သဳရဳယျာ၊ ဒဳဇြေမ်ဗာ (၃)
က္ဍိုပ်သ္ကိုပ် IS အဘူအေလ်ဟာသာန် အေလ်ဟာယှဳမဳ အေလ်ဂွာယှဳ ကေုာံ ဂကောံညး မဒးဒုၚ်ပါ်ထ္ကးလဝ် ပ္ဍဲသဳရဳယျာဂှ်ဝွံ အခိၚ်ဒးဒုၚ်ဗိုၚ်လဝ်ကဵု သၟာပရေၚ်ဗ္တိုက်ညးဒေသ ပ္ဍဲဍုၚ်ဂျာဇြေန်ဂှ် ဗ္တိုဟ်လဝ်ဗုမ် ဂစိုတ်လဝ်ဇကုဇကုဂှ် ညးမပါလုပ်လဝ် ပ္ဍဲပရေၚ်ပြုပြေၚ်ပၞာန်ဂှ်မွဲတၠ ဟီုရ။
က္ဍိုပ်သ္ကိုပ်ဂှ်ဝွံ ချိုတ်အာလဝ် ပ္ဍဲပရေၚ်ပြုပြေၚ်ပၞာန် နူကဵု Free Syrian Army (FSA) မရေၚ်တၠုၚ်လဝ် ပ္ဍဲတွဵုရးဒါရာ သ္ကုတ်ပလိုတ်သၟဝ်ကျာ (ဗာယပ်) ဂှ်ရောၚ် ဒပ်ပၞာန်အမေရိကာန် လလောၚ်ပ္တိတ်လဝ် ပ္ဍဲဂိတုနဝ်ဝေမ်ဗာ (၃၀) တေံရ။
အတိုၚ်တၚ်တုပ်စိုတ် ပရေၚ်သကဵုပြေလာဲ လုပ်အကြာ−ရုယှာ သၞာံ ၂၀၁၈ မကလေၚ်ထိၚ်ဒက်ကဵုလဝ် သ္ကုတ်သၠုၚ်ကျာဍုၚ်သဳရဳယျာဂှ်မ္ဂး တွဵုရးဏံဂှ် ဒပ်ပၞာန်သဳရဳယျာတံ ထိၚ်ဒက်လဝ်ရ။
က္ဍိုပ်သ္ကိုပ် IS ဂှ်ကဵု ကောန်ရဲသၟဝ်တဲညး မကၠတ်အောပ်ဒၟံၚ် အပ္ဍဲသ္ၚိမွဲမဂှ် ဒဒှ်ရဂွံဆဵုကေတ်လဝ်ဂှ် ကောန်သ္ဂံၚ် မပါလုပ်လဝ် ပ္ဍဲ FSA တံ ကေုာံ ညးဒေသတံ ဟီုဂးလဝ်ရ။
“မၞိဟ်ဗ္တိုက်ပိုယ်တံ သီဂွံ ဒၞါဲဍေံတံ အောပ်ဒၟံၚ်တံဂှ်တုဲ က္ဍိုပ်သ္ကိုပ်ဂှ်ကဵု သ္ကအ်ညးမွဲတၠတံဝွံ ဒုၚ်ချိုတ်ဖံက်ဗ္တိုဟ်ထောံလဝ်ရ” သာ်ဝွံ မၞိဟ်ဗ္တိုက်တြေံ မပါလုပ်လဝ်ဂှ် ဟီုရ။
FSA ဝွံ ကၠာဂွိုအ်ရုပ်သီ ပရေၚ်ထံက်ပၚ် ဒဵုကဵုသၞာံ ၂၀၁၈ ဂှ် ဂွံလဝ်ဇြဟတ်လက္ကရဴ နူကဵုဍုၚ်ပလိုတ်တံ ကေုာံ ဍုၚ်ပ္ၚံက်ၜဳတံကီုလေဝ် ညးတံဝွံ ဂွံလဝ်တၚ်တုပ်စိုတ် အခေါၚ်ဂွံရပ် လွဟ်ဍောတ်တ်တံတုဲ ဆက်စွံလဝ် မၞိဟ်ဗ္တိုက်ညးတံ ပ္ဍဲကဵုဒေသဂှ်ရ။
ဂကောံ IS ဂှ်တှ်ေ ဒဒှ်ရရုဲစှ်လဝ် က္ဍိုပ်သ္ကိုပ်တၟိညးတံတုဲယျဂှ် ညးနွံအခေါၚ်ဟီုဂး ဂကောံဂှ် ဟီုဂးလဝ်တုဲ ပရေၚ်က္ဍိုပ်သ္ကိုပ် ဒးချိုတ်အာဂှ် ဟွံထ္မံက်ထ္ၜးလဝ် ဗွဲလစှ်ေတုဲ ဟိုတ်နူဗ္တိုက်ကဵု သၞကျာ်ထာဝရတံတုဲ ဒးဒုၚ်ဂစိုတ်လဝ်ရောၚ် ရဴဝွံ သ္ဂးလဝ်ရ။
ဂကောံ IS ဝွံ မံက်တိတ်ကၠုၚ်လဝ် နူကဵုအရာဟွံညိၚ်ဝတ် ဍုၚ်ဇိုၚ်ဝုတ်ဒိုဟ် ပၞာန်အပ္ဍဲဍုၚ်အဳရာတ်ဂှ်တုဲ ပ္ဍဲသၞာံ ၂၀၁၄ ဂှ် သီဂွံလဝ် ဒၞါဲအပ္ဍဲဍုၚ်အဳရာန်ကဵု ဍုၚ်သဳရဳယျာတံ ဗွဲမဂၠိုၚ်ဂၠေၚ်ရ။
ဂကောံ IS ဂှ်ဝွံ ဟိုတ်နူဂစိုတ်လဝ် မၞိဟ်ဂၠိုၚ်ကဵုလ္ၚီဂှ်ရ စနူသၞာံ ၂၀၁၇ တုဲ ဂကောံအဳရာတ်တံကဵု ဂကောံဒပ်ဍုၚ်သ္အာၚ်တံ ဗ္တိုက်ဖလှေက်ကၠုၚ်ဒၟံၚ်ရ။
Ref: CNA