လေဝ်ကေကဝ်၊ မေ (၃၀)
ပ္ဍဲတိဍာ်ထိၚ်ဒဝ် ဒပ်မဟာ (၆) KNU လ္ပာ်ဒေသလေဝ်ကေကဝ်ဂှ် ဒပ်မၚ်ပယျဵု ဗဳဂျဳအေဖ် သၟဝ်တဲကံၚ်ဇြဳပၞာန်တံ ဟိုတ်နူလုပ်စိုပ်ချဳဒရာၚ်ကၠုၚ် ပရေၚ်ပၞာန်ဂှ်ရ ပေါဲဗ္တိုက်ဂမၠိုၚ် ထပ်က္တဵုဒှ်ကၠုၚ်မာန်ရောၚ် ညးမၞုံအခေါၚ်ဟီုဂး ကရောၚ်ပၞာန်ကဝ်ဗရာ ဂကောံပံၚ်ကောံ ကေအေန်အေဝ်အေ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူတ္ၚဲတုဲကၠုၚ်အကြာတံဏံတုဲ ဒပ် ဗဳဂျဳအေဖ် တံဝွံ သၠဲပ္တိုန်ကၠုၚ် ဇြဟတ်ဒပ် လ္ပာ်မာထဝ်လေဝ်၊ ထဳမာဝါခဳ၊ ဖလူ ကေုာံ လ္ပာ်လေဝ်ကေကဝ်ဂှ်တုဲ ဗ္ဒိုပ်တေအ်ဗဝ်ဖိုဝ် (သေ့ဘောဘိုး) မဒးဒုၚ်သီလဝ်ကဵု ဂကောံပံၚ်ကောံ ကေအေန်အေဝ်အေဂှ် သွက်ဂွံကလေၚ်သီကေတ် မွဲကရောံကံၚ်ဇြဳပၞာန်တံတုဲ သၠဲပ္တိုန်လဝ်ဇြဟတ်ရ။
နကဵုဂကောံပံၚ်ကောံ ကေအေန်အေဝ်အေ ဂွံမိၚ်ကေတ် ပွမချဳဒရာၚ်ပရေၚ်ပၞာန် ဒပ်မၚ်ပယျဵု ဗဳဂျဳအေဖ်တံတုဲ ဇြဟတ်ဂလိုၚ်လဵုပါဟီုဂှ် ဂွံဟီုဝါတ်ကီုလေဝ် စွံသတိဇၞော်ဇၞော်တဲု ကၠောန်ၜိုတ်ရေၚ်တၠုၚ်ဒၟံၚ်ရဂှ် ညးမၞုံအခေါၚ်ဟီုဂး ကရောၚ်ပၞာန်ကဝ်ဗရာ ဟီုလဝ် သာ်ဏံရ။
“ပွမချဳဒရာၚ်ပရေၚ်ပၞာန် လ္ပာ်ဍေံတံဂှ် နွံဒၟံၚ်လၟေၚ်ၚ်ရ၊ ဗွဲတၟေၚ် ပွမသၠဲပ္တိုန်ပရေၚ်ပၞာန် ဗဳဂျဳအေဖ်တံဂှ် ဂွံမိၚ်ဒၟံၚ်ရ၊ လ္ပာ်ပိုယ်တံ ပလေဝ်ပလေတ်လဝ် အိုတ်အစောန်ရ၊ လ္ပာ်ဍေံတံ တိုန်ကၠုၚ်မ္ဂး ပေါဲဗ္တိုက်ဇီုမုက်ဂှ်တှ်ေ နွံရောၚ်” သာ်ဝွံ သ္ဂးရ။
ဒပ် BGF မလုပ်စိုပ်ချဳဒရာၚ်ဒၟံၚ် ပရေၚ်ပၞာန် လ္ပာ်ဒေသလေဝ်ကေကဝ်တံဝွံ ဒပ်လၟေၚ် (၁၀၁၈) ကေုာံ လၟေၚ် (၁၀၁၉) မဒှ်တမ်ဒပ် သၟဝ်တဲ ဍုၚ်ဒပ်ဗဳဂျဳအေဖ် (၃) နူဒေသယျိုဲကုက္ကကိုဝ်တံ ပါလုပ်တုဲ ဇြဟတ်ဗၞတ် (၃၀၀) ပွဳပွူနွံဂှ် ပရိုၚ်တမ်ရိုဟ်တိဍာ်တံ ဟီုရ။
ဒပ်ဗဳဂျဳအေဖ်တံဏံဝွံ ဒှ်ဒပ်လုပ်စိုပ်ချဳဒရာၚ်ဒၟံၚ်ပရေၚ်ပၞာန် အပ္ဍဲခရိုၚ်ဘာပန် ဒပ်မဟာ (၅) တံတုဲ တုဲကၠုၚ် ဂိတုမေ (၉) ဂှ် ကလေၚ်ရုပ်သီဆုတ်ကလေၚ်အာ နူကဵုဘာပန်တုဲ ကုဒေသလေဝ်ကေကဝ် ဒပ်မဟာ (၆) ဂှ် အပ္ဍဲအကြာတ္ၚဲတံဏံ လုပ်စိုပ်ချဳဒရာၚ်ကၠုၚ်ဒၟံၚ်ပရေၚ်ပၞာန်တံအိုတ်ရ။
ကံၚ်ဇြဳပၞာန်ဝွံ သွက်ဂွံကလေၚ်သီကေတ် ဗ္ဒိုပ်ဒပ်တေအ်ဗဝ်ဖိုဝ် မာန်ဂှ် သၠဲပ္တိုန်လဝ် ဇြဟတ်ဒပ်တုဲ ပွမကၠုၚ်စိုပ်ထံၚ်ပရိုၚ် နကဵုက္ၜၚ်ကျာအထံက်ကၚ်တံ နွံဒၟံၚ်ရောၚ်ဂှ် ညးဒေသတံ ဟီုရ။
ဗ္ဒိုပ်ဒပ်တေအ်ဗဝ်ဖိုဝ် ကံၚ်ဇြဳပၞာန်ဝွံ တုဲကၠုၚ်ဂိတုမေ (၁၈) တေံဂှ် ဒးဒုၚ်ဗ္တိုက်သီလဝ်ကဵု ဂကောံဒပ်ပံၚ်ကောံ ကေအေန်အေဝ်အေတံတုဲ လ္ပာ်ကံၚ်ဇြဳပၞာန် ဒုသ္ကိုပ်တမ်ဒပ် မပါလုပ် (၇) တၠ ချိုတ်အာလဝ်တုဲ ကုလွဟ်လက်နက်မကမ် ဗွဲမဂၠိုၚ်ဂၠေၚ်ဂှ်လေဝ် ဂကောံဒပ်ပံၚ်ကောံတံ သီဂိုၚ်ဂွံလဝ်ရ။
ပရိုၚ်−သြၚ်လောန်တိုၚ်(မ်)