ဂကောံဒပ်ပၞာန်သီအဝဵုဂှ် သုၚ်စောဲနဲကဲကွတ်ပညာ ကၟိန်ဍုၚ်ရုယှာတုဲ သွက်ဂွံသိုၚ်ခၞံရုၚ်စက်ဓာတ်လလဳ နျူကလဳယျာ ပ္ဍဲကၟိန်ဍုၚ်ဗၟာဂှ် ထ္ပက်လဝ်လိက်တၞး ပရေၚ်ကၠိုဟ်ခၠၚ် သွက်ဂွံလ္ၚတ်ဂၠိုက်ဂၠာဲ အရာက္တဵုဒှ်ကၠုၚ်မာန်ရဂှ် တုဲကၠုၚ်ဂိတုနဝ်ဝေမ်ဗာ ပ္ဍဲစၟတ်တ္ၚဲ (၂၂) ဏံ လလောၚ်တြးလဝ်ရ။ ဂကောံဒပ်ပၞာန် သုၚ်စောဲဇြဟတ်နျူကလဳယျာတုဲ သွက်ပရေၚ်ပတိတ်ဓာတ်လလဳ၊ သုတေသနသိပ္ပံ၊ ပရေၚ်ကၠောန်ပ္တိတ်ဂဥုဲ ကေုာံကမၠောန်စက်ဂမၠိုၚ် သုၚ်စောဲအာညံၚ်ဂွံနွံကဵုဒတုဲဖိုလ်ကီု ဒ္ဂေတ်ဗက်အာ ဗ္ၜတ်တၚ်စၞောန် အေဂျေန်ဇြဳ ဇြဟတ်အနုလက်ကၠိုက် ကၟိန်ဍုၚ်နာနာကီုရောၚ်ဂှ် ဟီုဂးကၠုၚ်လဝ်ရ။ ဟိုတ်ဂှ်ရ ပ္ဍဲလတူဂကောံပၞာန်သိုၚ်ခၞံအာ ရုၚ်စက်ပၟတ်ဓာတ်လလဳဂှ် သာ်လဵုညာတ်ကေတ်ရော။ အလဵုဍေံတအ် ကၠောန်ပ္တိတ်ကၠုၚ် လွဟ်လက်နက်မကမ် သုၚ်စောဲဇြဟတ် နျူကလဳယျာမာန်ဟာ။ စပ်ကဵုအကာဲအရာဏံတုဲ သၟာန်သွဟ်လဝ်ကဵု ဗိုလ်ဇၞော် CDM ကောၚ်ဝေန်ဒူရ။
-ကိုပ်ကၠာအိုတ်ဏံတှ်ေ ဂကောံပၞာန်ဂှ် သုၚ်စောဲ နဲကဲကွတ်ပညာကၟိန်ဍုၚ်ရုယှာတုဲ ပ္ဍဲလတူသိုၚ်ခၞံအာရုၚ်စက်ပၟတ်ဓာတ်လလဳ ပ္ဍဲကၟိန်ဍုၚ်ဗၟာဂှ် သာ်လဵုညာတ်ကေတ်ရော။
ယဝ်ရစပ်ကဵု သွက်သိုၚ်ခၞံရုၚ်စက်ဇြဟတ်ဓာတ်လလဳ နျူကလဳယျာဟီုတှ်ေ ဌာနဝန်ဇၞော်သိပ္ပံ ကေုာံနဲကဲကွတ်ပညာ သၟဝ်တဲကံၚ်ဇြဳပၞာန်ဂှ် အာစိုပ်လဝ် ကၟိန်ဍုၚ်ဖေတ်ဒြေယှေန်ရုယှာ ပ္ဍဲဂိတုနဝ်ဝေမ်ဗာ စၟတ်တ္ၚဲ ၁၈ ဂှ်နွံရ။ တုဲပၠန် လ္ၚတ်လဝ် ဇြေန်တာ တၚ်ဂၞၚ်ပရိုၚ်နျူကလဳယျာရ။ ထ္ပက်လဝ်စၟတ်တဲ လိက်ကသုက်တၚ်တုပ်စိုပ် ကေုာံဂကောံ မၞုံပ္ဍဲကဵုဂှ်ရ။ ထ္ပက်စၟတ်တဲတုဲတှ်ေ သိုၚ်ခၞံအာ ဇြေန်တာ ပရိုၚ်တၚ်ဂၞၚ်နျူကလဳယျာ ပ္ဍဲလဂုၚ်ဏံရ။ သိုၚ်ခၞံတုဲတှ်ေ ဆက်ကၠောန်အာ ကမၠောန်ဆက်စပ် သှ်ေမံၚ်တအ်ဂှ်ဏောၚ် ဂွံညာတ်ကေတ်ရ။ ရုၚ်စက်နျူကလဳယျာဏံဂှ် တၚ်ရန်တၟံပရေၚ်ၜိုဟ်လလံရဂှ် ဍေံတအ်ဟီုရ။ ဟွံကၠောန်ပ္တိတ် လွဟ်မကမ်ပုဟ်။ သိုၚ်ခၞံဏောၚ်။ ဆဂးဂှ် အရာဏံဂှ် ဒှ်တၚ်ဍေံတအ်လလောၚ်တြး ဍေံတအ်ပတိတ်လဝ်ရ။ လပါ်ဂွံညာတ်ကေတ်ဂှ်ရ။ ပ္ဍဲကဵုလပါ် ညာတ်ကေတ်ဟွံမာန်ဂှ် အရာဍေံတအ် ကၠောန်ပ္တိတ်ကၠုၚ်မာန်ဂှ် ဗီုကဵုလွဟ်လက်နက် အထောဋ်ကမ်လှောဝ် ဆေၚ်ကဵုနျူကလဳယျာတအ်ရ။ ကၠောန်ခၞံပ္တိတ်ကၠုၚ်မာန်မံၚ်။
-မွဲသာ်ပၠန်ဂှ် နကဵုဂကောံပၞာန်ဏံ ကၠောန်ပ္တိတ်ကၠုၚ် လွဟ်မကမ်သုၚ်စောဲဇြဟတ် နျူကလဳယျာမာန်ဟာ။ ညံၚ်ဂွံကၠောန်ဗီုဏံဂှ် ပ္ဍဲဍေံတအ် ပလေဝ်ပလေတ်လဝ်တုဲဒၟံၚ်ယျဟာ။
နူကဵုလက်ထက်အလဵုအသဳပၞာန်တေံရ ပရိုၚ်စပ်ကဵုနျူကလဳယျာဏံ ပြးတိတ်မံၚ်ကီု ရုဲစှ်လဝ်ဒၞာဲသွက်ဂွံသိုၚ်ခၞံ လွဟ်နျူကလဳယျာကီု၊ ရုဲစှ်လဝ် သ္ဇိုၚ်ရိုဟ်ကၞက်တအ်ကီုဂှ် နွံဒၟံၚ် တုဲတုဲရဏောၚ် ပတှ်ေကေတ်လဝ်ရ။ ဒၟာနူဂှ်ရ ဍေံတအ် ဒးစတမ်ကၠောန် နူကဵု မုက်ဂၞန်မွဲဟွံသေၚ်ဂှ်ရ ဒၞာဲနွံမံၚ်တုဲတုဲတအ်ဂှ် ကလေၚ်ပလေဝ်ပလေတ်ပတိုန်တုဲ လပါ်လကြဴတေံလေဝ် ကၠောန်မွဲနဲမွဲဗီု မာန်မံၚ်ရ။ သီုကဵုၜါနဲဂှ် ဍေံတအ်သိုၚ်ခၞံပတိုန် ပ္ဍဲမွဲအခိၚ်ဓဝ်မာန်မံၚ်ဏောၚ် ညာတ်ကေတ်ရ။
-ပ္ဍဲလတူဏံ ဗီုလဵုသ္ၚဳဂၠိပ် ညာတ်ကေတ်ရော။ ပ္ဍဲလတူဂကောံပၞာန်သီအဝဵု ပ္တိတ်ကၠုၚ်ဇြဟတ် ညံၚ်ဂွံပိုၚ်ပြဳလွဟ်လက်နက် အနုလကၠိုက်ဏံ သာ်လဵုညာတ်ရော။ အကာဲအရာဏံဂှ် သွက်ကၟိန်ဍုၚ်နာနာကီု သီုကဵုညးဍုၚ်ကွာန်တအ်သီုဖအိုတ် ပရေၚ်ကော်ချဴ စဵုကဵုကဆံၚ်လဵု နွံကၠုၚ်မာန်ရော။
ယဝ်ရလွဟ်နျူကလဳယျာ နွံကၠုၚ်ပ္ဍဲတဲဍေံတအ်ဏောၚ်ဟီုတှ်ေ ပ္ဍဲဍုၚ်ကီု မ္ၚးဍုၚ်ကီု။ ကၟိန်ဍုၚ်ပွဳပွူဝုတ်ဒိုဟ် သ္ၚိရေၚ်ကၟေၚ်ဆက်ဂမၠိုၚ်ကီု ပရေၚ်ဇီုကပိုက် နွံဗွဲမဂၠိုၚ်မာန်ရ။ ဒၟာနူဂှ်ရ ဍေံတအ်မိက်ဂွံပိုၚ်ပြဳဒၟံၚ်။ မိက်ဂွံပိုၚ်ပြဳဒၟံၚ်ဂှ်ရ ဍေံတအ်ပ္တိတ်ကၠုၚ်ဇြဟတ် ဗွဲမဂၠိုၚ်ရ။ ပ္တိတ်ကၠုၚ်ဇြဟတ်ဂၠိုၚ်တုဲ ကၠောန်မာန်ကၠုၚ် နွံဏောၚ်။ တုဲပၠန် လွဟ်နျူကလဳယျာ စိုပ်အာတဲဍေံတအ်တှ်ေ သွက်ညးဍုၚ်ကွာန်တအ်လေဝ် ဒှ်ကၠုၚ်ပရေၚ်ဘပဠ ဇၞော်ကဵုဇြဟတ်မာန်ရ။ ဗီုပြၚ်လဵုဘပဠကၠုၚ် ညးဍုၚ်ကွာန်တအ်ရောတှ်ေ သွက်အဝဵုဍေံတအ် ဂွံတန်ကြန်ရ။ ဗီုပြၚ်လဵုဟွံဟီု နဲကဲစုၚ် အကာဲအရာကၠောန်ကၠုၚ်နွံရ။ ဟိုတ်ဂှ်ရ ယဝ်ရလွဟ်လက်နက် နျူကလဳယျာ နွံကၠုၚ်ပ္ဍဲတဲတှ်ေ သွက်ဍေံတအ်ဂွံဘပဠ ခိုဟ်အိုတ်ရ။ ဣဏံဂှ် ပွိုၚ်ဍုၚ်လဵုဒှ်ဒှ်ရ။ ရးဒေသလဵု ဒှ်ဒှ်ရ။ ဒၞာဲလဵုဒှ်ဒှ် အလဵုဍေံတအ် ကၠောန်ကၠုၚ်တှ်ေ ပရေၚ်ဇီုကပိုက် ဗွဲမဂၠိုၚ်နွံကၠုၚ်မာန်ရ။ ပ္ဍဲဂကောံမၞိဟ်တအ်လေဝ်။ အရာဏံဂှ် ဒှ်ကၠုၚ်ဂကောံမၞိဟ် ဘပဠကၠုၚ် ကၟိန်ဍုၚ်ဇကု ညးဍုၚ်ကွာန်ဇကု ပထမမွဲဂကောံရ။ ဒှ်ကၠုၚ် ဗီုပြၚ်ဏံမာန်မံၚ်ရ။
-အလန်လကြဴအိုတ်ဏံ စပ်ကဵုကမၠောန် လပါ်ကံၚ်ဇြဳပၞာန် သိုၚ်ခၞံရုၚ်စက်ဓာတ်လလဳ နျူကလဳယျာတုဲ မုမိက်ဂွံထပ်ဟီု ဗပေၚ်နွံဏီရော။
ညံၚ်ဟွံဂွံကၠောန်ပ္တိတ် လွဟ်လက်နက် ညံၚ်ရဴနျူကလဳယျာမာန်ဂှ် ပိုဲထေက်ကဵုဒးမၚ်ရံၚ်ကျောဝ် ဂၠိုၚ်ဂၠိုၚ်ရ။ ပ္ဍဲအရာမၚ်ရံၚ်ကျောဝ်ဂှ်လေဝ် ဗီုအခိၚ်ကၠာတေံ ပ္ဍဲအကာဲအရာဍေံတအ်ကၠောန်သ္ပဒၟံၚ် ဗွဲမပၞုက်ဓလုက်ဂှ် လၟုဟ်နွံကၠုၚ် ပ္ဍဲပိုဲဗွဲမဂၠိုၚ်ရ။ မၞိဟ်ပ္ဍဲ နွံဗွဲမဂၠိုၚ်ရ။ ဒၟာနူမၞိဟ်ကဵုပရိုၚ် နွံဒၟံၚ်ဂှ်ရ ဗီုကဵုကိစ္စဆေၚ်စပ်ကဵုနျူကလဳယျာဂှ် တီတုဲဗက် ကဵုမဳဒဳယာပရိုၚ်ကဵုဒှ် အလဵုအသဳ NUGကဵုဒှ် ဂကောံကၟိန်ဍုၚ်နာနာကဵုဒှ် ထေက်ကဵုဒးကဵုပရိုၚ်ဏောၚ်ဂှ် အဲညာတ်ကေတ်ရ။