ကောံဓရီု EAOs တံတိုန်စိုပ်သီုဖအိုတ်ဂှ် နွံဒၟံၚ်ပ္ဍဲကဆံၚ် ဆၜိုတ်ဂွံစဆိုက်ညောန်ညိကီု PPST ဟီု

လ္ဂုၚ်၊ ဒဳဇြေမ်ဗာ (၆)

သွက်ဂွံသောၚ်ကလး အကြေပ်အဂြတ်ပရေၚ်ဍုၚ်ကွာန်မာန် ကောံဓရီု EAOs တံ တိုန်စိုပ်သီုဖအိုတ်ဂှ်ဝွံ ဒှ်ဆကဆံၚ် စဂွံလုပ်စိုပ်ဆိုက်ညောန်ညိကီုဂှ် ဂကောံက္ဍိုက်ပ် လၟေၚ်ကမၠောန်ပရေၚ်ၜိုဟ်လလမ် (PPST) ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

သွက်ဂွံကၠောန်ဗဒှ် ပေါဲသဳကၠဳပရေၚ်ဍုၚ်ကွာန် ဂကောံရပ်လွဟ်ကောန်ဍုၚ်အရၚ် မထ္ပက်လဝ်စၟတ်တဲ ဒေါအ်ပန်ပှော် ကၠာသၞာံ ၂၀၂၂ ဟွံဂွံအိုတ်ဏံဂှ်ကီု သီုကဵု ဂကောံရပ်လွဟ်ကောန်ဍုၚ်အရၚ် EAOs ဟွံဂွံထ္ပက်လဝ်စၟတ်တဲတံ ဂွံပါလုပ်သီုဖအိုတ်မွဲဂှ် ဂ္စါန်ဒၟံၚ်ရ။

ဂကောံ EAOs မပါလုပ် ပ္ဍဲဂကောံက္ဍိုက်ပ်လၟေၚ်ကမၠောန်ပရေၚ်ၜိုဟ်လလမ် (PPST) တံဝွံ သွက်ကောံဓရီုတိုန်စိုပ်သီုဖအိုတ်ဂှ် ရေၚ်တၠုၚ်ကေတ်ဒၟံၚ်အဆက် ကဵုဂကောံ EAOs တၞဟ်ဟ်တံဂှ် ညးမၞုံအခေါၚ်ဟီုဂး PPST သ္ကိုပ်ဗိုလ်ဇၞော် သဝ်ကျဝ်ညောအ် ဟီုရ။

“သွက်ဂွံတတ်ကၠောံ အကြေပ်အဂြတ်ပရေၚ်ဍုၚ်ကွာန်လၟုဟ်မာန်ဂှ် ပ္ဍဲကဵုဂကောံရပ်လွဟ် ကောန်ဍုၚ်အရၚ်တံဂှ်လေဝ် ပ္ဍဲကဵုဒၞါဲတၚ်ရန်တၟံနွံ သွက်ဂွံကၠောန်ကောံဓရီု EAOs တံ ပါလုပ်အိုဿီုဂှ် နကဵု PPST ကဵုဒှ် ဟွံသေၚ်မ္ဂး ဂကောံ EAOs နူကဵု PPST မွဲမွဲတံကဵုဒှ် ဗီုညးကဵုညး ဂ္စါန်ကၠောန်ဒၟံၚ်ဖိုဟ်ရ” သာ်ဝွံ ညးသ္ဂးရ။

သွက်ဂွံဒှ်လွေဟ် Joint Ownership ဂကောံ EAOs တံ ပါလုပ်ပံၚ်ကောံသီုဖအိုတ်ဂှ် နကဵုဂကောံ မစဆိုက်ညောန်မွဲမွဲကဵုဒှ် ဟွံသေၚ်မ္ဂး နကဵုဂကောံကလောံကဵုဒှ် လ္တူမပ္ညဳဂွံတံဂှ် ဒုၚ်သ္ဇိုၚ်ကဵုအခိၚ်၊ ဒၞါဲဒေသ သီုဖအိုတ် မဒုၚ်တဲမာန်ဂှ်တုဲ ရေၚ်တၠုၚ်အာရောၚ်ဂှ်လေဝ် ဟီုရ။

အခိၚ်လၟုဟ်ဂှ် နကဵုဂကောံက္ဍိုက်ပ် လၟေၚ်ကမၠောန်ပရေၚ်ၜိုဟ်လလမ် (PPST) သွက်ဂွံလဴထ္ၜးကဵု သွဟ်မခၠေဝ်ပၠန်ကၠုၚ် နူကဵုဂကောံရပ်လွဟ်ကောန်ဍုၚ်အရၚ် (EAOs) မွဲဂကောံတုဲမွဲဂကောံ ဗွဲလစှ်ေဂှ် အခိၚ်ပြဟ်ဒၟံၚ်ဏီဂှ် သ္ဂးရ။

မွဲလ္ပာ်ပၠန်ဂှ် ပေါဲသဳကၠဳပရေၚ်ၜိုဟ်လလမ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် မကော်ဘိက်လဝ်ဂှ် ဂကောံရပ်လွဟ်ကောန်ဍုၚ်အရၚ် ထ္ပက်လဝ်စၟတ်တဲ NCA (၇) ဂကောံကဵု ဂကောံရပ်လွဟ်ကောန်ဍုၚ်အရၚ် ဟွံဂွံထ္ပက်လဝ်စၟတ်တဲ (၃) ဂကောံတံ တိုန်စိုပ်သဳကၠဳလဝ် စဵုကဵု (၂) ဝါရ။

သွက်ဂွံဒေါအ်ပန်ပှော် အကြာဒပ်ကံၚ်ဇြဳပၞာန်ကဵု ဒပ်ပၞာန်ရခေၚ် (AA) ပေါဲဗ္တိုက် ကလေၚ်မွဲဝါပၠန်တံ မသ္ကာတ်မြဟ်ဒၟံၚ်ဂှ် နကဵုပရေၚ်ပ္ညဳပ္ညပ်လုပ်အကြာ မေဿတာယဵုဟဳဇြာဇြာကာဝါဂှ် စနူကဵုဂိတုနဝ်ဝေမ်ဗာ (၂၆) တုဲကၠုၚ်တေံတုဲ လိက်ကသုက်ဟွံပါမွဲသာ် တုပ်လဝ်စိုတ် သ္ဂောံဒေါအ်ပန်ပှော်ရ။

ဆ္ဂး ဒပ်ကံၚ်ဇြဳပၞာန်ဝွံ ဒဵုကဵုအခိၚ်လၟုဟ် အလုံမွဲကၟိန်ဍုၚ်ဂှ် ဆက်က္တဵုဒှ်ဒၟံၚ် ပေါဲဗ္တိုက် ကုဂကောံထ္ပက်လဝ် NCA လ္ၚဵုတံ ကေုာံ ဂကောံရပ်လွဟ်ကောန်ဍုၚ်အရၚ် ဟွံဂွံထ္ပက်လဝ်စၟတ်တဲတံ မပါလုပ် သီုကဵုဂကောံဒပ်စဵုဒၞါညးဍုၚ်ကွာန် (PDF) တံရ။

အပ္ဍဲအခိၚ်ကာလဒပ်ပၞာန်သီအဝဵု ပွိုၚ် (၂၂) ဂိတုဂှ် ပ္ဍဲကဵုပေါဲဗ္တိုက်ရပ်လွဟ် အလုံကၟိန်ဍုၚ်မွဲ က္တဵုဒှ်လဝ် (၇၈၀၀) ပြၚ်ဂှ် ပေါဲဗ္တိုက် အကြာဒပ်ကံၚ်ဇြဳပၞာန်ကဵု EAOs တံဂှ် က္တဵုဒှ်လဝ် (၄၅၀၀) ပြၚ်ရောၚ် ဂကောံသုတေသန ISP-Myanmar လလောၚ်ပ္တိတ်လဝ် ပ္ဍဲဂိတုနဝ်ဝေမ်ဗာ (၂၂) တုဲကၠုၚ်တေံရ။

ပရိုၚ်−သြၚ်လောန်တိုၚ်(မ်)