မတ်မလီု – ဒဳဇြေန်ဗာ(၁)
ပ္ဍဲကဵုပေါဲဗတိုက်ဂှ် လွဟ်လက်နက်သာမညသၟးဟွံသေၚ် သီုကပေါတ်ဓာတ်ဂျိ ဟိုတ်နူဗဂပ်စုတ်လဝ် ပ္ဍဲလွဟ်ပၞာန်တုဲ ပန်ပှော်ကၠုၚ်ဂှ်ရ ပတဝ်ကၠုၚ် ဆေၚ်ကဵုပရေၚ်ပၞာန်ကီု သီုကဵုကောန်အရာပ်ဂမၠိုၚ် ဒးချိုတ်ဂွံကၠုၚ်ဘဲဝပ်ဂှ်ရ သွက်ဂွံစဵုဒၞာ အန္တရာယ်လွဟ်ဓာတ်ဂှ် ဌာနဝန်ဇၞော် ပရေၚ်စဵုဒၞာ NUG ကဵုကၠုၚ်တၚ်သမ္တီ လလောၚ်တြးလဝ်ရ။
သၟုဟ်ဂျိ လွဟ်လက်နက်ဓာတ်ဂှ် သၟုဟ်ဓာတ်၊ ဍာ်ကေုာံ ထၞိက်ထၟိက် ဗီုပြၚ်နွံဒၟံၚ်နာနာသာ်တုဲ ကပေါတ်ဓာတ်တအ်ဂှ် ၜိုန်ရဗိုက်လတက်လဝ် ဗွိုက်လတက်ဓမ္မတာ ဗွဲမဂီုကၠီုကီုလေဝ် စဵုဒၞာကဵုမာန် ဟွံသေၚ်ရဂှ် ဟီုသ္ဂးလဝ်ရ။
လုက်စုက်ဒး၊ ယီုဒး၊ ၚိတ်ဖျေံဒး ဓာတ်ဂျိဂှ်မ္ဂး နူကဵုစၞာံဇကု၊ မတ်၊ ပၞော်ယဝီုကေုာံပါၚ်မွဲကဆံၚ် စိုပ်အာပ္ဍဲခန္ဓကာယတုဲ ဂျိတိုန်ကၠုၚ်ဂှ်ရ ဇီုကပိုက်ဒး ပရေၚ်ထတ်ယိုတ်တုဲ စဵုကဵုလမျီုဒးအိုတ်လေဝ် က္တဵုဗဒှ်ကဵုမာန်ရောၚ် ဂွံတီကေတ်ရ။
သ္အာၚ်နူဂှ်ပၠန် ယဝ်ရဂျိဓာတ်ဏံတိုန်ကၠုၚ်မ္ဂး စၞာံ၊ ပၞော်ယဝီု၊ ကသအ်၊ ကောန်ကၟံ၊ ကၠေၚ်က္ဍဟ်ကီု သီုလတေၚ်အာရီု၊ ပၞော်ထိုၚ်စၞ ကေုာံဂကောံစန်ဖျုန်ဂမၠိုၚ် ကဵုဇီုကပိုက်လီုလာ်အာလေပ်ရောၚ်ဂှ် ဓမံက်ထ္ၜးလဝ်ပ္ဍဲတၚ်လလောၚ်တြး MOD ရ။
ၜိုန်ရ ဟွံဇီုကပိုက်ဒးလဝ်ဝပ်ကီုလေဝ် ညးမၞုံလက္ချဏ်ဂျိတိုန်ကီု၊ ညးဒးဒုၚ်စသိုၚ်ဝေဒနာ ဟွံဆေၚ်ဆက်ကဵု ဝပ်ဒးလဝ်ကီု၊ ပရေၚ်ဇီုကပိုက်မမိက်ကဵုမွဲမွဲ ဟၟဲမွဲသာ် မၞိဟ်ဗွဲမဂၠိုၚ်ဒးချိုတ်အာမွဲလစုတ်ဓဝ်ကီု၊ ဂွံဆဵုကေတ် သၟူ ဍာ် သၟုဟ်ပကတိဟွံသေၚ်တုဲ ယဝ်ရထ္ၜးကၠုၚ်လက္ချဏ်ဂျိတိုန်မ္ဂး ဒုၚ်ဂိုၚ်ကေတ် ဒဒှ်ဂျိဓာတ်တိုန်မာန်ရဂှ် ကဵုလဝ်သမ္တီရ။
နကဵုညးဍုၚ်ကွာန်ဂမၠိုၚ် ဗွိုက်လတက်စဵုဒၞာဟၟဲမွဲသာ် ပွမအာစိုပ် ပ္ဍဲမွဲဗွိုၚ်လွဟ်ဓာတ်စှ်ေလဝ်ဂှ်ကီု၊ နကဵုတဲသၟး ပွမရပ်စပ်ကပေါတ်ကီု ပွမရံၚ်ဗဵု မၞိဟ်ယဲကီုဂှ် ကၠောန်သ္ပဟွံဂွံရောၚ်ဂှ် ဓမံက်ထ္ၜးလဝ် ပ္ဍဲတၚ်လလောၚ်တြး ဌာနဝန်ဇၞော် ပရေၚ်ဂီုကၠီု NUG ဂှ်ရ။
ပ္ဍဲကၟိန်ဍုၚ်နာနာဂမၠိုၚ်ဂှ် စဵုဒၞာလဝ် ပွမသုၚ်စောဲလွဟ်ဓာတ်တုဲ ညးသုၚ်စောဲဂှ် စၟတ်သမ္တီကေတ် ဒဒှ်ဂဗုတ်ဂစိုတ်ဂအုံကဵုဂအုံ ဗွဝ်ကဵုဗွဝ်တုဲ ကေတ်ကၠုၚ်အရေဝ် နကဵုပရေၚ်ပၞာန်နွံရ။
ပရိုၚ် – သြၚ်လောန်တိုၚ်(မ်)