ကွာလာလာမ်ပူ – ဒဳဇြေန်ဗာ(၂)
ဒပ်ပၞာန်သီအဝဵု က္ဍိုက်က္ဍိုပ်တုဲ ပေါဲရုဲမာဲကၠောန်ဗဒှ်ပ္ဍဲသၞာံ ၂၀၂၃ ဂှ် အလဵုအသဳမလေဝ်ယှာ ထံက်အာဂလာန်ဟွံသေၚ်ရောၚ်ဂှ် ဝန်ဇၞော်ပရေၚ်ဍုၚ်သ္အာန် သိုၚ်ဖူဒါန် ဟီုလဝ်ရ။
ပွမတးပါဲ နူလပါ်မလေဝ်ယှာဂှ် ဟိုတ်နူက္ဍိုပ်သ္ကိုပ်ပၞာန်လ္ၚဵုဂှ် ဗက်စအဂတိတုဲ ပလေဝ်ပလေတ်လဝ် သၞောဝ်ပေါဲရုဲမာဲကီု ညးမဆေၚ်စပ်အိုဿီု ဟိုတ်နူသ္ပလဝ်ဒတန် ဟွံသေၚ်ကီုရောၚ်ဂှ် သ္ဂးလဝ်ရ။
ပ္ဍဲကာလအနာဂတ် သာတုဲ ညံၚ်ဂွံညိၚ်ဝတ်တန်ကြန်ကီု ညံၚ်ကၟိန်ဍုၚ်ဗၟာ ဂွံအာစိုပ်ဒဒှ်ကၟိန်ဍုၚ် ဒဳမဝ်ကရေဇြဳပၠန်ကီုဂှ် မလေဝ်ယှာ ရီုဗၚ်အာကဵုဏောၚ်ဂှ် ကဵုကၠုၚ်လဝ်ကတိပါၚ်ရ။
“ကံၚ်ဇြဳပၞာန် ဟီုဂးဒၟံၚ် ပရောပေါဲရုဲမာဲဂှ် ပရေၚ်ဒဒှ်ဍာံဟၟဲရ မုဟိုတ်ရောတှ်ေ ပေါဲရုဲမာဲကၠောန်ဗဒှ်လဝ် ပ္ဍဲကၟိန်ဍုၚ်ဗၟာဂှ် ညးမၚ်ရံၚ်လ္ၚတ်ပါ်ပါဲ နူဍုၚ်နာနာဂှ် စၟတ်သမ္တီလဝ် ပေါဲရုဲမာဲ ဗၠးၜးတုဲ နွံကဵုဗဗွဲဓဝ်တုဲတုဲရ” ဂှ် ဝန်ဇၞော်ပရေၚ်ဍုၚ်သ္အာၚ် မလေဝ်ယှာ ဟီုလဝ်ရ။
ကၟိန်ဍုၚ်ဗၟာဂှ် တုဲကၠုၚ်နူ သၞာံ ၂၀၂၁ ပ္ဍဲဂိတုဖေဖဝ်ဝါရဳ စၟတ်တ္ၚဲ (၁) ဒပ်ပၞာန်သီအဝဵုတုဲဂှ် စိုပ်အာစဵုကဵုအကာဲအရာပရေံအိုတ် မဒှ်ရ။
ပ္ဍဲပေါဲရုဲမာဲ သၞာံတုဲကၠုၚ် ဂိတုနဝ်ဝေမ်ဗာဂှ် ဗော်ဒဳမဝ်ကရေဇြဳကောန်ဂကူ ဒဝ်အံၚ်သာန်သုကျဳက္ဍိုက်လဝ်က္ဍိုပ်ဂှ် ၜိုန်ရဂွံကၠုၚ်ဇၞးလဝ်ကီုလေဝ် နကဵုတၚ်ထ္ၜးဟိုတ်ဂကောံပၞာန် ပရေၚ်လိမ်မာဲနွံရောၚ်ဂးတုဲ သီကၠုၚ်လဝ်အဝဵုရ။
စပ်ကဵုအလဵုအသဳပရေၚ်ညဳသၟဟ်ကောန်ဂကူ (NUG)ဂှ် အတိုၚ်ပတိုန်ထ္ၜးလဝ်ဂလာန် သွက်ဂွံဒက်ပ္တန်ဖိုဝ်ရာမ်တၠဒါန်ဂမၠိုၚ် ဆေၚ်ကဵုပရေၚ်ရီုဗၚ်ထံက်ပၚ်ပရေၚ်မၞိဟ် ကၟိန်ဍုၚ်အလုံဂၠးကဝ်နာနာ ပါလုပ်ဂှ် အာတ်မိက်လဝ် ပရေၚ်ရေၚ်တၠုၚ်ပံၚ်တောဲကဵု ညးအုပ်ကာနာနာကုလသမဂ္ဂ ဂူတာရေတ်ရဂှ် ဝန်ဇၞော်ပရေၚ်ဍုၚ်သ္အာၚ် မလေဝ်ယှာဟီုလဝ်ဏီရ။
ဂကောံကၟိန်ဍုၚ်နာနာ မိက်ဂွံကဵုဒၟံၚ်ပရေၚ်ရီုဗၚ်ဆေၚ်ကဵုအရီုအဗၚ်အထံက်အပၚ်ပရေၚ်မၞိဟ် ၜိုန်ရနွံဒၟံၚ်ကီုလေဝ် သွက်ဂွံပံၚ်တောဲရေၚ်တၠုၚ်ကဵု ဂကောံပၞာန်ဂှ် ဟီုတးပါဲလဝ်ရောၚ် ဂွံတီကေတ်ရ။
ညံၚ်ဂွံသောၚ်ကလး ပရေၚ်ကြေပ်ဂြတ်ကၟိန်ဍုၚ်ဗၟာဂှ် သွက်ဂွံဒက်ပ္တန်အာဖိုဝ်ရာမ် ကၟိန်ဍုၚ်နာနာပါလုပ်မွဲ ဂလာန်ပတိုန်ထ္ၜး အလဵုအသဳပရေၚ်ညဳသၟဟ်ကောန်ဂကူ (NUG)ဂှ် မလေဝ်ယှာ ထံက်လဝ်ဂလာန်ရ။
Ref: CN A