မတ်မလီု၊ အံက်တဝ်ပါ ၁၃
သွက်ဂွံဒုၚ်ဒဝ် စဵုဒၞာဲအာဇြဟတ် သူပါအေလ်နဳညိုဇၞော်ဇၞော်မာန်မ္ဂး သွက်ဂွံပံက်စွံအာ ဗဒိုပ်ပါဲဓါတ်ဂမ္တဴ ပ္ဍဲကဵုဘာလကျာ် တွဵုးရးမန်တံညိဂှ် နူကဵုအလဵုအသဳပၞာန် ကဵုလဝ်စၞောန်ပ္ညုၚ်ရဂှ် ညးကြပ်ကဵုရဲ ပရေၚ်အုပ်ဓုပ်တံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
သွက်ဂွံပံက်စွံ ဗဒိုပ်ပါဲဓါတ်ဂမ္တဴ ပ္ဍဲကဵုဘာလကျာ်တံမာန်ဂှ် တုဲကၠုၚ်မွဲၜါတ္ၚဲဏံ နူကဵုဂကောံပံၚ်တောဲဌာနစုၚ်တံ ဒစးဒုၚ် အာပလေဝ်လေတ်လဝ် မဒှ်ရ။
အပ္ဍဲဗဒိုပ်ပါဲဓါတ်ဂမ္တဴတံမ္ဂး ဍာ်သုၚ်၊ သ္ၚိဝတ်၊ ယာတ်လး၊ ဂၞဳတံဂှ် ညံၚ်ဂွံစွံကဵုလဝ်ကီု ညံၚ်ဂွံသုၚ်စောဲ ပါန်ကာမာန်ဂှ် စဳဇန်လဝ်ကီုတုဲ ပ္ဍဲကဵုဗဒိုပ်မွဲမွဲ သွက်မၞိဟ်ယဲကာမံက်တိုန် ညံၚ်ဂွံစွံလဝ် ခါတ်ရုၚ်ဂဥုဲ ၜါၜါမဂှ် ကဵုလဝ်စၞောန်ပ္ညုၚ်ရ။
တုဲပၠန် ပ္ဍဲကဵုရုၚ်ဂဥုဲ သွက်မၞိဟ်ယဲဂတဴလုပ်အာ Heat Stroke တံ ညံၚ်ဂွံစဳဇန်ကဵုလဝ် ခါတ်ရုၚ်ဂဥုဲကဵုဂဥုဲဇဗတံကီု ကဵုလဝ်စၞောန်ပ္ညုၚ်ရောၚ် သ္ဂးရ။
သွက်ဂွံတတ်ကၠောံအာ ဥတုရာသဳ အေလ်နဳညိုဏံမာန်ဂှ် ညးဍုၚ်ကွာန်တံ သွက်ဂွံပကောံစွံလဝ် ဍာ်ကဵုဇွောံမတံဂှ် သမ္မတခါန်ကၞက်ကေတ်တ် ဥူမေန်အံၚ်လှိုၚ် ကဵုလဝ်စၞောန်ပ္ညုၚ် ပ္ဍဲကဵုကောံဓရီု ပရေၚ်တောတက်ဖောအ်ဗြဳ ရးနိဂီုဍုၚ် ကၠောန်လဝ် အံက်တဝ်ပါ ၅ ဂှ်ရ။
သွက်ဂွံစဵုဒၞာဘဲအန္တရာဲ အေလ်နဳညိုဏံမာန်ဂှ် ညံၚ်ဂွံထိၚ်ဒဝ် သုၚ်စောဲအာ ဍာ်သုၚ်၊ ဍာ်သွက်တဵုလွဳတံညိ၊ ညံၚ်ဂွံပံက်စွံဗဒိုပ်ပါဲဓါတ်ဂမ္တဴကီု ပ္ဍဲဍာ်ကၟိုန် အၚ်လှာတံ ညံၚ်ပကောံဒေပ်စွံလဝ် ဍာ်တံကီု စၞစဇွောံမသတ်ဆုသတ်ဒုန် စဍာ်ဇမၠိၚ်ဂွံတံဂှ် ပကောံစွံလဝ်ညိကီု ကဵုလဝ်စၞောန်ရ။
ဟိုတ်နူ ပရေၚ်သူပါအေလ်နဳညို ဇြဟတ်ဇၞော်ဇၞော်တံဂှ် ဒးဂဗဆဵုအာကဵုဘဲအန္တရာဲ ဓါတ်ဂမ္တဴသၠုၚ်ၚ်တံမာန်တုဲ လၟိဟ်မၞိဟ် နကဵုကိုတ်တံ ချိုတ်အာမာန်ရောၚ် တၠပညာဥတုရာသဳ ဗြဲကျာဂၠးကဝ်တံ တော်ဆလဝ်ရောၚ်။
ပရေၚ်သူပါအေလ်နဳညိုဂှ် ပ္ဍဲဂိတုနဝ်ဝေမ်ပါကဵု ဒဳဇြမ်ဗာ သၞာံ ၂၀၂၆ ဏံ အကာဲအရာသၠုၚ်အိုတ် စိုပ်အာမာန်တုဲ ဇီုကပိုက်အာ ဒဵုကဵုဂိတုဖေဖဝ်ဝါရဳ သၞာံ ၂၀၂၇ တေံမာန်ရောၚ် သ္ၚဳဂၠိပ်လဝ်ရ။
ပရိုၚ်-သြၚ်လောန်တိုၚ်မ်
Photo – CJ