မတ်မလီု၊ ဒဳဇြေမ်ဗာ (၆)
နကဵုကံၚ်ဇြဳပၞာန် သွက်ဂွံတိတ်အာ နူသွာၚ်ပရေၚ်ဍုၚ်ကွာန်ဒတုဲဂှ်ကဵု သွက်ဂွံပလီုသၞောဝ်သ္ဇိုၚ်ဒက်ပ္တန်ကၟိန်ဍုၚ် ၂၀၀၈ တံ မပါလုပ် တၚ်အာတ်မိက် (၅) တၚ်တံဂှ် ယဝ်ရဒုၚ်တဲမ္ဂး ဒဒှ်ရပံက်လဝ်ဂၠံၚ် ပရေၚ်ဆဵုဂဗသဳကၠဳရောၚ်ဂှ် သမ္မတယာယဳ NUG ဒူဝါလယှဳလ ဟီုဂးလဝ်ကီုလေဝ် နတဲဏံ ဒှ်ကၠုၚ်ဟွံမာန်ပုဟ်ဂှ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စပ်ကဵုဂၠံၚ်တရဴ ပရေၚ်ဆဵုဂဗသဳကၠဳဂှ်တုဲ သမ္မတယာယဳ အလဵုအသဳညဳသၟဟ်ဂကူ ဒူဝါလယှဳလ အခိၚ်ဟီုမြော်ဂလာန် ပ္ဍဲပေါဲ Global Broadcast ကေုာံ Reuters Next Leadership Summit ရိုက်တာ မကၠောန်ဗဒှ်လဝ် ပ္ဍဲဂိတုဒဳဇြေမ်ဗာ (၁) တုဲကၠုၚ်တေံဂှ် ဟီုဂးလဝ် သာ်ဏံရ။
ပ္ဍဲကဵုဂှ် နကဵုကံၚ်ဇြဳပၞာန် ယဝ်ရမိက်ဂွံဆဵုဂဗသဳကၠဳမ္ဂး သွက်ဂွံကဵုတၚ်ဒုၚ်လျိုၚ် သ္ဂောံတိတ်အာ နူကဵုပရေၚ်ဍုၚ်ကွာန် ဒတုဲဂှ်ကီု၊ သွက်ဂွံပလီု သၞောဝ်သ္ဇိုၚ်ဒက်ပ္တန် ၂၀၀၈ ဂှ်ကီု ၊ သွက်ဟွံဂွံပလာပ်ပထုဲ အရီုအဗၚ် ပရေၚ်ဗ္စာရဏာမၞိဟ် နူဍုၚ်သ္အာၚ်တံကီု၊ သွက်ဂွံဒေါအ်ဒေၚ်ကဵု ပွမဂစိုတ်ဒၟံၚ် လ္တူညးဍုၚ်ကွာန်တံဂှ်ကီု၊ သွက်ဂွံဒုၚ်ကဵုတဲ ပရေၚ်ဍုၚ်သ္အာၚ် မလုပ်အကြာရေၚ်တၠုၚ်တံ ဒှ်တမ် တၚ် (၅) တၚ်ပါလုပ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဒံက်တာသာၚ်ကျဳဇြေန်သဵုဂှ် ကံၚ်ဇြဳပၞာန်ဂှ်လေဝ် အဃောမဆဵုဂဗကဵု ညးစၞးတၟေၚ်အာဇြဳယာန်ဂှ် ညံၚ်ဂွိုအ်သီပလီု ကံၚ်ဇြဳပၞာန်ဂှ်ကီု၊ သွက်ဂွံဆဵုဂဗသဳကၠဳ နူကဵုသၟဝ်သၞောဝ်သ္ဇိုၚ် ၂၀၀၈ ဂးတုဲ ဟီုဂးလဝ် တၚ် (၃) တၚ်ဂှ်ရ NUG ကဵု ကံၚ်ဇြဳပၞာန် ဆဵုဂဗသဳကၠဳဂှ်ဝွံ နတဲဏံ ဂွံဒှ်ကၠုၚ်မာန် ဟွံမွဲပုဟ်ဂှ် သ္ၚဳဂၠိပ်လဝ်ရ။
“နတဲဏံ ဒှ်ဟွံမာန်ပုဟ်ဂှ် ဟီုဂွံရ၊ မူဒှ်ရောဟီုတှ်ေ ကံၚ်ဇြဳပၞာန် မွဲလ္ပာ်တေံလေဝ် အခိၚ်ဆဵုဂဗလဝ်ကဵု ညးစၞးတၟေၚ်အာဇြဳယာန်ဂှ် လ္ပာ်ဍေံတံ တၚ်အာတ်မိက်သ္ဇိုၚ် (၃) တၚ်နွံရ၊ သွက်ဂွံသ္ပစၟတ်သမ္တီ သွက်ဟဂွံသီပလီု ကံၚ်ဇြဳပၞာန်တံ၊ သွက်ဂွံသဳကၠဳ သၟဝ်သၞောဝ်သ္ဇိုၚ် ၂၀၀၈ တံ မဒှ်ရ၊ ယဝ်ရဒုၚ်တဲၝတံဏံမာန်မ္ဂး လ္ပာ်ဍေံတံ သဳကၠဳဏောၚ်ဂှ် ဟီုလဝ်ရ၊ လၟုဟ်ဂှ် နူကဵုလ္ပာ်တေံ ကလေၚ်ဟီုကၠုၚ်ဂှ် ဒှ်ဒၟံၚ်သဘဴဒစဵုဒစး ကဵုၝတံဏံဂှ်ရ ဍေံတံ သဳကၠဳအာ ဟွံသေၚ်ပုဟ်” သာ်ဝွံ သ္ဂးရ။
အခိၚ်လၟုဟ်ဂှ် ပေါဲဗ္တိုက် အကြာဒပ်ကံၚ်ဇြဳပၞာန်ကဵု ဂကောံဒပ်စဵုဒၞါညးဍုၚ်ကွာန် သၟဝ်တဲ NUG တံဂှ်ဝွံ သ္ကာတ်မြဟ်ဒၟံၚ် အလုံကၟိန်ဍုၚ်ပြးဇးတုဲ လ္ပာ်ကံၚ်ဇြဳပၞာန်ဝွံလေဝ် ကလေၚ်ခၠေဝ်ပလန်ဒၟံၚ် ဗွဲမသ္ကာတ်မြဟ်ရ။
ဖက်ဆောညးအုပ်ကာ ဗော်ဂအုပ်ဂကောံကောန်ဂကူပအိုဝ် ဥူဃောန်ထောန်ယှိုဲဂှ်လေဝ် အတိုၚ်အကာဲအရာလၟုဟ်မ္ဂး လ္ပာ်ကံၚ်ဇြဳပၞာန် သွက်ဂွံဒုၚ်တဲ တၚ်အာတ်မိက် NUG တံ ဟွံမွဲဂှ်ရ ပရေၚ်ဆဵုဂဗသဳကၠဳ ဂွံဒှ်ကၠုၚ် ဟွံမွဲဏီပုဟ်ဂှ် ဟီုရ။
“ ဒးဟီုလညာတ်အဲမွဲဓဝ်တှ်ေ ဟွံစိုပ်လ္တူဂၠံၚ်ဍာန် ပ္ညဳပ္ညပ်ဂၠါဲသွဟ်တံဏီပုဟ်ဂှ် ညာတ်ရ၊ နွံမံၚ်ပၟိက်ဏီဂှ် မိက်ဂွံဟီုရ၊ ပ္ဍဲပရေၚ်ဍုၚ်ကွာန်ဗၟာဂှ် ဒပ်ပၞာန် ဂွံတိတ်အာလွာဲဂှ်ဂှ် ဟွံလောဲပုဟ်၊ ဒပ်ပၞာန်ဂှ် ပလေဝ်ပလေတ်အာ သၞောဝ်သ္ဇိုၚ် ၂၀၀၈ ဂှ်ရောၚ် ကဵုလဝ်ကတိရ၊ သီပလီုအာရောၚ်ဂှ် ဟွံဟီုလဝ်ပုဟ်၊ ဂၠံၚ်ဍာန်ဗီုပြၚ် သွက်ဂွံဆဵုဂဗသဳကၠဳ၊ ပ္ညဳပ္ညပ်ဂၠါဲသွဟ် ဟွံသေၚ် ဒှ်ဗီုပြၚ် ပ္တိတ်သၟာန်မ္ဂးတှ်ေ လ္ပာ်ဒပ်ပၞာန်တေံလေဝ် ဒဵုဗၞတ်ဗ္ၜတ်မွဲမွဲ သွက်ဂွံဒုၚ်တဲ ဆန္ဒဟွံမွဲပုဟ်ဂှ် ညာတ်ကေတ်ရ” သာ်ဝွံ ဥူဃောန်ထောန်ယှိုဲ နူဗော်ဂအုပ်ဂကောံ ကောန်ဂကူပအိုဝ်သ္ဂးရ။
စပ်ကဵုဂလာန် သမ္မတယာယဳ ဒူဝါလယှဳလ ဟီုဂးလဝ် ဒဒှ်ရပံက်လဝ်ဂၠံၚ် သွက်ဂွံသဳကၠဳဂှ်တုဲ လ္တူတၚ်အာတ်မိက် NUG ဂှ် နကဵုကံၚ်ဇြဳပၞာန် ဖ္ဍိုက်ဗပေၚ်ကဵုတုဲ သ္ဂောံသဳကၠဳကၠုၚ် ဒှ်ဟွံမာန်ပုဟ်ဂှ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်တံ သ္ၚဳဂၠိပ်လဝ် ညဳညဳသာသာရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဟွံမိက်ထ္မံက်ယၟုမွဲတၠဂှ် တၚ်အာတ်မိက် NUG တံဂှ်ဝွံ သွက်ဂွံဒှ်ကၠုၚ် နတဲဏံ ဟွံလောဲသွာဏီဂှ်ရ သွက်ဂွံဖအောန်ဖျေံ အရာညးဍုၚ်ကွာန်တံ မဒးဂိဒၟံၚ်တံဂှ် သီု (၂) ဂကောံ ဒးဂၠါဲဂၠံၚ်ဍာန် မခိုဟ်အိုတ်မွဲဂှ် နွံပၟိက်ဒၟံၚ်ယျ သာ်ဝွံ ထံက်ထ္ၜးလဝ်ရ။
“ညအ်ဂှ် နကဵုပရေၚ်အာတ်မိက်တံ၊ ပရေၚ်လုပ်စိုပ်ဆိုက်ညောန်တံဂှ် ဒးမံၚ်ရ၊ ဆ္ဂး သွက်ဂွံတိတ်အာ နူကဵုပရေၚ်ဍုၚ်ကွာန်ဂှ် ဒပ်ပၞာန် ဒးကဵုတၚ်ဒုၚ်လျိုၚ်ရောၚ်ဟီုဂှ် နကဵုဒဳမဝ်ကရေဇြဳတှ်ေ ဒပ်ပၞာန်ဂှ် ဒးစဴ ဒၞါဲဒပ်ပၞာန်ဏောၚ်လေဝ်၊ ဆ္ဂး အကာဲအရာလၟုဟ်ဂှ် ဟွံဂွံရပုဟ်၊ မူဟိုတ်ရောဟီုတှ်ေ ပ္ဍဲကဵုသၞောဝ်သ္ဇိုၚ် ၂၀၀၈ ဂှ် ၂၅ တၟံကၠံဂှ် ပါဒၟံၚ်တုဲတုဲရ၊ ပါဒၟံၚ်တုဲတုဲဟီုတှ်ေ ဒပ်ပၞာန်ဂှ်လေဝ် ဍေံတံ ပါဂှ်ဒးပါဏောၚ် ဒုၚ်ဂိုၚ်ကေတ်လဝ်တုဲတုဲရ၊ ညအ်တှ်ေ ဒးဂၠါဲသွဟ် သီုၜါလ္ပာ်ဒတုဲဖဵုမနွံမွဲဂှ်ဏောၚ်၊ တၚ်ဒုၚ်လျိုၚ် ဒးတိတ်နူကဵု ပရေၚ်ဍုၚ်ကွာန်ဂှ် လ္ပာ်တေံလေဝ် ကဵုဟွံသေၚ်ပုဟ်၊ တၚ်ဏံဂှ် သဳကၠဳလေဝ် ပြေပြံၚ်ဟွံသေၚ်တုဲ အာတ်မိက်ကေတ်အတေၚ်လေဝ် ဟွံဂွံပုဟ်” သာ်ဝွံ ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂကောံဇြဟတ်ပၠန်ဂတးတံဂှ် ယဝ်ရပတုဲထောံ ပရေၚ်ပၠန်ဂတးဏံ နကဵုသဳကၠဳဆဵုဂဗဟီုမ္ဂး တၚ်မပါလုပ် ပ္ဍဲသၞောဝ်သ္ဇိုၚ် ၂၀၀၈ မကေတ်အရေဝ် ပရူပရာမဆက်စပ်ကဵုအတိက် ဟွံဂွံတံဂှ်ဝွံ ဟိုတ်နူဒှ်ဒၟံၚ်ဇွောံစဵုဒၞါ အရာကံၚ်ဇြဳပၞာန်တံ မကလိလောန်လဝ်တံဂှ်တုဲ သွက်ဂွံပလီုထောံ သၞောဝ်သ္ဇိုၚ်ဂှ် ဒးကၠောန်သ္ပ ဟွံဒေါအ်ဟွံဂွံရောၚ်ဂှ် သ္ဂးအိုတ်ရ။
အလုံကၟိန်ဍုၚ်မွဲ အပ္ဍဲကာလ ဒပ်ပၞာန်သီအဝဵု ပွိုၚ် (၂၂) ဂိတုဂှ် ပေါဲဗ္တိုက်ရပ်လွဟ် အပံၚ် ဗ္ဒါဲ (၈၀၀၀) က္တဵုဒှ်လဝ်ရ၊ ဟိုတ်နူပေါဲဗ္တိုက်ဏံတုဲ လၟိဟ်မၞိဟ် (၃) ပြကောဋိကိုဋ်ပြၚ်ဝွံ ဒးထောံလသာသ္ၚိဌာန် ဂြိပ်ဒဴဒၟံၚ်ဂှ် ဂကောံသုတေသန ISP-Myanmar လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)