လ္ဂုၚ်၊ နဝ်ဝေမ်ဗာ (၄)
ပ္ဍဲလ္တူဍုၚ်လ္ဂုၚ် ပွမကၠတ်ဂၠံက်တံ ကေုာံ လုပ်စိုပ်စဵုကဵု အပ္ဍဲသ္ၚိတုဲ ဗ္တိုက်ပၠံၚ်ၜးတံ က္တဵုဒှ်ကၠုၚ် မွဲဏှမွဲဏှဂှ်ရ ညးဍုၚ်ကွာန် လ္တူဍုၚ်တံဝွံ ဒးမံၚ်စံၚ်ဒၟံၚ် နကဵုစိုတ် ဟွံဂီုကၠီုတံရဂှ် ညးလ္တူဍုၚ်လ္ဂုၚ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ဂိတုအံက်တဝ်ဗာ သတ္တာဟဒုတိယ ကေုာံ ဂိတုနဝ်ဝေမ်ဗာ အပ္ဍဲသတ္တာဟပထမတံဂှ် သီုကဵုမပါလုပ် ဒဒှ်မဗ္တိုက်ပၠံၚ်ၜးတံ ကဵု ပွမကၠတ်ဂၠံက်တံဂှ် က္တဵုဒှ်လဝ် ဟွံအောန်နူကဵု (၁၅) ဝါတုဲ ပ္ဍဲကဵုတံဏံဂှ် ဒးဒုၚ်ဂစိုတ်လဝ် မွဲတၠရ။
ပ္ဍဲဂိတုနဝ်ဝေမ်ဗာ (၂) ဂှ်လေဝ် ပ္ဍဲကဵုဆေၚ်သွံကပေါတ်သိုၚ်ခၞံသ္ၚိ (သစ္စာ) မၞုံပ္ဍဲဂၠံၚ် (၂၆) ၊ ပွိုၚ်ဍုၚ် (ပန်းဘဲတန်း) ဂှ် မၞိဟ်ပိတၠ ထ္ပက်ကၠုၚ် တၠဆေၚ်တံကဵုၜုန်တုဲ ဒဒှ်မဗ္တိုက်ပၠံၚ်ၜးတံ ထပ်က္တဵုဒှ်လဝ်ရ။
ၜိုန်ရပရေၚ်ဗ္တိုက်ပၠံၚ်ၜးတံ ဒှ်ကၠုၚ်မွဲဏှမွဲဏှကီုလေဝ် လ္ပာ်ကံၚ်ဇြဳပၞာန် ရေၚ်တၠုၚ်ကေတ်လဝ်အရေဝ် ဟွံမွဲဂှ်ရ ပရေၚ်ပါ်ပါဲ အကြာညးဍုၚ်ကွာန်တံ သၠုၚ်တိုန်ဒၟံၚ်ရ။
ညးဍုၚ်ကွာန် လ္တူဍုၚ်လ္ဂုၚ်မွဲတၠဂှ် ဒၟါနူဒဒှ်မဗ္တိုက်ပၠံၚ်ၜးတံ သာဂၠိုၚ်ကၠုၚ်မံၚ်ဂှ်ရ အခိၚ်ဗ္တံမ္ဂး ဟွံဂံၚ်တိတ်မ္ၚးသ္ၚိရတုဲ ကွာ်ဂၠံၚ်မ္ဂးလေဝ် သီုကဵုဖုၚ် ကေုာံ ကပေါတ်မၞုံကဵု ၚုဟ်မးတံ ဟွံဂံၚ်ကေတ်ဏာရပုဟ်ဂှ် ဟီုရ။
သ္အာၚ်နူဂှ်ပၠန် နကဵုညးဍုၚ်ကွာန်တံ ဒှ်အမှုကၠတ်ဂၠံၚ်မွဲမွဲတုဲ အာစိုပ်တေၚ်ကဵု ဗ္ဒိုပ်ဗၠာဲသၟိၚ်ပွိုၚ်ဍုၚ်တံမ္ဂးလေဝ် ပွမကေတ်ကဵုအရေဝ်မွဲမွဲသာ် ကၠောန်ကဵုလဝ် ဟွံမွဲပုဟ်ဂှ်လေဝ် ညးသ္ဂးရ။
ဆ္ဂး ၜိုန်ရကံၚ်ဇြဳပၞာန် ပတေၚ်ဂြတ်လဝ် ပရေၚ်ဂီုကၠီု ပ္ဍဲဍုၚ်လ္ဂုၚ်ကီုလေဝ် ကၠောန်ဒၟံၚ်သွက်ပရေၚ်ဂီုကၠီုဍေံတံသၟးရတုဲ သွက်ပရေၚ်ဂီုကၠီုညးဍုၚ်ကွာန်တံဂှ် မုမှကၠောန်လဝ် ဟွံမွဲပုဟ်ဂှ် ညးဒေသတံ သ္ဂးအိုတ်ရ။
ပ္ဍဲဂိတုတုဲကၠုၚ်တေံလေဝ် ပ္ဍဲပွိုၚ်ဍုၚ် (မၚ်္ဂလာတောၚ်ညွန့်) ၊ ရးလ္ဂုၚ်ဂှ် ဗ္တိုက်ပၠံၚ်ၜး ဂစိုတ်ထောံ သီုသမ္ဘာ သီုတၠသ္ၚိ သၞာဲဒဴပရေၚ်ပညာဒေါအ်ဇူ မဒှ်အ္စာကၞေဟ် မကလိဂွံလဝ်လာပ် လိက်ပတ်ကောန်ဂကူဂှ်တုဲ က္တဵုဒှ်လဝ် ပရေၚ်ဗ္တိုက်ပၠံၚ်ၜး သၠုဲသၠာ် ကေုာံ ကပေါတ်မၞုံကဵုၚုဟ်မးတံရ။
ကြဴနူဒပ်ပၞာန်သီအဝဵုတုဲ ပ္ဍဲလ္တူဍုၚ်လ္ဂုၚ်ဂှ် ပရေၚ်ပၠံၚ်ၜးကၠတ်ဂၠံၚ်တံ ဂၠိုၚ်ကၠုၚ်ဒၟံၚ်တုဲ ဒးဒုၚ်ပၠံၚ်ၜး ပ္ဍဲမ္ၚးသ္ၚိဌာန်သၟးဟွံက ဒဵုကဵုအပ္ဍဲသ္ၚိတံဂှ်လေဝ် လုပ်စိုတ်တုဲ ဒးဒုၚ်ပၠံၚ်ၜးဒၟံၚ်ကီုရ။
ပရိုၚ်−သြၚ်လောန်တိုၚ်(မ်)