တနၚ်သဳ၊ အံက်တဝ်ပါ ၃
စနူကဵုသၞာံ ၂၀၂၆ ဂိတုဂျာန်နဝါရဳ စဵုစိုပ်ဂိတုဂျောန် အကြာပွိုၚ် ၆ ဂိတုဏံ ပ္ဍဲကဵုရးတနၚ်သဳ နူကဵုဒပ်ပၞာန်ဗမာ ကၠောန်လဝ်ပွ ပရေၚ်ဖံက်ပကဝ်အခေါၚ်အရာမၞိဟ် ဒှ်လဝ်ၜိုတ် ၅၇ ဂကူနွံတုဲ ကၠောန်လဝ်ဂၠိုၚ်အိုတ်ရောၚ် နူကဵုဇာဖိုၚ်ပရေၚ်အခေါၚ်အရာမၞိဟ် ND-Burma လလောၚ်တြးလဝ်ရ။
အကြာပွိုၚ် ၆ ဂိတုတုဲကၠုၚ်ဏံ အလုံရးနိဂီုဍုၚ်မွဲ ပတိုန်စွံလဝ် ပရေၚ်စၟတ်သမ္တီ ၃၀၅ အမှုကဵု ပရူဒဒှ် ၅၃၆ ဂကူနွံတုဲ အပ္ဍဲဏံဂှ် ပရေၚ်ဖံက်ပကဝ်အခေါၚ်အရာမၞိဟ် ၂၈၉ ကေုာံ ပွမဗတိုက် ၂၄၇ ဂကူတံ ပါလုပ်ရ။
အပ္ဍဲကဵုပရေၚ်ဖံက်ပကဝ်အခေါၚ်အရာမၞိဟ်တံဂှ် နူကဵုဒပ်ပၞာန်ဗမာ ၂၀၅ ဂကူ၊ ဂကောံပၠန်ဂတး ကောန်ဍုၚ်အရၚ်တံ ၂၀ ဂကူကေုာံ နူကဵုဒပ်စဵုဒၞာညးဍုၚ်ကွာန်တံ ၂ ဂကူကၠောန်လဝ်ပွဖံက်ပကဝ်ရောၚ် ND-Burma သ္ဂးရ။
အပ္ဍဲဏံ ပ္ဍဲကဵုရးတနၚ်သဳ ပရေၚ်ဖံက်ပကဝ်အခေါၚ်အရာမၞိဟ် ၅၇ အမှု ဒှ်လဝ်ဂၠိုၚ်အိုတ်တုဲ ပ္ဍဲတွဵုရးကချေၚ် ၅၀ အမှု ကဵု တွဵုရးသေံ ၄၈ အမှုတံဂှ် ချူပတိုန်စွံလဝ် ပရေၚ်စၟတ်သမ္တီနွံရ။
အတိုၚ်လိက်ဒုၚ်စဳရေၚ်မ္ဂး အပ္ဍဲပွိုၚ်ကာလဏံ နူကဵုဒပ်ပၞာန်ဗမာပန်ဗတိုက်မံၚ် သ္ၚိဌာန်ညးဍုၚ်ကွာန်တံတုဲ ကၠောန်မံၚ် ပွဖံက်ပကဝ်အခေါၚ်အရာမၞိဟ် ဆက်ကတဵုဒှ်မံၚ်ကီု ကွာန်ဂမၠိုၚ် သ္ၚိဌာန်၊ ဘာဗတောန်လိက်ကဵု ဘာလကျာ်တံလေဝ်ဟွံသှ်ေ ဒးဒုၚ်စံၚ်ပလီုထောံလဝ် နွံမံၚ်အရိုဟ်ဟ်ဂှ် သ္ဂးလဝ်ရ။
အပ္ဍဲကဵုရးနိဂီုဍုၚ်ဗမာမ္ဂး ပရေၚ်ဒပ်ပၞာန်ဗမာကၠောန်လဝ် ပရေၚ်ရာဇဝတ်တံဂှ် ဟွံဒးဒုၚ်လျိုၚ် ဟွံဒးကေတ်တာလျိုၚ်ဟွံမွဲ ပါဲလဝ်အိုတ်တုဲ သွက်မၞိဟ်ဂမၠိုၚ် ပရေၚ်ညဳသၟဟ်ဂွံဒှ်အာမာန်ဂှ် က္ဍိုပ်သ္ကိုပ် တၞောဝ်ဒတောဝ်တၟိတံကဵု အလဵုအသဳဖိတ်ဒရေဝ်တံ ပံၚ်တောဲထမံက်ရုပ်ရဴ ကၠောန်ကဵုညိဂှ် နူကဵု ND-Burma ဗတိုက်ဖအောဝ်လဝ်ရ။
ပရိုၚ်-သြၚ်လောန်တိုၚ်မ်
Photo – Social Media