မတ်မလီု-အံက်တဝ်ပါ ၃
ဍုၚ်ဇၞော်မဟာတွဵုရးမန် ပ္ဍဲကဵုဍုၚ်မတ်မလီု ကၠာအခိၚ်ဥတုဗြဲဟွံအိုတ်ဏီ နူကဵုအခိၚ်လၟုဟ်ဏံ ပရေၚ်ပၟတ်ဓါတ်လလဳပိုတ် မွဲတ္ၚဲတုဲမွဲတုဲ ပဵုပရေံတိုန်မံၚ်ကွေံကွေံရဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
အပ္ဍဲအခိၚ်အခါဥတုဗြဲဏံ ပရေၚ်ဂွံပၟတ်ဓါတ်လလဳ ပွိုၚ်မွဲတ္ၚဲ ၂၄ နာဍဳမ္ဂး ၜိုတ် ၁၄ နာဍဳရ ဂွံပၟတ်တုဲ ပြဟ်ဟ်ဏံ ပ္ဍဲကဵုအရာပ်ဗွဲမဂၠိုၚ် ဂၠိုၚ်အိုတ်နူကဵုပွိုၚ် ၈ နာဍဳ ၜိုတ်ပွဳပွူ ၆ နာဍဳဓဝ် ဂွံမံၚ်ပၟတ်ကီုရ။
ပြဟ်ဟ်ဏံ ပရေၚ်ပၟတ်ဓါတ်လလဳအခိၚ်ပိုတ်မံၚ် ဂၠိုၚ်လောန်အာတုဲ ပရေၚ်ကမၠောန်အဇာဍောတ် အဇာအဒေါဝ်တံ ဒှ်အာပရေၚ်ယုတ်ဒေက်နွံတုဲ ဘဝပရေၚ်ပိုန်ဒြပ်မၞိဟ်ညးဒေသတံ ဒးဆဵုဂဗမံၚ်ကဵု အခက်အခုဲနာနာသာ်နွံမံၚ်ရောၚ် ဂွံတီရ။
ပရေၚ်ပၟတ်ဓါတ်လလဳပိုတ်ဂှ် သီုတ္ၚဲသီုဗတမ်အရိုဟ်ဟ်တ္ၚဲ ပိုတ်ဂၠိုၚ်တိုန်အာဒှ်မံၚ်တုဲ စိုပ်အခိၚ်ကညၚ်မ္ဂး အကာဲအရာပဵုတုဲပရေံတိုန်အာ ဒှ်ကၠုၚ်မာန်ကီု ပရေၚ်ကမၠောန်အဇာဍောတ်တံ ဒှ်အာတၚ်ယုတ်ဒေက် ဂၠိုၚ်တိုန်မာန်ရောၚ် ညးဒေသမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ပၟတ်ဂှ်တှ်ေ သီုတ္ၚဲ သီုဗတမ် အခိၚ်ဟွံရုဲ ပိုတ်ဂၠိုၚ်အာမံၚ်ကွေံကွေံ အခိၚ်ပၟတ်ပၠိုတ်ဂၠိုၚ်အာတှ်ေ စိုပ်အခိၚ်ကညၚ် အကာဲအရာ ညံၚ်ကဵုပဵုပရေံအာနူဏံ ဒှ်မာန်၊ မွဲပၠန် ပရေၚ်ကမၠောန်အဇာဍောတ် ကမၠောန်ကွတ်တဲ ညးကဵုညး စနူတံဏံ ဒှ်ကၠုၚ်ပရေၚ်ယုတ်ဒေက်ဖအိုတ်ရ၊ မွဲလပါ်တေံပၠန် ၚုဟ်ကၠေၚ်စက်တံ တိုန်မံၚ်ကွေံကွေံ ဒးဗက်ဂၠာဲရာန်လေဝ် ဝါတ်ကွေံကွေံ၊ ပရေၚ် သွက်ဂွံဒးဝါတ်ကျာတ်တံဂှ် စိုပ်ကညၚ်ဏံ ဒးဆဵုအာဏောၚ်” သာ်ဝွံ သ္ဂးရ။
တုဲပၠန် ဗီုကၠာတေံ အခိၚ်သွက်ဂွံထပိုတ် ပၟတ်ဓါတ်လလဳဂှ် ချူထမံက်ထၜးလဝ် ပ္ဍဲကဵုခံက်အၚ်တံနွံကီုလေဝ် ပြဟ်ဟ်ဏံ အခိၚ်မိက်ဂွံထပိုတ်ပၟတ်ဂှ် ထပိုတ်၊ အခိၚ်မိက်ဂွံကဵုပၟတ်ဂှ် ကဵုမံၚ်တုဲ စနူကဵု ဂွံဗဂေတ်ပရေၚ်ကမၠောန်တံဂှ် ဒှ်မံၚ်အခက်အခုဲရောၚ် ညးဆက်ဟီုရ။
ပြဟ်ဟ်ဏံမ္ဂး အခိၚ်ပၟတ်ဓါတ်လလဳပိုတ်ဂှ် လံကွေံကွေံတုဲ စိုပ်အခိၚ်ဗတမ်မှ ပၟတ်ကလေၚ်ကၠုၚ်ဂှ် စနူကဵုပရေၚ်တောမ်တပ် ပုၚ်သွတံ ဒှ်မံၚ်ပရေၚ်အခက်အခုဲရောၚ် ညးဒေသ မွဲတၠပၠန် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“အကာဲအရာပၟတ်ဂှ် ဟွံပြေပြံၚ်ပုဟ်။ ဟွံပြေပြံၚ်ပုဟ်ဟီုဂှ် ဆလဆလ စိုပ်အခိၚ်ဗတမ်မှ ကလေၚ်ကၠုၚ်၊ အခိၚ်ဗတမ် ၜိုတ် ၁ နာဍဳတေံ ဒှ်မံၚ်ဗီုပြၚ်ဏံ၊ ကြပ်အခိၚ်တိက်မှ ပၟတ်ကၠုၚ်ဒှ်စလေပ်ဂၠိုၚ်မံၚ်။ သွက်စပုၚ် ဟောံဍာ်တံဂှ် ပဵုဒှ်အခက်အခုဲကွေံဏောၚ်” သာ်ဝွံ သ္ဂးရ။
မွဲလပါ်တေံ တွဵုရးမန်ကီု ပ္ဍဲကဵုရးဒေသ တွဵုရးတံမ္ဂး အခိၚ်ကဵုမံၚ်ပၟတ်လလဳ စၞးအဇာ ပွိုၚ် ၁၂ နာဍဳဂှ် ထပ်ထပဵုကဵုဏာ ပွိုၚ် ၁၄ နာဍဳရောၚ် ဝန်ဇၞော်ပရေၚ်ဓါတ်လလဳ ဥူကိုကိုလွေၚ် ဟီုကၠုၚ်လဝ် ပ္ဍဲကဵုဂိတုအေဗရာ ၂၂ တေံ မဒှ်ရ။
ၜိုန်ရဟီုလဝ်ဗီုဏံကီုလေဝ် ပ္ဍဲအကာဲအရာဗလးတိ အခိၚ်ဂွံမံၚ်ပၟတ်ဓါတ်လလဳ ပရေံတိုန်ကၠုၚ်၊ အခိၚ်ပၟတ်ပၠိုတ် လံဂၠိုၚ်အာတုဲ ကမၠောန်ပရေၚ်ပိုန်ဒြပ် ဒးပဓာန်စမံၚ်ကဵု ပရေၚ်ပၟတ်ဓါတ်လလဳတံ ဒှ်ကၠုၚ်အခက်အခုဲ ဇဳဒိုဟ်နာနာသာ်ရောၚ်။
အပ္ဍဲကဵုဍုၚ်မတ်မလီု တုဲကၠုၚ်လက်ထက်အလဵုအသဳ NLD တေံ ပ္ဍဲကဵုပွိုၚ်မွဲတ္ၚဲ ဂွံကၠုၚ်လဝ်ပၟတ်ဓါတ်လလဳ ကြပ်အရိုဟ်တ္ၚဲလၟေၚ်ဍာံကီုလေဝ် နူကဵုဒပ်ပၞာန်သီအဝဵုတုဲ အခိၚ်ဂွံပၟတ်ဓါတ်လလဳ ၜိုတ်နာဍဳ မွဲဍောတ်တ်ရနွံတုဲ အခိၚ်ပၟတ်ပၠိုတ်ဂှ်လေဝ် အခိၚ်လံလောန်ကွေံ ဒှ်အာရ။
ပရိုၚ်-သြၚ်လောန်တိုၚ်မ်
Photo – Social Media