ကျာ်ထဝ်၊ ဂျောန် (၆)
စကာနဲကဲစုၚ်ဇဳတုဲ ၜိုန်ရဗ္တိုက်ပ္တိတ်ဒၟံၚ် ကံၚ်ဇြဳပၞာန်သီအဝဵုကီုလေဝ် ကုဘာဗ္တောန်လိက်တံဂှ် ဗ္တိုဟ်မာၚ်ဗ္တိုက်အာ ဟွံသေၚ်ပုဟ်ဂှ် ဂကောံဇြဟတ်ပၠန်ဂတးကျာ်ထဝ် KRF လလောၚ်တြးလဝ် ပ္ဍဲဂိတုဂျောန် (၃) တေံရ။
ဂကောံအုပ်ဓုပ် ကံၚ်ဇြဳပၞာန် ပွိုၚ်ဍုၚ်ကျာ်ထဝ်ဂှ် တုဲကၠုၚ်ဂိတုဂျောန် (၂) ဂှ် ကော်ကောံဓရီု အ္စာၝောံ Non CDM တံတုဲ အပ္ဍဲမွဲသတ္တာဟ PDF တံ ဟိုတ်နူဖန်ဇန်ဒၟံၚ် သွက်ဂွံကၠောန်ပရေၚ်ဖံက်ဗ္တိုဟ် ဘာဗ္တောန်လိက်တံဂှ်ရ သွက်ဂွံရေၚ်တၠုၚ် ပရေၚ်ဂီုကၠီု အလဵုဇကုတံ ကေုာံ နွံပၟိက်မ္ဂး အာတ်မိက်အရီုဗၚ် ဒပ်ပၞာန်မာန်ဂှ် တြးကၠုၚ်ဝါဒ ဟွံဍာံဟွံဇေတ်သာ်ဏံရဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ပြဝကမၠောန်သာ်ဏံတံဂှ်ဝွံ ကံၚ်ဇြဳပၞာန် ပါ်ထ္ကးဆီ အကြာဂကောံဇြဟတ်ပၠန်ဂတး ကဵု ညးဍုၚ်ကွာန်တံတုဲ နကဵုဂကောံဇြဟတ်ပၠန်ဂတး စကာအာ နဲကဲမယုတ်မာၚံက်စၞာဲတံ ဟွံသေၚ်ပုဟ်ဂှ် ဂကောံဇြဟတ်ပၠန်ဂတးကျာ်ထဝ် KRF လလောၚ်ပ္တိတ်လဝ်ရ။
ဂကောံဇြဟတ်ပၠန်ဂတးတံဝွံ ဟိုတ်နူစဵုဒၞါကဵုဒၟံၚ် လမျီုဒြပ်ရတ်ညးဍုၚ်ကွာန်တံတုဲ ဘာဗ္တောန်လိက်တံဂှ် ဗ္တိုဟ်ဗုမ် ဗ္တိုက်အာ ဟွံသေၚ်တုဲ လ္ပာ်ကံၚ်ဇြဳပၞာန် လ္တူကိစ္စ မပါ်ထ္ကးကၠုၚ်ဆီတံဂှ် သွက်ဂွံစွံကဵုသတိဗွဲတၟေၚ်ဂှ် လျိုၚ်ဂကောံဇြဟတ်ပၠန်ဂတး ကျာ်ထတ် KRF မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲပၠန် နကဵုညးဍုၚ်ကွာန်တံလေဝ် ကုဘာဗ္တောန်လိက် ကောန်ၚာ်သၟတ် ဟွံမွဲကဵုဒုဟ်ဒဏ်တံ မၞုံဒၟံၚ်ဂှ် ဒုၚ်ယၟု PDF တုဲ ကၠောန်ကၠုၚ် ပွဖံက်ဗ္တိုဟ်တံဂှ်မ္ဂး ၜိုတ်မာန်ကဵုမာန် ဘိုၚ်ထ္မံက်ပ္တိတ်ရီုဗၚ်ကဵုအိုတ်ဂှ် ဂကောံဇြဟတ်ပၠန်ဂတးကျာ်ထဝ် KRF ထပ်အာတ်မိက်လဝ်ရ။
ပရိုၚ်−သြၚ်လောန်တိုၚ်(မ်)