၚ်တံ နဒဒှ်လွဟ်ပၞာန်တံဂှ်လေဝ် ပါလုပ်ရောၚ် နကဵုအဲ ညာတ်ကေတ်ရ” ဂှ် ညးသ္ဂးရ။
အတိုၚ်ၝောံပိုဒ် (၃၇) သၞောဝ်ဥပဒေ စပ်ကဵုမဒးပ္တိုန်စရၚ် ဂကောံဗော်သွးတံဂှ်မ္ဂး ဂကောံလဵုဟွံဟီု ပွမလှဲပြံၚ်၊ သုၚ်စောဲ၊ ထံက်ပၚ် သြန်သၠုဲ ကပေါတ်နာနာတံ ဟွံသေၚ်မ္ဂး အရီုဗၚ်မွဲမွဲ နကဵုနဲကဲ ဟွံလုပ်သၞောဝ်တံ ပြဝမွဲမွဲသာ် မပ္တံသာ်ဏံတံဂှ် ကၟာတ်ဒၞါလဝ် ဟွံသေၚ်မ္ဂး ပသှ်ေထောံလဝ်တံ ကၠောန်သ္ပဟွံဂွံပုဟ်ဂှ် ကံၚ်ဇြဳပၞာန် စၞောန်ပျးလဝ်ရ။
သ္အာၚ်နူဂှ်ပၠန် ပ္ဍဲၝောံပိုဒ် (၃၈) ဂှ် ဂကောံဗော်သွး မကလိဂွံလဝ်စၟတ်တဲ ပ္တိုန်လဝ်စရၚ်လဵုဟွံဟီု ကၠောန်သ္ပဆက်စၠောံ ဟွံသေၚ်မ္ဂး ရီုဗၚ်ကဵုဇြဟတ် ကုဂကောံဟွံလုပ်သၞောဝ်တံ၊ ကောန်ဂကောံဟွံလုပ်သၞောဝ်တံ မပါလုပ် ဂကောံဗော်သွး ကေုာံ ပူဂဵု နူကဵုကၟိန်ဍုၚ်မစၟတ်လဝ် ဒဒှ်ရလုတ်လောန်ဒၟံၚ် ပြဝပကီုပရာပ်တံ တိုက်ရိုက်ကဵုဒှ်၊ ပၞုက်ဓလုက်ကဵုဒှ် ကၠောန်သ္ပဟွံဂွံပုဟ်ဂှ် စၞောန်ပျးလဝ်ရ။
တၠပညာသၞောဝ်မွဲတၠဂှ်လေဝ် ဥပဒေဏံဝွံ ဂကောံပ္တိုန်လဝ် စရၚ်တုဲတံကီု၊ ဂကောံဟွံဂွံ ပ္တိုန်စရၚ်ဏီတံကီုဂှ် အခိၚ်ဟွံရုဲ ကေတ်ကၠုၚ်အရေဝ်မာန်တုဲ ကၠောန်သ္ပကၠုၚ် သွက်ဂွံထပိုတ် ဂၠံၚ်တရဴပရေၚ်ထံက်ပၚ် ဂကောံဒစဵုဒစးတံရဂှ် သ္ၚဳဂၠိပ်လဝ်ရ။
“စၞောန်ပျးသၞောဝ်ဏံတုဲမ္ဂး ကေတ်ကၠုၚ်အရေဝ် ကုဂကောံဗော်သွးတံ သ္ကာတ်တ်မြဟ်ဟ်မာန်ရ၊ လအာတုပ်သာ်ဏံကီု ဂကောံပရဟိတ၊ ဂကောံပရေၚ်ဖောအ်ဗြေဝ်မှာန်ဇန်တံ တုဲတှ်ေ ဂကောံရီုဗၚ်ဟံၚ်ပြာ် ညးပါဲဒဴဘဲပၞာန်တံမာန်ဂှ် ညာတ်ရ၊ တၚ်ရန်တၟံအဓိကဂှ်တှ်ေ သွက်ဂွံထပိုတ် ဂၠံၚ်တရဴပရေၚ်ထံက်ပၚ် မထံက်ပၚ်ဒၟံၚ် ဂကောံ CRPH, NUG, PDF ကေုာံ EAOs, EROs မပြိုၚ်ပ္ကာန်ဒၟံၚ် ပရေၚ်ပၞာန်၊ ပရေၚ်ဍုၚ်ကွာန် ကဵု (နစက) ဂှ်ဏောၚ် ညာတ်ရ” သာ်ဝွံ ညးသ္ဂးရ။
သ္အာၚ်နူဂှ်ပၠန် သၞောဝ်ဏံဝွံ အခိၚ်ဇြဟတ်ပြိုၚ်ပ္ကာန် ပရေၚ်ပၞာန်၊ ပရေၚ်ဍုၚ်ကွာန် ကဵုဂကောံဒစဵုဒစးတံ သ္ကာတ်မြဟ်ကၠုၚ်ဒၟံၚ်ဂှ် ကံၚ်ဇြဳပၞာန် ဒှ်သဘဴထိၚ်ဒက်ထောံ ဂကောံမအုပ်လီုကၠေံ သၟဝ်အဝဵုအပိုၚ်အခြာမာန်တံ သ္ကာတ်တ်မြဟ်ဟ်ရောၚ်ဂှ်လေဝ် တၠပညာသၞောဝ်တံ ထံက်ထ္ၜးလဝ်ရ။
ပ္ဍဲကဵုၝောံပိုဒ် (၃၉) သၞောဝ်ဥပဒေ မဒးပ္တိုန်စရၚ် ဂကောံဗော်သွးတံဂှ်မ္ဂး ဂကောံမကလိဂွံလဝ် စၟတ်တဲပ္တိုန်လဝ်စရၚ်လဵုဟွံဟီု ကမၠောန်မဇီုကပိုက်ကဵု ပရေၚ်အဝဵုအပိုၚ်အခြာကၟိန်ဍုၚ် ဂွံတန်ကြန်တံ၊ ပရေၚ်သၞောဝ်ဥပဒေ အုပ်လဒံတံ၊ ပရေၚ်ဂီုကၠီု ကေုာံ ပရေၚ်ကောန်ဍုၚ်အရၚ် သ္ဂောံကောံကလောံညဳသၟဟ်တံ တိုက်ရိုက်ကဵုဒှ်၊ တိုက်ရိုက်ဟွံသေၚ်ကဵုဒှ် ကၠောန်သ္ပဟွံဂွံပုဟ်ဂှ် တာဒၞါလဝ်ရ။
ယဝ်ရဖံက်ပ္ကဝ် တၚ်စၞောန်ပျး ပ္ဍဲၝောံပိုဒ် (၃၈) ကဵု (၃၉) တံဂှ်မ္ဂး ကုညးတာလျိုၚ် ဂကောံဗော်သွးတံဂှ် ဒးဖျေံစၟတ် ဒဏ်ထံၚ် စဵုကဵု (၅) သၞာံကဵုဒှ်၊ ဒဏ်သြန် ဟွံပဵုနူကဵု ကိုဋ် (၅၀) ဒ္ကေဝ်ကဵုဒှ် ဟွံသေၚ်မ္ဂး သီုၜါဒဏ်လေဝ် ဒှ်မာန်တုဲ ဂကောံမကလိလောန်လဝ် ဒုဟ်ဒဏ်တံဂှ် ဒးပလီုကၠေံတုဲ သြန်သၠုဲဒြပ်ရတ် ဂကောံဗော်သွးတံ မပိုၚ်ပြဳလဝ်တံဂှ်လေဝ် ဒးသီကၠေံ နဒဒှ်ဘဏ္ဍာကၟိန်ဍုၚ်ရောၚ်ဂှ် စၞောန်ပျးလဝ်ရ။
ဒၟါနူသၞောဝ်ဥပဒေ ကံၚ်ဇြဳပၞာန် မစၞောန်ပျးလဝ်တံဂှ်တုဲ နကဵုဂကောံမှာဇန်အပ္ဍဲဍုၚ် မနွံဒၟံၚ် ကြပ်ပ်ကဵု ညးဍုၚ်ကွာန်တံ ပ္ဍဲကဵုအာကၠုၚ်ချဳဒရာၚ်တံ၊ ရေၚ်တၠုၚ်ကဵုတံဂှ် အခက်အခုဲသာနွံကၠုၚ်မာန်ရောၚ် သ္ဂးရ။
ဟိုတ်ဂှ်ရ ကံၚ်ဇြဳပၞာန်ဝွံ ဒၟါနူဒှ်အလဵုအသဳလုပ်သၞောဝ် ဟွံသေၚ်ဂှ်ရ နကဵုတၠဒါန် နူဗွိုၚ်ဍုၚ်သ္အာၚ်တံ နွံပၟိက် ညံၚ်ဂွိုအ်သ္ပစၟတ်သမ္တီ ဥပဒေ မ္ဒးပ္တိုန်စရၚ် ဂကောံဗော်သွး နူကဵုကံၚ်ဇြဳပၞာန်တံ မစၞောန်ပျးလဝ်ဂှ် ညးချဳဒရာၚ်ကတိုၚ်ကၟဟ် အခေါၚ်အရာမၞိဟ်တံ ကေုာံ ပရေၚ်ဒဳမဝ်ကရေဇြဳတံ ထံက်ထ္ၜးလဝ်ရ။
ပရိုၚ်−သြၚ်လောန်တိုၚ်(မ်)