ဗေကျေန်၊ သိပ်တေမ်ပါ ၁၇
ရးနိဂီုဍုၚ်တံဝွံ ကမၠောန်ပွ ပရေၚ်ဂၠာဲသၞတၚ်တံဂှ် ဒေါအ်ပါဲထောံတုဲ ပရေၚ်ကလေၚ်ထမံက်ပတိုန် ရာဇဝၚ်ခေတ်လဇုဲဂလုဲတံဂှ် ညံၚ်ဂွံတာဒၞာအာ ပ္ဍဲကဵုသိပ်တေမ်ပါ ၁၆ ဂှ် ဝန်ဇၞော်ပရေၚ်စဵုဒၞာကြုက် ဒံၚ်ဂျာန် ဗတိုက်ဖအောဝ်လဝ်ရ။
ဂလာန်ညး အတိုၚ်တၚ်ဟီုစၟတ်သမ္တီစွံလဝ် ပ္ဍဲကဵုသဘၚ်သဳကၠဳ ပရေၚ်ဂီုကၠီု ယှာန်ချာန် ဗေဂျေန်မ္ဂး စပ်ကဵု ပရေၚ်လဟီုသ္ဂး ကြုက်တံ ပိုၚ်ပြဳလဝ် ထာဲဝါန်တုဲ အကြာဒေသတံ အခိၚ်ပရေၚ်ကယျာန်ဓဝါတ် က္တဵုဒှ်မံၚ် ပရေၚ်ဂၠံၚ်ဍာ် ၜဳကြုုက်သၠုၚ်ကျာဂှ်တုဲ မံက်တိုန်ကၠုၚ် မဒှ်ရ။
စပ်ကဵုပရေၚ်ဂတိကဝတ် အမေရိကာန် သွက်ဒေသအာယှတုဲ အခိၚ်ပရေၚ်သံသယတံ မံက်တိတ်မံၚ်ဏံဂှ် ဟီုကၠုၚ်ဗီုဏံရောၚ်။
စိုပ်ကၠုၚ်မံၚ်ပယျာံအခါ ပရေၚ်ဂၠးကဝ် လီုလာ်သရိုဟ်အာမာန်တုဲ အဟိန်ညးကဵုမံၚ်သတိဂှ် သွက်ဂွံသောၚ်ကလးအာ ပရေၚ်ကြံၚ်မ္ၚိုဟ်တံမာန် ပဵုတုဲပရေၚ်ညံၚ်ဂွံစုက်လုက်ကၠောန်အာ ဂၠံၚ်ဍာန်တၟိတၟိတံဂှ် ဗတိုက်ဖအောဝ်လဝ်ရ။
ဆဂး အကာဲအရာ ပရေၚ်ချိုတ်တ်ပၠိုတ်တ်ဂှ် ညးဟီုဂးလဝ်ညိညိညညတုဲ ပရေၚ်ပါ်ပါဲ လ္တူလပါ်ရဲပြိုၚ်ပကာန်တံ ဟွံမွဲပုဟ်။
ပရေၚ်ခန်လ္ၚတ် ဝၚ်တံဂှ် ဒးစၟတ်စွံလဝ်အပ္ဍဲစိုတ်ဇကုတံတုဲ ပရေၚ်အုပ်ဓလီုတံ၊ ပရေၚ်နွံပၟိက်ပၞာန်တံ ကေုာံ ပရေၚ်ကလေၚ်ပလေဝ်ရာဇဝၚ် သီုဖအိုတ်တံဂှ် သတိနွံနွံ ဗွဲမဂၠိုၚ် ဒးဒစဵုဒစးအာရောၚ် ပ္ဍဲဂလာန်ပံက် အခန်ကၞာသဘၚ်သဳကၠဳဂှ် ဟီုလဝ်ရ။
ကၠောန်မံၚ်ပွဗီုပြၚ်တံဏံမ္ဂး မာတ်လဝ်မတ်ဟွံထေက်၊ ဒက်ပကောံအာဇြဟတ် ရးနိဂီုဍုၚ်နာနာတံတုဲ သွက်ပရေၚ်ဓမ္မတံဂှ် ညံၚ်ဟွံဂွံသုၚ်စောဲအာ ပရေၚ်ဗီုပြၚ်တံဏံမာန် ဒးဒစးဒုၚ် စဵုဒၞာရောၚ် ညးဟီုရ။
ယဝ်ရ ကြုက်လုပ်ဗတိုက် ထာဲဝါန်မ္ဂး ဂျပါန် ဒးလုပ်ပါအာရောၚ် သ္ကိုပ်ဝန်ဇၞော် သာနေတာကာ အိချိ ဟီုဂးတုဲ အကြာပရေၚ်ဆက်ဆောံကြုက်ကဵု ဂျပါန်တံ စိုပ်မံၚ်အကာဲအရာပရေံ ဒှ်ကၠုၚ်ပ္ဍဲကဵုသၞာံအာတေံရ။
ဟိုတ်နူအကာဲအရာဏံတုဲ ဂျပါန် ကလေၚ်ဂစာန်အာမံၚ် အတိက်ပၟိက်ပၞာန်တေံရောၚ် ဗေကျေၚ် ကဵုလဝ်သတိ အလန်ကဵုအလန်ရ။
မွဲအခိၚ်တေံ အကြာကၟိန်ဍုၚ်ကြုက်ကဵု ဂျပါန်တံ ဟွံဒှ်ကၠုၚ်ပေါဲပၞာန်ပေၚ်ၚ်ဏံ ပ္ဍဲ ၁၉၃၁ ဂှ် ဂျပါန်တံ သီကေတ်လဝ် တ္ကအ် မာန်ချူရဳယာ မဒှ်ရ။
ဒဵုကဵုသိပ်တေမ်ပါ ၁၇ ကၠောန်အာသဘၚ်သဳကၠဳ ပွိုၚ်ပိတ္ၚဲဏံ နူကဵုရးနိဂီုဍုၚ် ၁၀၀ ပြၚ် ညးတာလျိုၚ်ပၞာန်တံ အမာတ်ကလုတ်တံကဵု တၠပညာတံ တိုန်စိုပ်မံၚ်တုဲ နူကဵုပေန်တဂန် ညးတာလျိုၚ်အဆံၚ်သၠုၚ်တံ တၠပညာရတ်ယှာတံ၊ ညးစၞးတာလဳဗာန်တံ ကေုာံ ဝန်ဇၞော်ပရေၚ်စဵုဒၞာ ဒေသဆေၚ်စပ်တံလေဝ် ပါလုပ်ရ။
ပရေၚ်ဝန်ဇၞော်ကြုက် ဟီုဂးလဝ်ဏံဂှ် ဒှ်အရာပရေၚ်ပါ်ပါဲ တိုက်ရိုက်ကု အမေရိကာန်ကဵု မဟာမိတ်တံရောၚ် ညးလ္ၚတ်လ္ၚဵုတံ ဟီုဂးလဝ်ရ။
Ref:Reuters