မတ်မလီု၊ ဂျောန် (၂)
ပ္ဍဲတွဵုရးဍုၚ်မန် အပ္ဍဲကာလဒပ်ပၞာန်သီအဝဵု ပွိုၚ်မွဲသၞာံပြၚ်ဂှ် ဟိုတ်နူစရိတ်အိုတ် ပွကၠောန်ပ္တိတ်တံ သၠုၚ်တိုန်ကၠုၚ် ဂၠိုၚ်ကဵုဆဂှ်ရ ကဏ္ဍဗၞိက်ကၠောန်ပ္တိတ် ထပ်တုဲ ဒးဆေၚ်ဒၟံၚ်မုက်ကဵု အကာဲအရာပရေံအိုတ်ရဂှ် တၠကမၠောန်ဗၞိက်မကၠောန်ပ္တိတ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကမၠောန်ဗၞိက်ကၠောန်ပ္တိတ်တံဝွံ အပ္ဍဲကာလဒပ်ပၞာန်သီအဝဵုဂှ် ၚုဟ်ဗၞိက်အပြောံ ကေုာံ ၚုဟ်ကပေါတ်ဗၞိက် ဇြဟတ်ပၠောပ်တံ ဇၞော်သၠုၚ်ကၠုၚ်ကီု၊ ပၟတ်ဓာတ်လလဳ ဟွံမှာန်ကီု ကေုာံ ၚုဟ်ကၠေၚ်စက် သၠုၚ်တိုန် အဆက်က်ဂှ်ရ ကမၠောန်သွက်ဂွံဂေတ်ဂြိပ်ဂှ် သာတုဲ ဒးဂဗဒၟံၚ် ဒဒိုက်နာနာသာ်ရ။
အခိၚ်လၟုဟ်ဂှ် တၠကမၠောန် ဗၞိက်ကၠောန်ပ္တိတ်တံဝွံ သွက်ဂွံကၠောန်ပ္တိတ် ကပေါတ်ဗၞိက်မွဲမွဲဂှ် သာတုဲဒးသုၚ်စောဲကၠုၚ် ခရိတ်အိုတ် ပွမကၠောန်ပ္တိတ် လ္တူနူကၠာတေံ ဗ္ဒါဲ (၃၀) တၟံကၠံရ။
စပ်ကဵုအကာဲအရာဏံတုဲ တၠကမၠောန်ဗၞိက်ကၠောန်ပ္တိတ်မွဲတၠ ဟီုလဝ် သာ်ဏံရ။
“ပိုယ်တံဂှ် ပၟတ်ကၠုၚ် လၟေၚ်ၚ်ရတှ်ေ ဂွံဂေတ်ဂြိပ် ၜိုဟ်ဟ်သြိုဟ်ဟ်ရ၊ စက်ပၟတ်ပိုယ်တံဂှ် ဒဳၜိုတ် 8 kb မှ ဂွံဟီုတှ်ေ ပၟတ်ဟွံကၠုၚ်မ္ဂး မွဲမွဲတ္ၚဲ ကၠေၚ်ဂှ်လေဝ် ဒှ်အာ မွဲလဳတာ ဗ္ဒါဲ (၂၅၀၀) ယျတုဲ ခရိတ်ကၠေၚ်စက်ပၟတ်သၟးဂှ် ဒတုံအာ ဗဒါဲ (၄၅၀၀၀) (၅၀၀၀၀) ဒ္ကေဝ်ရ၊ ၜိုတ် (၃၀) တၟံကၠံဂှ် ခရိတ်အိုတ် သာတုဲအိုတ်ဒၟံၚ်ရ၊ လ္ၚဵုဂှ် ဒးစေက်နူကဵုဇကုတုဲ ဒးကၠောန်ဒၟံၚ်ဏီမုဏီဂှ် တၟော်ဟွံကိတ်တုဲ လ္ၚဵုဟွံပြေပြံၚ်တိုန် ညိညမ္ဂး မၞိဟ်ဒးဒေါအ်ထောံလေဝ် နွံရ” သာ်ဝွံ သ္ဂးရ။
မွဲလ္ပာ်ဂှ်ပၠန် တၠကမၠောန်ဗၞိက်ကၠောန်ပ္တိတ်တံဝွံ မ္ၚးနူစရိတ်အိုတ် ပွကၠောန်ပ္တိတ်တံ သာတုဲ အိုတ်ကၠုၚ်ဂှ် ဟိုတ်နူညးမပ္အပ်ကမၠောန်တံ အောန်ကြဳစှ်ေကၠုၚ်တုဲ ဖအောန်ဖျေံကၠုၚ် ကမၠောန်ကဝက်ပြၚ်အိုတ်ကီု ကမၠောန်လ္ၚဵုတံ ဒးဒေါအ်ဇူကၠုၚ်အိုတ်ရ။
တၠကမၠောန် ပရေၚ်ပိုန်ဒြပ်မွဲတၠဂှ် ဟိုတ်နူစရိတ်အိုတ် ပွကၠောန်ပ္တိတ်တံ ဇၞော်သၠုၚ်ဒၟံၚ်တုဲ ကမၠောန်ဗွဲမဂၠိုၚ် ဒးဆေၚ်ဒၟံၚ်မုက်ကဵု ကျဟောံဗြံတုဲ သွက်ဂွံကလေၚ်ဂွံ ၜိုတ်စရိတ်ကောန်ကမၠောန်တံဂှ် ဒးဂ္စါန်ဒၟံၚ် တၟာလှ်ေရဂှ် ဟီုရ။
“ကျဟောံ သီုဖအိုတ်ရ၊ ကျဟောံဟီုဂှ် မိက်ဂွံသ္ဂး ကမၠောန်သီုဖအိုတ် ဟွံသေၚ်ပုဟ်၊ ဗွဲမဂၠိုၚ်ဂှ် သ္ဂောံဂွံစရိတ်ကောန်ကမၠောန်၊ မွဲပၠန်ဂှ် ကမၠောန်မကၠောန်ကၠုၚ် အစေန်အဆက်တံဂှ် သံယောဇိုန်နွံတုဲ ထိၚ်တုဲ ခိုဟ်ကၠုၚ်မ္ဂး သ္ၚဳအာ ကၠောန်အာ ဗီုပြၚ်တံဏံရ၊ သ္ဇက်ဒးတဵုနွံဂှ် တဵုထောံညိညဏောၚ်၊ သွက်ကောန်ကမၠောန်တံဂှ်် အခက်အခုဲနွံမ္ဂးလေဝ် ကောန်ကမၠောန်တံ ပြေပြံၚ်အာ ၜိုတ်ဒးရးရောၚ် မၞိဟ်ဒးအာဒၟံၚ် နကဵုအေဗီုပြၚ်တံဏံဂှ် မၞုံတဴ ဗွဲမဂၠိုၚ်ရ” သာ်ဝွံ သ္ဂးရ။
ပ္ဍဲတွဵုရးဍုၚ်မန်ဂှ် ပၞောဝ်ကဵုကမၠောန် ဗၞိက်ကၠောန်ပ္တိတ်တံဂှ် ကမၠောန်ဝါဗ္ၚ၊ ကမၠောန်ဍာ်၊ ကမၠောန်တၟံ၊ ကမၠောန်ဇိၚ်ဂၠိက်ယာတ် ကေုာံ ကမၠောန်ကၠောန်ပ္တိတ် ကပေါတ်အရပ်စပ်မၞိဟ်တံဝွံ ဒးဒုၚ်စသိုၚ်ဒၟံၚ် ဘဲဒဏ်ဒပ်ပၞာန်သီအဝဵု ဗွဲမဇၞော်ကဵုဇြဟတ်ရ။
အတိုၚ်ဂလာန် တၠကမၠောန်ဗၞိက်ကၠောန်ပ္တိတ်တံဂှ်မ္ဂး ကပေါတ်ဗၞိက် ဇြဟတ်ပၠောပ်တံ ၚုဟ်စှ်ေကၠုၚ် ဟွံမွဲမ္ဂး ကဏ္ဍပွကၠောန်ပ္တိတ် က္တဵုဒှ်ကၠုၚ် စဵုကဵုအကာဲအရာသရိုဟ်စှ်ေမာန်ရောၚ်ဂှ် သ္ဂးအိုတ်ရ။
တွဵုရးဍုၚ်မန်ဝွံ အပ္ဍဲကာလဒပ်ပၞာန်သီအဝဵု ပွိုၚ်မွဲသၞာံပြၚ်ဂှ် လ္တူ (၄၀)တၟံကၠံဟွံအောန် ဒးဆေၚ်ဒၟံၚ်မုက်ကဵု အကာဲအရာ ပရေၚ်ပိုန်ဒြပ် ဍောတ်ကြေန်အာတံရ။
ပရိုၚ်−သြၚ်လောန်တိုၚ်(မ်)