လ္ဂုၚ်၊ ဒဳဇြေမ်ဗာ (၅)
အပ္ဍဲပွိုၚ် (၂၂) ဂိတု ဒပ်ပၞာန်သီလဝ်အဝဵုဂှ် ကံၚ်ဇြဳပၞာန်ဂှ် နူကဵုထံၚ်စာတ် အလုံမွဲကၟိန်ဍုၚ်ဂှ် ကဵုလဝ်အခေါၚ်ဗၠးနူဒုဟ်ဒဏ် ကုကောန်ထံၚ်တံ စဵုကဵုဒ္စါံဝါကီုလေဝ် ပ္ဍဲကဵုဂှ် ကောန်ထံၚ်ပရေၚ်ဍုၚ်ကွာန် (၈) တၟံကၠံဟေၚ် ပါလုပ်ဂှ် ဂကောံသုတေသန ISP-Myanmar လလောၚ်ပ္တိတ်လဝ်ရ။
ကံၚ်ဇြဳပၞာန်ဝွံ သၞာံတုဲကၠုၚ် အခိၚ်စသီအဝဵုတုဲ ပ္ဍဲဂိတုဖေဖဝ်ဝါရဳ (၁၂) ဂှ် ကဵုလဝ်အခေါၚ်ဗၠးနူဒုဟ်ဒဏ် ကောန်ထံၚ် (၂၃၃၀၀) ပြၚ်၊ ပ္ဍဲဂိတုဨပရဴဂှ် (၂၃၄၀၀) ပြၚ်၊ ပ္ဍဲဂိတုဂျောန်ဂှ် (၂၂၉၀) ပြၚ်၊ ပ္ဍဲဂိတုအံက်တဝ်ဗာဂှ် (၅၆၃၀) ပြၚ် မဒှ်ရ။
ဆ္ဂး ပ္ဍဲကဵုကောန်ထံၚ်ကံၚ်ဇြဳပၞာန် ကဵုလဝ်အခေါၚ်ဗၠးနူဒုဟ်ဒဏ် အပံၚ်ဖအိုတ် (၆၂,၇၀၀) ပြၚ်ဂှ် ကောန်ထံၚ်ရေၚ်ဍုၚ်ကွာန် (၅၀၀၀) ဟေၚ်ပါလုပ်ဂှ် ISP-Myanmar ၜိုတ်က္ဍစိုပ် ပကောံပကေဝ်လဝ် တၚ်စၟတ်သမ္တီ နူကဵု AAPP ကေုာံ မဳဒဳယျာပရိုၚ် မဗၠးၜးတံတုဲ လလောၚ်ပ္တိတ်လဝ်ရ။
စပ်ကဵုအကာဲအရာ ကောန်ထံၚ်ပရေၚ်ဍုၚ်ကွာန် ပါလုပ်အောန်ဒၟံၚ် ပ္ဍဲကဵုအခေါၚ်ဗၠးဒုဟ်ဒဏ် ကံၚ်ဇြဳပၞာန်တံဂှ်တုဲ ညးတာလျိုၚ် ဂကောံမၚ်မွဲရီုဗၚ်ကောန်ထံၚ်ပရေၚ်ဍုၚ်ကွာန် (AAPP) မွဲတၠ ခၠေဝ်ပၠန်လဝ် သာ်ဏံရ။
“ကံၚ်ဇြဳပၞာန် အခိၚ်ကဵုအခေါၚ်ဗၠးနူဒုဟ်ဒဏ်တံဂှ် ဗလးကဵုကောန်ထံၚ်ရာဇဝတ်တၞဟ်ဟ်တံ ဂၠိုၚ်ၚ်တုဲ ဗလးကဵုကောန်ထံၚ်ပရေၚ်ဍုၚ်ကွာန်တံ လၟိဟ်အောန်န်ဂှ်တှ်ေ ဒှ်အခိုက်ဍေံတံရ၊ မူဟိုတ်ရောဟီုတှ်ေ ယဝ်ရဇြဟတ်ဂရိုဟ် ဍုၚ်သ္အာၚ်တံ ဟွံမွဲပုဟ်ဟီုမ္ဂး မၞိဟ်မပါလုပ်ဒၟံၚ် ပ္ဍဲပရေၚ်ပၠန်ဂတး ဒစဵုဒစးဂကောံပၞာန်တံ သီုဖအိုတ်ဂှ် ဆန္ဒမိက်ဂွံဗလးကဵုလးလးဂှ် ဟွံမွဲရ၊ ဟိုတ်ဂှ်ရ ဟွံဒေါအ်ဟွံဂွံ သွက်ဂွံဖအောန်ဖျေံ ဇြဟတ်ဂရိုဟ် ဍုၚ်သ္အာၚ်တံမာန်ဂှ် ဗလးကဵုလဝ် လၟိဟ်ညိညဓဝ်ရ၊ ညအ်ဂှ် လၟုဟ်ဟွံသေၚ်ရပုဟ်၊ ဒှ်နဲကဲဍေံတံစကာကၠုၚ် နူခေတ်အဆက်က် တၠအဝဵုပၞာန်အဆက်က်တံရ” သာ်ဝွံ သ္ဂးရ။
နကဵုညးမကလေၚ်ဗၠးကၠုၚ် နကဵုအခေါၚ်ဗၠးနူဒုဟ်ဒဏ်ကံၚ်ဇြဳပၞာန်တံ ယဝ်ရထပ်ကလိလောန် ဒုဟ်ဒဏ်မွဲဝါပၠန်မ္ဂး ဒုဟ်ဒဏ်သွက်ဒးဒုၚ်နွံတံဂှ်လေဝ် ထပ်ဒးဒုၚ်ရောၚ်ဂးတုဲ ဗလးကဵုလဝ်ရ။
သမ္မတယာယဳ အလဵုအသဳညဳသၟဟ်ဂကူ NUG ဒူဝါလယှဳလဂှ် ကံၚ်ဇြဳပၞာန် ၜိုန်ရကဵုလဝ်အခေါၚ် ဗၠးနူဒုဟ်ဒဏ်ကီုလေဝ် ပွမရပ်ဒက်ဂစိုတ် ကောန်အရာပ်ဟၟဲကဵုဒုဟ် အလုံကၟိန်ဍုၚ်ပြးဇးတံဂှ်ကီု၊ ပွမဗ္တိုက် ထောံမခတိုဟ် နကဵုက္ၜၚ်ကျာပၞာန်တံ၊ ဇြဟတ် မခိုဟ်လောန်တံဂှ် ဟၟဲကဵုဓဝ်ဗ္စာ ကၠောန်သ္ပဒၟံၚ် အရိုဟ်ဒဒှ်တ္ၚဲဖိုဟ်ရောၚ်ဂှ် ဟီုမြော်လဝ်ဂလာန် ပ္ဍဲဂိတုနဝ်ဝေမ်ဗာာ (၁၇) တေံရ။
သ္အာၚ်နူဂှ်ပၠန် ဂကောံဒပ်ပၞာန်သီအဝဵုဝွံ သုၚ်စောဲဗျူဟာ ပၟတ်မွဲလ္ပာ် ဍာ်မွဲလ္ပာ်တုဲ ညံၚ်ကဵုဓဝ်ဆာန်ဍူညှာတာတံ နွံညံၚ်ၚ်ဂှ် ဒ္ဂေတ်စရိုတ် မဓဇန်ယုတ်မာန်တံ နွံဒၟံၚ်ပေၚ်ၚ်ဟီုဂှ်လေဝ် သွက်ဂွံသ္ပသတိအိုတ်ဂှ် ဖ္တိုက်ဖ္အောဝ်လဝ်ရ။
အပ္ဍဲကာလဒပ်ပၞာန်သီအဝဵု ပွိုၚ် (၂၂) ဂိတုဂှ် ညးချဳဒရာၚ် ဒဳမဝ်ကရေဇြဳ ကေုာံ ညးဍုၚ်ကွာန်ကောန်အရာပ် (၂၅၅၃) တၠ ဒးပြဟ်လလုဲအာလဝ်တုဲ မၞိဟ်ဒးဒုၚ်ရပ်ဒက် စဵုကဵုအပံၚ် (၁၆၀၀၀) ပြၚ် နွံဒၟံၚ်ဂှ် ဂကောံမၚ်မွဲရီုဗၚ် ကောန်ထံၚ်ပရေၚ်ဍုၚ်ကွာန် (AAPP) လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)