မြဝတဳ၊ ဂျောန် (၆)
နကဵုသၞောတ် MOU လိက်ကသုက်တုပ်စိုတ် သေံ−ဗၟာၜါဍုၚ်ဂှ် ဗလးဏာလဝ် ကောန်ကမၠောန်ဆုဲပြံၚ်ကၟိန်ဍုၚ်ဗၟာ ပ္ဍဲကၟိန်ဍုၚ်သေံ (၂၅၀၀) ပြၚ်ရဂှ် သၞာဲဒဴနူရုၚ်ကလုတ်တမာန် သၟာကမၠောန် ကံၚ်ဇြဳပၞာန် လလောၚ်ပ္တိတ်လဝ်ရ။
ပပ္တံနူ ဂိတုမေ စၟတ်တ္ၚဲ (၁၀) တုဲကၠုၚ်တေံတုဲ နကဵုသၞောတ် MOU ကုကောန်ကမၠောန်ဆုဲပြံၚ်ဗၟာတံဂှ် နူကဵုပါၚ်တြၚ်လုပ်တိတ်ပယျဵု ဒဒန်ပရေၚ်ဆာန်ကၟိန် လၟိဟ် (၂) မြဝတဳ−မာဲချံက် ပ္ဍဲကၟိန်ဍုၚ်သေံဂှ် စဗလးကၠုၚ်လဝ်တုဲ အတိုၚ်စရၚ် စဵုကဵု ဂိတုဂျောန် (၂) ဂှ်မ္ဂး ဗလးဏာလဝ် ကောန်ကမၠောန် MOU (၂၅၀၀) ပြၚ်ရဂှ် သ္ဂးရ။
နူကဵုပါၚ်တြၚ်လုပ်တိတ်ပယျဵု ဒဒန်ပရေၚ်ဆာန်ကၟိန် လၟိဟ် (၂) မြဝတဳ−မာဲချံက် ကေုာံ ပါၚ်တြၚ်လုပ်တိတ်ပယျဵု ကအ်သံၚ်−ရနံၚ်တံ မွဲကဆံၚ် နကဵုသၞောတ် MOU ဗလးလဝ် ကောန်ကမၠောန်ကၟိန်ဍုၚ်ဗၟာတုဲ ပ္ဍဲပါၚ်တြၚ်လုပ်တိတ်ပယျဵု မြဝတဳ−မာဲချံက်ဂှ် ဗလးဏာလဝ် ကောန်ကမၠောန် MOU ဂၠိုၚ်အိုတ်ရ။
ပ္ဍဲပါၚ်တြၚ်လုပ်တိတ်ပယျဵု ဒဒန်ပရေၚ်ဆာန်ကၟိန် လၟိဟ် (၂) မြဝတဳ−မာဲချံက်ဂှ် ကောန်ကမၠောန် MOU (၂၄၁၉) တၠ ကေုာံ ပ္ဍဲပါၚ်တြၚ်လုပ်တိတ်ပယျဵု ကအ်သံၚ်−ရနံၚ်ဂှ် ကောန်ကမၠောန် MOU (၁၁၀) တၠ ဗလးဏာလဝ် ပ္ဍဲကုမ္ပဏဳ၊ ရုၚ်ကမၠောန် အပ္ဍဲဍုၚ်သေံတေံမာန်ဂှ် ရုၚ်ကလုတ်တမာန်သၟာကမၠောန် ကံၚ်ဇြဳပၞာန် ထ္မံက်ထ္ၜးလဝ် ပ္ဍဲတၚ်လလောၚ်တြး ဂိတုဂျောန် (၂) တေံရ။
နူကဵုပါၚ်တြၚ်လုပ်တိတ်ပယျဵု ၜါကၟိန်ဍုၚ်ဂှ် ဗလးဒၟံၚ် ကောန်ကမၠောန် MOU ဗွဲမလုပ်သၞောဝ်ကီုလေဝ် မွဲလ္ပာ်ဂှ်ပၠန် ပ္ဍဲမွဲဒမြိပ်ပယျဵုသေံ−ဗၟာဂှ် ပွမတတ်ကၠောံပယျဵု ဟွံလုပ်သၞောဝ် ကောန်ကမၠောန်ဆုဲပြံၚ်ဗၟာတံဂှ် ဂၠိုၚ်ဂၠေၚ်ဒၟံၚ်ဖိုဟ်ရ။
အပ္ဍဲဂိတုမေ တုဲကၠုၚ်တေံဂှ် လၟိဟ်ဂၞန် ကောန်ကမၠောန်ဗၟာ မလုပ်စိုပ်ကၠုၚ် ဟွံလုပ်သၞောဝ် ဗဒါဲ (၁၀,၀၀၀) နွံဂှ် ဂွံတီကေတ် နူကဵုလိက်ဒုၚ်စဳရေၚ် ဒပ်မၚ်ပယျဵုသေံရ။
ပ္ဍဲလၟေၚ်ကမၠောန် မလုပ်စိုပ်ကၠုၚ် နူကဵုဂၠံၚ်တရဴ မလုပ်သၞောဝ် နကဵုသၞောတ် MOU ဂှ် ပွမလအ်လတံ နွံဒၟံၚ်တုဲ ကောန်ကမၠောန်ဆုဲပြံၚ်ဗၟာတံဝွံ သာတုဲရုဲစှ်ကၠုၚ် ပွမလုပ်စိုပ်တတ်ကၠောံပယျဵု နကဵုဂၠံၚ်တရဴ ဟွံလုပ်သၞောဝ်တံရဂှ် ဂကောံရေၚ်တၠုၚ်ကဵုဒၟံၚ် ပရေၚ်သၟာကမၠောန်ဆုဲပြံၚ်တံ သ္ဂးအိုတ်ရ။
ပရိုၚ်−သြၚ်လောန်တိုၚ်(မ်)