သာလေန်ဂျဳ၊ ဒဳဇြေန်ဗာ(၁)
ကွာန်ဌာန်ဇြေန် ပွိုၚ်ဍုၚ်သာလေန်ဂျဳ ရးဒေသဇၞော်သေတ်ဂါၚ် တ္ၚဲဏံပ္ဍဲအခိၚ်ဒေါဝ်တ္ၚဲဂှ် ဒပ်ကံၚ်ဇြဳပၞာန် လုပ်စံၚ်ကၠုၚ်ကွာန်တုဲ ညးဒေသၜိုတ်လ္ၚီတၠ ဒးဂြိပ်ဒၟံၚ်ရဂှ် ညးဒေသတအ် ဟီုရ။
“နူတနေံတေံ ဒှ်လဝ်ပေါဲဗတိုက်ရ။ ကၠဵုပၞာန်ဂှ် နူတေနေံတေံ အခိၚ်ဇိုၚ်သဝ်တ္ၚဲ ဖျေံဗဒပ် ပ္ဍဲကွာန်ယှိုဲကုံတုဲ ညးဍုၚ်ကွာန်လ္ၚဵုတအ်ဂှ် ဒးပါဲဓလေတ်ဒၟံၚ်ရ။ အခိၚ်ဂှ်တှ်ေ ဇြဟတ်ၜိုတ် ၅၀ နွံဏောၚ်။ တ္ၚဲဏံအခိၚ်ၜိုတ် ၇ နာဍဳဂှ် ဇြဟတ်ဒှ်အာၜိုတ် ၃၀၀ ရ။ စိုပ်ကၠုၚ်ကဵုက္ၜၚ် ၜါက္ၜၚ်။
တ္ၚဲဏံ ၜိုတ်အခိၚ်ဒေါတ်တ္ၚဲ ၂ နာဍဳ ၄၀ မိနေတ်ဂှ် ကၠုၚ်စံၚ် ကွာန်ဌာန်ဇြေန်ရ။ ညးဍုၚ်ကွာန်တအ် ဒးပါဲဓလေတ်မံၚ်ရ။ လၟုဟ်ဏံတှ်ေ ကွာန်ဌာန်ဇြေန်ကီု သီုကဵုကွာန် မၞုံကရပ်ဂှ် ညးဍုၚ်ကွာန်ဂမၠိုၚ် ၜိုတ်လ္ၚီတၠ ဒးပါဲဓလေတ်မံၚ်ဘဲပၞာန်ရ” ဂှ် ညးနွံတာလျိုၚ် နူကဵု Local defense force သာလေန်ဂျဳ သ္ဂံၚ်ဗြဴ မိချေဝ် ဟီုကဵုဌာန်ပရိုၚ်သြၚ်လောန်တိုၚ်(မ်)ရ။
လၟုဟ်ဏံ ကံၚ်ဇြဳပၞာန် လုပ်စိုပ် ကွာန်သာထုၚ် ဖျေံလဝ်ဗဒပ်တုဲ ကောန်ညးဒေသ ကွာန်ဌာန်ဇြေန်၊ လေတ်ပကျောန်၊ သာထုၚ်၊ တဝ်ကျောၚ်ဂမၠိုၚ် ၜိုတ်လ္ၚီတၠဂှ် ဒးပါဲဓလေတ် ဂြိပ်ဒဴဒၟံၚ် ဒၞာဲကြပ်ညောန်ရဂှ်လေဝ် ညးဟီုလဝ်ရ။
ကံၚ်ဇြဳပၞာန်ကၠောန်ဒၟံၚ် ညံၚ်ဂွံစံၚ်ကွာန်ကီု သီုကဵုရပ်ကေတ်လဝ် ကောန်ညးဍုၚ်ကွာန် နူကွာန်တအ်ဂှ် ၜါတၠရောၚ်ဂှ်လေဝ် ဂွံတီကေတ်လဝ်ရ။ ပရိုၚ် – သြၚ်လောန်တိုၚ်(မ်)