ၜဳကလေၚ် ၊ သိပ်တေမ်ပါ ၁၉
အပ္ဍဲတွဵုရးမန် ပွိုၚ်ဍုၚ်ၜဳကလေၚ် အဟိန်ဂကောံပံၚ်တောဲ ဒပ်ပၞာန်ဗမာ ဗက်ရပ်မံၚ်ပဝ်တာမ္ဂး ညံၚ်ရဴၜုၚ်တက်မံၚ် ကောန်ဒုဟ်တံကၠောန်ကၠုၚ်မံၚ်ရောၚ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ဟိုတ်နူနွံမံၚ်ပၟိက်မၞိဟ် သွက်ပရေၚ်ယိုက်ဝန်ပၞာန်တုဲ ဒပ်ပၞာန်ဗမာတံ ဗက်ဂၠာဲရပ်မံၚ်သၟတ်ဒေသတံ ဆက်က်နွံမံၚ်တုဲ အခိၚ်ရပ်ဂှ်ပၠန် ဒဵုကဵုပရေၚ်ၜုၚ်တက်ပျဲပျာံတံ ကၠောန်ကၠုၚ်မံၚ် မဒှ်ရ။
ဂကောံပံၚ်တောဲ ဒပ်ပၞာန်ဗမာတံ ညံၚ်ကဵုကောန်ဒုဟ်မွဲ ရပ်မံၚ်သၟတ် တံတုဲ ဂွိၚ်ဖေက်အမှုပူကၠုၚ်လပါ်ဇကုဂှ်တုဲ ညးဍုၚ်ကွာန်တံလေဝ် ဟွံဂံၚ်အာကဵုပရေၚ်ရီုဗၚ်ပုဟ် သ္ဂးရ။
အတိုၚ်ညးဆဵုနမတ်တံ ဟီုလဴမ္ဂး အခိၚ်ဗက်ထဍေၚ်ရပ်ပဝ်တာဂှ် တေအ်ဗဒေါမ်ထောံကွဳလိုန်ဓါတ်တံကီု မွဲအလန်ဓဝ် လုပ်ကၠုၚ် ဆေၚ်ဗဳယာ ခုၚ်ဝေၚ်ဗဳလိယက်တံတုဲ ဒုဟ်ၝတံနွံမံၚ်ဂှ် ၝတံဟွံတီပုဟ်ဟာဂးတုဲ ၜုၚ်တက် ပတိုန်ဏာလ္တူကွဳစက် တံၚ်ကေတ်ဏာ မွဲအလန်ဓဝ်ရောၚ် သ္ဂးရ။
မၞိဟ်ဒးဒုၚ်ရပ်တံဂှ် ယဝ်ရကဵုသြန်မာန်မ္ဂး ကေတ်သြန်ကိုတ်ကၠမ်ပြၚ် တုဲ ကလေၚ်ဗလးကဵုမံၚ်နွံကီု၊ ယဝ်ရ နုက်ကဵုသြန်ဟွံမာန်မ္ဂး ဒးဒုၚ်ပလံၚ်ဏာ ဒပ်ပရေၚ်ယိုက်ဝန်ပၞာန်တေံတုဲ ကွဳလိုန်ဓါတ်၊ ဖုၚ်၊ သြန်ပါကၠုၚ်တံဂှ် ဒးဒုၚ်သီကေတ်ဏာဖအိုတ်ရောၚ်။
ဟိုတ်နူ ဂကောံပံၚ်တောဲဒပ်ပၞာန်ဗမာတံ ဗက်တံၚ်ရပ်မံၚ်ပဝ်တာ သွက်ပရေၚ်ယိုက်ဝန်ပၞာန်ကီု ပရေၚ်ရပ်မၞိဟ်အာဓရတ်သြန်တံ နွံမံၚ်တုဲ သၟတ်အဝဲကၠောန်ကမၠောန်မာန်တံ ဗွဲမဂၠိုၚ် ကြပ်ဟွံမွဲ အောန်စှ်ေအာမံၚ် ကွေံကွေံရောၚ် ညးဒေသၜဳကလေၚ်တံ ဟီုရ။
ပ္ဍဲပွိုၚ်ဍုၚ်ၜဳကလေၚ် ဟိုတ်နူပရေၚ်ဒပ်ပၞာန်တံ ရပ်မံၚ်ပဝ်တာတုဲ အခိၚ်ဗ္တံကီု အခိၚ်တ္ၚဲကီု ညးဂံၚ်တိတ်မ္ၚးအာကၠုၚ်တံ ကြပ်ဟွံမွဲ အောန်စှ်ေအာကွေံကွေံဂှ်ကီု နူကဵုဂၠံၚ်ဍာန် ပရေၚ်လုပ်သၞောဝ် ဟွံသေၚ်ဂှ် သၟတ်တံဗွဲမဂၠိုၚ် လုပ်စိုပ်အာဍုၚ်ဇိုၚ်ဝုတ်ဒိုဟ်တံလေဝ် နွံကီုရ။
အတိုၚ်တၚ်နၚ် ဌာန်ပရိုၚ် သြၚ်လောန်တိုၚ်မ် ပကောံဂွံလဝ်မ္ဂး အပ္ဍဲကဵုတွဵုရးမန် နူကဵုဒပ်ပၞာန်သီအဝဵုပံက်ကၠုၚ်လဝ် ဘာယိုက်ဝန်ပၞာန် စနူလၟေၚ် ၁ ဒဵုစိုပ် ၂၈ ဏံမ္ဂး သၟတ် ဟွံအောန်နူကဵု ၅၈၀၀ ဒးဒုၚ်ပကောံဏာလဝ် နဒဒှ်ကောန်ပၞာန်တၟိတံရ။
ပရိုၚ်-သြၚ်လောန်တိုၚ်
Photo -CJ