မတ်မလီု၊ မာတ် (၂၉)
အပ္ဍဲဍုၚ်မတ်မလီု၊ ဆေၚ်ထဝ်လ္ၚဵုတံဂှ် ဂကောံဗျူသဝ်ထဳ သၟဝ်တဲကံၚ်ဇြဳပၞာန်တံ PDF ဂးတုဲ ပလံၚ်လိက်ဘပဠ ဗက်အာတ်ဒုၚ်ဒၟံၚ်သြန်သၠုဲတံရဂှ် ညးမစုက်လုက်ကဵု တၠဆေၚ်ထဝ် ဒးဒုၚ်အာတ်လဝ်သြန်တံ ဟီုရ။
ဂကောံဗျူသဝ်ထဳတံ ပ္ဍဲအရာဗက်အာတ်သြန်ဂှ် PDF ဂးတုဲ နကဵုလိက်မွဲတၞး မကမ်မွဲမ ပလံၚ်ဗစိုပ် အာတ်ဒၟံၚ်တံလေဝ်နွံတုဲ ဆေၚ်ထဝ်လ္ၚဵုတံဂှ် နူကဵု Message၊ Viber တံ မွဲကဆံၚ် ပလံၚ်လိက်တုဲ အာတ်မိက်ကၠုၚ်သြန်သၠုဲရ။
ပ္ဍဲအရာအာတ်မိက်သြန်သၠုဲဗီုဏံဂှ် ဆေၚ်ထဝ် မွဲဆေၚ်မ္ဂး သွက်ဂွံကဵု သြန်ဒ္ကေဝ် (၁၅၀၀) ကိုဋ်စၟံစၟံတုဲ သြန်မအာတ်မိက်လဝ်တံဂှ် ယဝ်ရဟွံကဵုမ္ဂး ကုကမၠောန်ပရေၚ်ပိုန်ဒြပ်ဂမၠိုၚ် ကေုာံ ကောန်သ္ၚိကၟိန်တံဂှ် ကလေၚ်အာတဲ ဗွဲမသ္ကာတ်မြဟ်ရောၚ်ဂှ် ဘပဠကၠုၚ်ရ။
ဟိုတ်ဒၟါနူ အာတ်မိက်ကၠုၚ် သြန်သၠုဲသာ်ဏံဂှ်ရ ဆေၚ်ထဝ်တံ အာတေၚ်ဇရေၚ်ဒပ်ဗၠာဲသၟိၚ်တံတုဲ ဒပ်ဗၠာဲသၟိၚ်တံ ဂၠိုက်ဂၠါဲစမ်ရံၚ်ဂှ် ဒှ်ဒၟံၚ် ဂကောံဗျူသဝ်ထဳတံတုဲ သ္ကဵုမံၚ်လဝ် သ္ၚိတ်တ်ရဂှ် ညးမစုက်လုက်ကဵု တၠဆေၚ်ထဝ်တံ မွဲတၠ ဟီုရ။
ဂကောံဗျူသဝ်ထဳတံဝွံ ဒှ်ဒၟံၚ်ဂကောံမွဲ မဒက်ပ္တန်လဝ်ကဵု ရဲထံက်ဂလာန်ဒပ်ပၞာန်တံ၊ ကောန်သ္ဂံၚ်တြေံတြေံတံ ကေုာံ ကောန်ဗော် ဖောအ်ဗြေဝ်ခိုၚ်ကၠိုက်တံတုဲ ဒပ်ကံၚ်ဇြဳပၞာန်တံ ပ္တိတ်ကဵုလဝ် လွဟ်လက်နက်တံ မဒှ်ရ။
ပ္ဍဲတွဵုရးဍုၚ်မန်ဂှ် ဂကောံဗျူသဝ်ထဳတံဝွံ ကၠောန်သ္ပဖံက်ခတိုဟ် ပလီုပလာ်လဝ် ရုၚ် NLD မၞုံ အပ္ဍဲပွိုၚ်ဍုၚ်ကျာ်ထဝ်၊ ၐဳကလေၚ်၊ ၐါသွာၚ် ကေုာံ သဓီု တံဂှ်ကီု အပ္ဍဲဍုၚ်မတ်မလီုဂှ်လေဝ် သ္ၚိဒၟံၚ်ညးထံက်ဂလာန် ဗော် NLD တံဂှ် ဗာန်စုတ်လဝ် လိက်ဘပဠတုဲ ပွဖံက်ခတိုဟ်တံ ကၠောန်ၐိုတ်လဝ်ရ။
ပရိုၚ်−သြၚ်လောန်တိုၚ်(မ်)