တၞၚ်သဳ၊ ဒဳဇြေမ်ဗာ (၂)
ပ္ဍဲရးတၞၚ်သဳဂှ် ဟိုတ်နူကံၚ်ဇြဳပၞာန်သီအဝဵု သၞောတ်ဗ္ၜတ်ကၠုၚ် အခေါၚ်ဖ္ဍိုက်ကပေါတ်ဗၞိက်တံ ဂၠိုၚ်ကၠုၚ်ဂှ်ရ ဇွောံမစၞစ ကေုာံ ဂဥုဲဇဗ သွက်ညးဍုၚ်ကွာန်ပါဲဒဴဘဲပၞာန်တံ ပိုတ်ကၠုၚ်မာန်ရောၚ် ဂကောံသ္ပအထံက်အရီု ညးပါဲဒဴဘဲပၞာန် ဒဝ်န−တၞၚ်သဳတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်ဝွံ အပ္ဍဲအခိၚ်ကာလလက္ကရဴဏံ ပ္ဍဲပွိုၚ်ဍုၚ် နူရးတၞၚ်သဳတံဂှ် ပံက်သၠဲပ္တိုန်သၞေဟ်ကၚ်စၟဳစၟတ်တံတုဲ သာပတေၚ်ဂြတ်ကၠုၚ် အခေါၚ်ယိုက်ဏာနၚ် သ္ၚုတံ မပါလုပ် သီုကီု ဗၞိက်စၞစသုၚ်၊ ဂဥုဲဇဗတံရ။
ပ္ဍဲအရာဖ္ဍိုက်ဏာနၚ်သ္ၚုတံဂှ် မွဲတၠမ္ဂး ကဵုလဝ်အခေါၚ်ယိုက်ဏာနၚ် မွဲရိုက်ဓဝ်တုဲ ယဝ်ရဖ္ဍိုက်နၚ်အပဵုမ္ဂး မ္ၚးနူသီကေတ်ဂှ် သီုကဵုကၠောန်သ္ပ ရပ်ဒက်ၜုၚ်တက်ကၠုၚ် သၟာကွဳစက် မဖ္ဍိုက်နၚ်တံ အဆက်က်ရ။
ဟိုတ်နူတၚ်သၞောတ်ဗ္ၜတ် ကံၚ်ဇြဳပၞာန်တံတုဲ သွက်ညးဍုၚ်ကွာန်ပါဲဒဴဘဲပၞာန်တံဂှ် ဒှ်ကၠုၚ်အခက်အခုဲ သွက်ဂွံဖ္ဍိုက်ဇွောံမစၞစ ကေုာံ ဂဥုဲဇဗတံတုဲ အပ္ဍဲအခိၚ်ခြာဟွံလအ်ဏံ ဂဗကၠုၚ်ကဵု ပွမပိုတ်အိုတ်တံမာန်ဂှ် ညးတာလျိုၚ် ဂကောံသ္ပအထံက်အရီု ညးပါဲဒဴဘဲပၞာန် ဒဝ်န−တၞၚ်သဳမွဲတၠ ဟီုရ။
သ္အာၚ်နူဂှ်ပၠန် ဟိုတ်နူကလိဂွံ မဒါန်သြန် သွက်ညးပါဲဒဴဘဲပၞာန်တံအောန်စှ်ေကၠုၚ်ကီု၊ ဟိုတ်နူအခက်အခုဲ ပရေၚ်ဆက်စၠောံအာကၠုၚ်တံတုဲ ကဵုအရီုဗၚ် ဍိုက်က်ပေၚ်ၚ်မာန် ဟွံမွဲရပုဟ်ဂှ် သ္ဂးရ။
အခိၚ်လၟုဟ်ဂှ် ညးဍုၚ်ကွာန်ပါဲဒဴဘဲပၞာန်တံဝွံ အပ္ဍဲကာလရာသဳဥတု အပြံၚ်အလှာဲဂှ် က္တဵုဒှ်ဒၟံၚ်ယဲဇွဟ် ဂၠိုၚ်ဒၟံၚ်တုဲ ယဲဇွဟ်ဂစေံ ကေုာံ ယဲမနက် က္တဵုဒှ်တံလေဝ် နွံဒၟံၚ်ဂှ် ဂွံတီကေတ်ရ။
ပ္ဍဲရးတၞၚ်သဳဂှ် ကြဴနူဒပ်ပၞာန်သီအဝဵုတုဲ ဟိုတ်နူပေါဲဗ္တိုက်ၜါလ္ပာ်တံတုဲ ညးဒေသ (၁၀၀၀၀) ပြၚ် ဒးဂြိပ်ဒဴပါဲဒလေတ်ဒၟံၚ်တုဲ ပ္ဍဲပွိုၚ်ဍုၚ်ပဠဝ် ကဵု ပွိုၚ်ဍုၚ်တၞၚ်သဳတံဂှ် ညးဍုၚ်ကွာန်ပါဲဒဴဘဲပၞာန် မၞုံဒၟံၚ် ဂၠိုၚ်အိုတ်ဂှ် သ္ဂးရ။
ညးဍုၚ်ကွာန်ပါဲဒဴဘဲပၞာန်တံဝွံ ဟိုတ်နူတၚ်သၞောတ်ဗ္ၜတ် ကံၚ်ဇြဳပၞာန်တံတုဲ အရီုဗၚ်စပ်ကဵုပရေၚ်ဗ္စာရဏာမၞိဟ်တံဂှ် ဆက်နွံမံၚ်ပၟိက်ရ။
ပရိုၚ်−သြၚ်လောန်တိုၚ်(မ်)