မတ်မလီု ၊ အံက်တဝ်ပါ ၁၆
အပ္ဍဲတွဵုရးမန် ဍုၚ်ဇၞော်မဟာမတ်မလီု နူကဵုဌာနဗဂဵုလဟဵု ပရေၚ်သာယာတံ သွက်ဂွံသီဂိုၚ်ဟမိက်ဂှ် ကၠောန်ကဵုကမၠောန်ပေၚ်ၚ်ဟွံမာန်တုဲ တၠကမၠောန်ပရေၚ်ပိုန်ဒြပ်တံ ကၠုၚ်လုပ်ဓလိုက်တမ်ရိုဟ်ညိဂှ် နူကဵုအလဵုအသဳပၞာန် ကော်ဘိက်ဏာရ။
ပရေၚ်ကမၠောန်ရေၚ်တၠုၚ် သီဂိုၚ်ဟမိက်တံဂှ် ဒးကၠောန်အာ အကြာအရာပ် လ္တူဍုၚ်မတ်မလီုတံဒှ်တုဲ ပရေၚ်ကမၠောန် သီဂိုၚ်ဟမိက်တံဂှ် ဇကုတံဒးပတိတ်ကေတ်တမ်ရိုဟ်တုဲ ဒးဖန်ဖက်ကၠောန်အာရောၚ် သ္ဂးရ။
နကဵုပရေၚ်ဓလိုက်တမ်ရိုဟ်ဇကု တၠကမၠောန်၊ ကာန်ပနဳ သွက်ကောန်ဍုၚ်ဗမာစိုတ်လုပ်စတံဂှ် စနူကဵုအံက်တဝ်ပါ ၁၆ စဵုစိုပ်အံက်တဝ်ပါ ၃၀ သွံအာကဵု လိက်ဂမြၚ်ပတီအာတ်မိက် ပရေၚ်စိုတ်လုပ်စ ရဂှ် လလောၚ်ပတိတ်လဝ်ပရိုၚ်ရ။
တၞးလိက်ဂမြၚ်ပတီအာတ်မိက်ဏံဂှ် မွဲတၠ နကဵု ၅၀၀၀၀ ဒကေဝ် ဒးရာန်ကေတ်တုဲ စိုပ်ဂိတုနဝ်ဗေမ်ပါ ၁၂ တေံ စွံလက်ကရဴအိုတ် ဒးပတိုန်ထၜးရောၚ် လလောၚ်တြးလဝ်ရ။
သွက်ကာန်ပနဳ လုပ်ပြိုၚ်တံ ဂွံတီထေက် ကဵုလဝ်တၚ်နၚ် ချိုတ်တ်ပၠိုတ်တ်တံဂှ် ဟွံဟီုပတိတ် လဴထၜးကဵု သွက်ပူဂဵု၊ ဂကောံတၞဟ်ဟ်တံတုဲ တုပ်စိုတ်ပတိုန်ထၜးတုဲမှ သွံကဵုတၞးလိက်ဂမြၚ်ပတီရောၚ် သ္ဂးရ။
တၞးလိက်ဂမြၚ်ပတီ သွက်ဂွံကၠောန်အာကမၠောန် သီဂိုၚ်ဟမိက်တံ နကဵုတမ်ရိုဟ်ဇကုဂှ် ဒးအာရာန်ကေတ် ပ္ဍဲကဵုရုၚ်ဌာနဗဂဵုလဟဵုပရေၚ်သာယာ တွဵုရးမန်တုဲ အခိၚ်ပံက်ဂှ်တှ်ေ ထပ်လဴကဵုအာရောၚ် လလောၚ်ပတိတ်လဝ်ရ။
နူကဵုဌာနဗဂဵုလဟဵုပရေၚ်သာယာတံ သွက်ဂွံသီဂိုၚ်အာဟမိက်ဂှ်တှ်ေ မွဲသတ္တဟ ကၠုၚ်ၜိုတ်မွဲအလန်၊ သတ္တဟဟွံဒှ်ကၠုၚ်လေဝ်နွံတုဲ ကဵုသြန်ဆက်ဖုၚ်ကဵုညးတံမ္ဂး ကၠုၚ်ဂိုၚ်ကဵုဟမိက်ရောၚ်ဂှ် ညးမံၚ်လ္တူဍုၚ် မတ်မလီုမွဲတၠ ဟီုကဵုဌာန်ပရိုၚ် သြၚ်လောန်တိုၚ်မ်ရ။
“ပ္ဍဲပွိုၚ်မွဲသတ္တဟ ကၠုၚ်တ္ၚဲဗုဒ္ဓဝါမွဲတ္ၚဲဓဝ်။ သတ္တဟတုဲတေံ တ္ၚဲဗုဒ္ဓဝါလေဝ် ဟွံဒှ်ကၠုၚ်ပုဟ်၊ နူတနေံတေံ ကွဳစက်ဌာနဗဂဵုလဟဵု ကၠုၚ်မံၚ်မိၚ်တုဲ တ္ၚဲအကြာဂးတုဲ တ္ၚဲဗုဒ္ဓဝါဟွံဒှ်ကၠုၚ် ကၠုၚ်တ္ၚဲဗြဴဗတိဂးတုဲ အာမၚ်မံၚ်ပါၚ်ဂၠံၚ်အိုတ်။ သ္ၚိမၞိဟ်ဆက်လဝ်ဖုၚ်ကဵုဍေံတံဂှ်ရ အာ။ ပတိုန်ဏာဟမိက်ၜိုတ်နွံတုဲ ဂြိပ်တိတ်အာမွဲအသိၚ်ဟေၚ်” သာ်ဝွံ သ္ဂးရ။
တုဲပၠန် ကွဳစက်သီုဂိုၚ်ဟမိက်လ္ၚဵု ဌာနဗဂဵုလဟဵုတံ သ္ၚိကဵုလဝ်သြန် ကဵုဍေံတံဂှ်ရ ဍေံဗက်သီဂိုၚ်ကဵုတုဲ သ္ရိသှ်ေမံၚ်တံဂှ်တှ်ေ ထၜးဟိုတ် ပေၚ်အာကွဳစက်ယျ ဗက်သီဂိုၚ်ကဵုဟွံဂွံရပုဟ် ညးဆက်ဟီုရ။
ပရေၚ်သီဂိုၚ်ဟမိက် ပ္ဍဲကဵုဍုၚ်မတ်မလီုဂှ် ကွဳစက်ဂိုၚ်ဟမိက် နွံမံၚ် ၂၂ မ၊ သၟာကမၠောန် သီဂိုၚ်ဟမိက် ၁၅၁ ကၠောန်မံၚ်ဂှ် ကွဳစက်သီဟမိက် လီုမံၚ် ၆ မနွံရောၚ် နူဂကောံဗဂဵုလဟဵုပရေၚ်သာယာ ဍုၚ်မတ်မလီု အခိၚ်ဆဵုဂဗလဝ်ကဵု ညးဍုၚ်ကွာန်တံ ပ္ဍဲဂိတုမေဂှ် ဟီုလဝ်ရ။
ပ္ဍဲဍုၚ်မတ်မလီု အတိုၚ်ကံက်လဝ်စရၚ်သ္ၚိ လၟိဟ်မၞိဟ် ပ္ဍဲသၞာံ ၂၀၂၄ တေံမ္ဂး လၟိဟ်မၞိဟ်နွံမံၚ်ၜိုတ်ပွဳဗွိုၚ် ၃ ကိုတ်တုဲ တော်ဆအာကဵု သၟာကမၠောန်သီဂိုၚ်ဟမိက်တံမ္ဂး သၟာကမၠောန်ပရေၚ်ဗဂဵုလဟဵု မွဲတၠဂှ် ဒးကပှ်ဂိုၚ်သီကေတ်ဟမိက် သွက်မၞိဟ် ၂၀၀၀ ပြၚ် မဒှ်ရ။
ပရိုၚ်-သြၚ်လောန်တိုၚ်မ်
Photo – CJ