ဍာ်ဗု၊ အံက်တဝ်ပါ ၁၃
အပ္ဍဲကဵုရးတနၚ်သဳ ပွိုၚ်ဍုၚ်ဍာ်ဗု ကရောၚ်ပၞာန်ဗမာထပက်လုပ်ကၠုၚ် ကရပ်ဍုၚ်ကလိၚ်အံၚ် ဒးဒုၚ်ပန်တုဲ ကောန်ပၞာန်ပိတၠ ချိုတ်အာဂှ် ဒပ်လကိုဟ်ရေဝ် လလောၚ်ပတိတ်ပရိုၚ်ရ။
တုဲကၠုၚ်ဂိတုအံက်တဝ်ပါ ၁၀ ဏံ အခိၚ်ၜိုတ်နူဂယး ၈ နာဍဳကဝက်ဂှ် ကရောၚ်ပၞာန်ဗမာဇြဟတ်ၜိုတ် ၂၀၀ တံ ထပက်လုပ်ကၠုၚ် လပါ်ကွာန်လအ်ဇြိုၚ်ကဵု ကွာန်ရတ်တၟးတံဂှ် ဒပ်ပံၚ်ကောံပၠန်ဂတး တံ ကြတ်ပန်လဝ်ရောၚ်။
ပ္ဍဲပေါဲဗတိုက်ဏံ နူလပါ်ဒပ်ပၞာန်ဗမာ ကောန်ပၞာန်ပိတၠ ချိုတ်တုဲ ဒးဝပ် ၆ တၠနွံမံၚ်ဂှ် နူဒပ်လကိုဟ်ရေဝ် လလောၚ်ပတိတ်လဝ်ပရိုၚ်ရ။
ပ္ဍဲပေါဲဗတိုက်ဏံ ဒပ်လကိုဟ်ရေဝ်တံကဵု ဒပ် KNLA ကရေၚ် တမ်ဒပ် ၂၇ တံ ပံၚ်တောဲဗတိုက်လဝ်ဂှ် လပါ်ဂကောံဇြဟတ်ပၠန်ဂတးတံ ပရေၚ်ဒးလဝ်ဝပ်ဟွံမွဲပုဟ် ပ္ဍဲပရိုၚ်ဂှ်လလောၚ်ပတိတ်လဝ်ရ။
ပေါဲဗတိုက်တုဲဒှ်အာတုဲ ဒပ်ပၞာန်ဗမာတံ ရပ်စၟတ်စၟဳစၟတ် ရဲကၠောန်ကၠအ် ပ္ဍဲကဵုကွာန်လအ်ဇြိုၚ်တုဲ ဂၠံၚ်ညးဍုၚ်ကွာန်တံ အာမံၚ်ကၠအ်ဂှ်လေဝ် ဒပ်ပၞာန်ဗမာတံကၟာတ်ထောံရဂှ် ဂွံတီနူကဵု ညးဒေသတံရ။
သၞာံအာတေံ ဂိတုနဝ်ဝေမ်ပါဂှ်လေဝ် ကရောၚ်ပၞာန်ဗမာထပက်ကၠုၚ် လပါ်ကွာန်ရတ်တၟး ဒးဒုၚ်ပန်တုဲ ကောန်ပၞာန်ချိုတ်မွဲတၠ၊ ဒးဝပ်မွဲတၠကေၚ်ဒှ်လဝ် ဂွံတီရ။
ပရိုၚ်-သြၚ်လောန်တိုၚ်မ်
Photo – Social Media