မုဟ်ဍုၚ်၊ သိပ်တေမ်ပါ ၁၉
တွဵုရးဍုၚ်မန် ပ္ဍဲကဵုဒၞာဲလုပ်တိတ် ဍုၚ်မုဟ်ဍုၚ်ဂှ် ဂကောံပံၚ်တောဲ ဒပ်ပၞာန်ဗမာတံ ပ္ဍဲအကြာတ္ၚဲတံဏံ ကၠောန်မံၚ်ပရေၚ်မာတ်ဆိုအ် စၟဳစၟတ်နွံမံၚ်ဆက်က်ရောၚ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ပ္ဍဲကဵုကရပ်ဂိက်သၞေဟ်ကၚ် ဌာနပရေၚ်ဗဂဵုလဟဵု ကံက်အခေါန်သၠာကွဳစက် လုပ်ဍုၚ်မုဟ်ဍုၚ်ကီု ဒၞာဲသ္ကုတ်ဂၠံၚ်လပါ် မုဟ်ဍုၚ်-ကွာန်ဆုကၠတံကီု ဂကောံပံၚ်တောဲဒပ်ပၞာန်ဗမာတံ ကၠောန်မံၚ်ပရေၚ်မာတ်ဆိုအ်စၟဳစၟတ်တံ နွံရ။
အခိၚ်ကၠောန်မံၚ် ပရေၚ်မာတ်ဆိုအ်စၟဳစၟတ်တံမ္ဂး ရဲဍိုက်ကၠုၚ်ကွဳလိုန်ဓာတ်တံဂှ်တှ်ေ ကဵုပံက်ကဠာဗုၚ်၊ စၟဳစၟတ် လိုၚ်သေၚ်ကွဳ၊ လိုၚ်သေၚ်မၞိဟ်တုဲ ကွဳစက်အာတရဴ မွဲမလေဝ်ဟွံသှ်ေ ဗဒေါအ်တုဲ ကၠောန်လဝ်ပရေၚ်စၟဳစၟတ်တံရောၚ်။
ဟိုတ်နူ ဂကောံပံၚ်တောဲဒပ်ပၞာန်ဗမာတံ အခိၚ်တ္ၚဲဗ္တံဟွံရုဲ ကၠောန်မံၚ် ပရေၚ်မာတ်ဆိုအ်စၟဳစၟတ်တုဲ ရဲနူကွာန်တံ သွက်ဂွံတိုန်အာလပါ်ဍုၚ်ဂှ် ညးဒေသတံ ဒှ်မံၚ်ဒဝိၚ်ရောၚ် သ္ဂးရ။
မွဲလပါ်ပၠန် အခိၚ်ဗ္တံ ရဲတိတ်မ္ၚးအာကၠုၚ်မံၚ်တံဂှ် ဂကောံပံၚ်တောဲ ဒပ်ပၞာန်ဗမာတံ ဗက်တံၚ်ရပ်ပဝ်တာနွံတုဲ အခိၚ်ဗ္တံမ္ဂး ညးဂံၚ်တိတ်မ္ၚး ကြပ်ဟွံမွဲ အောန်စှ်ေအာဗွဲမလောန်ရ။
အတိုၚ်ညးဒေသတံဟီုမ္ဂး တုဲကၠုၚ်အကြာမွဲၜါတ္ၚဲတေံ အကြာဂၠံၚ်ဇၞော် မတ်မလီု-မုဟ်ဍုၚ်ဂှ် ပရေၚ်ဒမၠဗတိုက်လဝ် ပရိုၚ်မံက်ပြာကတ် အာတုဲ ဂကောံပံၚ်တောဲဒပ်ပၞာန်ဗမာတံ ကၠောန်တိုန် ပရေၚ်စၟဳစၟတ် တံ မဒှ်ရ။
ဂကောံပံၚ်တောဲ ဒပ်ပၞာန်ဗမာသီအဝဵုတံ ကၠောန်မံၚ် ပရေၚ်မာတ်ဆိုအ်စၟဳစၟတ်တုဲ ဖေက်ဒးဒုၚ်ရပ်ပဝ်တာ သွက်ယိုက်ဝန်ပၞာန်တံဂှ်လေဝ် ပရေၚ်ဒှ်ဒဝိၚ်စံၚ်တူ အကြာညးဍုၚ်ကွာန်တံ သၠုၚ်မံၚ်ကီုရောၚ်။
ပ္ဍဲတွဵုရးမန်မ္ဂး သၟတ်တိတ်မ္ၚးအာကၠုၚ်အခိၚ်ဗ္တံတံကီု ရဲဖံက်ပကဝ် အမိၚ်ဒေသန္တတံကီု ဒပ်ပၞာန်ဗမာ ကၠောန်မံၚ်ပရေၚ်ရပ်ပဝ်တာ နွံမံၚ်ဆက်က်ရောၚ် ဂွံတီနူကဵု ညးဒေသတံရ။
ပရိုၚ်-သြၚ်လောန်တိုၚ်
Photo -Social Media