တိုင်ပေ၊ အံက်တဝ်ပါ ၁၃
ပ္ဍဲအကြာသတ္တဟလၟုဟ်ဏံ နူကဵုကြုက် ပန်မံၚ်ပရေၚ်ခန်လ္ၚတ် လဝေၚ်ပၞာန် နတဲ ပ္ဍဲဇရေၚ်ပြၚ်ၜဳတံဂှ် မၚ်ရံၚ်မံၚ်ကြပ်ပ်ဂှ် ဝန်ဇၞော်ပရေၚ်စဵုဒၞာ ထာဲဝါန် ဝါလေန်တာန်ကူ ဟီုရ။
နူကဵုၜဳကြုက်သၠုၚ်ကျာတေံ စဵုကဵုစိုပ်ကၞောတ်ဒိုဟ်ဧသာန် တွဵုရးလျံၚ်အိုနေၚ် အပ္ဍဲဒေသ ၅ ဒၞာဲဂှ် စက်ယန်ဍာ်တံ ဟွံကဵုအာကၠုၚ်ပုဟ် တၚ်ကဵုသတိမွဲတၚ်ဂှ် နူကဵုဌာနပရေၚ်အုပ်ဓုပ်ပကၚ်ရၚ် ပရေၚ်ဂီုကၠီုကြုက်တံ လလောၚ်တြးလဝ်ရ။
အပ္ဍဲကဵု တၚ်ကဵုသတိဏံ ဒေသထာဲဝါန် မွဲဒမြိပ်တံပါမံၚ်ဂှ် ဟွံဆဵုပုဟ်။
ဒေသကြပ်အိုတ်ကဵုထာဲဝါန်မွဲဂှ် ဒှ်ဗလးဍာ် ၜက်အာတွဵုရးကျဳကျာန်ဗၟံက်ရ။
ပရေၚ်ခန်လ္ၚတ်လဝေၚ်ပၞာန်ဏံ လအ်ပွိုၚ်မွဲသတ္တဟရောၚ် ဂွံတီလဝ် အတိုၚ်တၚ်လလောၚ်တြးဂှ်ရ။
ပန်မံၚ်ပရေၚ်ခန်လ္ၚတ်လဝေၚ်ပၞာန်နတဲဏံ နူကဵုဒပ်လွဟ်ဇၞော် ဆက်စပ်မံၚ်ကဵု ဇိုၚ်ပြၚ်ၜဳတံ ကၠောန်မံၚ်ရောၚ် ဝန်ဇၞော် ဝါလေန်တာန် ဟီုလဝ် ပ္ဍဲစၠတ်ထဝ်ရ။
ဆဂး ပရေၚ်ကေတ်ကၠာတဲ လ္တူသၞ ဒဂေတ်ဗက်အာ အတိုၚ်မူဇကုတံတုဲ ပန်လွဟ်ကီုဒှ် ခန်လ္ၚတ်ပရေၚ်ပၞာန်ကီုဒှ် ပရေၚ်ချဳဒရာၚ်ညးတံဂှ် မၚ်ရံၚ်အာမံၚ်ကြပ်ပ်ရောၚ် သ္ဂးရ။
ပ္ဍဲအံက်တဝ်ပါ ၁၀ သမ္မတလိုၚ်ချေၚ်တဳ ဟီုလဝ်ဂလာန် တ္ၚဲကောန်ဂကူဂှ် ပရေၚ်ၜိုဟ်လလမ် ထာဲဝါန်ဂှ် စွံၚုဟ်မးကီုလေဝ် ထောံကၠေံအာ ပရေၚ်သၠးပွးဇကုတံ ဟွံသေၚ်ပုဟ် ဟီုလဝ်ရ။
ကြုက်ဂှ် ညာတ်လဝ်ထာဲဝါန် ဍုၚ်ညးတံပိုၚ်ပြဳတုဲ ပရေၚ်သမ္မတ လိုၚ်ဟီုဂးမံၚ်တံဂှ် နူကြုက် ပျုတ်ဗဒေက်ဟီုစုတ်မံၚ်လၟိုန်ရ။
လ္တူသမ္မတလိုၚ်ဂှ် ကြုက်တံညာတ်လဝ် ညးပါ်တိတ်တုဲ ပရေၚ်ကော်ဘိက်တက်ကျာသဳကၠဳတံဂှ် ကြုက်တံ တးပါးထောံ အလန်ဂၠိုၚ်ကဵုဝါရ။
စပ်ကဵု ပရေၚ်ခန်လ္ၚတ်လဝေၚ်ပၞာန်ဏံ အရေဝ်သမ္မတလိုၚ် ဟီုမံၚ်တံဂှ် ပရေၚ်ဆက်စပ်ဟွံမွဲပုဟ် ကြုက်ဟီုမံၚ်ကီုလေဝ် ပ္ဍဲကဵုအံက်တဝ်ပါ ၁၁ သမ္မတထာဲဝါန်ဂှ် ဇၞော်သၠဲလဝ်အန္တရာဲကြုက် ဒက်ပတန်ဇြဟတ်တုဲ ဂစာန်ကေတ်မံၚ် သၠးပွးရောၚ် ဝန်ဇၞော်ပရေၚ်စဵုဒၞာကြုက်ဟီုသ္ဂးရ။
အလုံမွဲပွူဍုၚ်ထာဲဝါန်ဂှ် နူကဵုဒပ်ပၞာန်ဗၠးၜးညးဍုၚ်ကွာန်ကြုက်တံ ကၠောန်မံၚ် ပရေၚ်ခန်လ္ၚတ်လဝေၚ်ပၞာန် အတိုၚ်လၟေၚ်ဍာံဟီုဂှ် ရန်တၟံ သွက်ဂွံဒၞာတာလဝ် ပရေၚ်ထာဲဝါန် ဂစာန်ကေတ်သၠးပွးမဒှ်တုဲ သွက်ဂွံမၚ်မွဲစဵုဒၞာအာ သွက်ကောန်ဍုၚ်ထာဲဝါန်တံ ဂွံခိုဟ်စတုဲ ဒှ်မံၚ်ပရေၚ်လုပ်သၞောဝ်ဖအိုတ်ရောၚ် ကြုက်ဟီုရ။
နူကဵုဒပ်ပၞာန်ကြုက် ချဳဒရာၚ်အာကၠုၚ်မံၚ် အကြာပွဳဗွိုၚ်ထာဲဝါန် ကြပ်အရိုဟ်တ္ၚဲကီုလေဝ် ဗီုကဵုကၞောတ်ဂိတုဒဳဇြမ်ပါတေံ ပရေၚ်ခန်လ္ၚတ်လဝေၚ်ပၞာန်ပေၚ်ၚ်ဂှ် ကၠောန်လဝ်ဟွံမွဲဏီပုဟ်။
Ref:Reuters