ပ္ဍဲသ္ကုတ်ဂၠံၚ်ထဝါဲ−ထဳခဳဂှ် နူ (၆) နာဍဳ ပယျာံဂယး စဵုကဵု (၆) နာဍဳ ပယျာံသဝ်တ္ၚဲဓဝ်ဟေၚ် သွက်ဂွံအာကၠုၚ်အိုတ်ဂှ် ပဳဒဳအေဖ်ဒေသ ကဵုသတိ

မတ်မလီု၊ မာတ် (၂၉)

ပ္ဍဲလ္ပာ်ဂၠံၚ်ထဝါဲ−ထဳခဳ မၞုံ ပ္ဍဲပွိုၚ်ဍုၚ်ထဝါဲ၊ ရးတၞၚ်သဳဂှ် စနူ (၆) နာဍဳ ပယျာံဂယး စဵုကဵု (၆) နာဍဳ ပယျာံသဝ်တ္ၚဲဓဝ်ဟေၚ် သွက်ဂွံအာကၠုၚ်အိုတ်ဂှ် ဂကောံစဵုဒၞါညးဍုၚ်ကွာန်ထဝါဲတံ ကဵုသတိ လလောၚ်တြးလဝ် ပ္ဍဲဂိတုမာတ် (၂၈) ဂှ်ရ။

ဒပ်ကံၚ်ဇြဳပၞာန်သီအဝဵုဝွံ ပ္ဍဲလ္ပာ်ဂၠံၚ်ထဝါဲ−ထဳခဳဂှ် ဟိုတ်နူအာကၠုၚ်ဒၟံၚ်ကဵု ကွဳစက်ကောန်အရာပ်တံ သုၚ်စောဲဒၟံၚ်တံဂှ်ရ နကဵုညးဍုၚ်ကွာန်တံ ပ္ဍဲအရာအာကၠုၚ်တရဴဂှ် ဖျေံ ဒဳကွဳစက်ဂှ်ကီု၊ ညံၚ်ဟွံဂွံဒဳ ပဵုနူ လ္တူ (၆၀) ကဳလိုဝ်ဂှ်ကီု၊ သွက်ဂွံအာကၠုၚ် နူ (၆) နာဍဳပယျာံဂယး စဵုကဵု (၆) နာဍဳသဝ်တ္ၚဲ ဓဝ်ဟေၚ်ဂှ် ကဵုလဝ်သတိရ။

တုဲပၠန် အပ္ဍဲအကြာ နူ (၆) နာဍဳပယျာံသဝ်တ္ၚဲ စဵုကဵု (၆) နာဍဳပယျာံဂယးဂှ် ပါဲနူကွဳစက်ဟံၚ်ပြာ် ပရေၚ်မၞိဟ်တံတုဲ ညံၚ်ဟွံဂွံကၠောန်သ္ပအာကၠုၚ်တံဂှ်ကီု၊ ကွဳစက်ဟံၚ်ပြာ်ပရေၚ်မၞိဟ်တံ အာကၠုၚ်မ္ဂးလေဝ် သွက်ဂွံလဴပ္တီကဵုပရိုၚ်ဂှ် လလောၚ်ပ္တိတ်လဝ်ရ။

စပ်ကဵု အကာဲအရာဏံတုဲ ညးဒုၚ်တာလျိုၚ် ပရေၚ်ကလေၚ်ပရိုၚ် ဒပ်စဵုဒၞါညးဍုၚ်ကွာန် ပွိုၚ်ဍုၚ်ထဝါဲမွဲတၠဂှ် ဟီုလဝ် ဗီုဏံရ။

“ပ္ဍဲသ္ကုတ်ဂၠံၚ်ဏံဂှ် ကံၚ်ဇြဳပၞာန်တံ သုၚ်စောဲကွဳစက်ကောန်အရာပ်တံတုဲ အာကၠုၚ်ဂၠိုၚ်ဒၟံၚ်ဂှ်ရ ဂွိၚ်ဖေက်ညးဍုၚ်ကွာန်တံ ဇီုကပိုက်ဒးဂိတုဲ ပ္တိတ်လဝ် တၚ်လလောၚ်တြးရ” သာ်ဝွံ ဟီုရ။

ဟိုတ်ဂှ်ရ နကဵုညးဍုၚ်ကွာန်အာတရဴတံ ဟွံဒ္ဂေတ်ဟွံဂွံ သွက်ဂွံဒ္ဂေတ်ဗက်ကဵု တၚ်လလောၚ်တြးဂှ်ကီု၊ ယဝ်ရပွမဒ္ဂေတ်ဗက်လဝ် ဟွံမွဲမ္ဂး ကုဖဵုအဆက်ကြဴ မက္တဵုဒှ်ကၠုၚ်မာန်တံဂှ် ကေတ်အာတာလျိုၚ် ဟွံသေၚ်ပုဟ်ဂှ် ဒပ်စဵုဒၞါညးဍုၚ်ကွာန် ပွိုၚ်ဍုၚ်ထဝါဲ ဟီုရ။

ပ္ဍဲသ္ကုတ်ဂၠံၚ် ထဝါဲ−ထဳခဳ ပ္ဍဲရးတၞၚ်သဳဂှ်ဝွံ အကြာဒပ်ကံၚ်ဇြဳပၞာန်ကဵု ဒပ်ပၞာန်ဗၠးၐးကောန်ဂကူကရေၚ် KNLA ၊ ဒပ်စဵုဒၞါညးဍုၚ်ကွာန်ဒေသတံဂှ် ခြာဟွံလအ်ဟီုဂွံ ပေါဲဗ္တိုက်က္တဵုဒှ်ဒၟံၚ်တုဲ လ္ပာ်ကံၚ်ဇြဳပၞာန်တံ မဒးပြဟ်လလုဲချိုတ်အာ ဂၠိုၚ်ဒၟံၚ်ရ။

ပရိုၚ်−သြၚ်လောန်တိုၚ်(မ်)