မတ်မလီု၊ ဒဳဇြေမ်ဗာ (၇)
ပ္ဍဲဗ္ဒါဲ ဒၞါဲတိကိုန်စဳမာန် သၞေဟ်က္ၜၚ်ကဵု သၞေဟ်က္ၜၚ်ကျာ ကဆံၚ်ဂၠးတိ ကံၚ်ဇြဳပၞာန်တံ မသိုၚ်ခၞံအာ ဗ္ဒါဲဍုၚ်မတ်မလီု၊ တွဵုရးဍုၚ်မန်ဂှ် ညးမစုက်လုက်ကဵု ကံၚ်ဇြဳပၞာန်လ္ၚဵုတံဝွံ ကေတ်လဝ်တိ ကၠာတဲတုဲ သွံစဒၟံၚ် ဂအာၚ်တိဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သၞေဟ်က္ၜၚ်ကျာ ကဆံၚ်ဂၠးတိ ကံၚ်ဇြဳပၞာန် မကၠောန်ဂှ်ဝွံ ရန်လဝ် သွက်ဂွံသိုၚ်ခၞံ ဗ္ဒါဲကွာန်ကအ်ပြာၚ် ၊ ပွိုၚ်ဍုၚ်မုဟ်ဍုၚ်တုဲ သၞေဟ်က္ၜၚ်ကဆံၚ်ဂၠးတိဂှ် စၟတ်လဝ်ဒၞါဲတိ သွက်ဂွံသိုၚ်ခၞံ အကြာကွာန်ဝါကလိကဵု ကွာန် (ဘလောက်ညောၚ်ဝိုၚ်း) မစုက်ကဵု ဂၠံၚ်ပၞော်တိတ်ၜဳတံ မဒှ်ရ။
အခိၚ်လၟုဟ်ဂှ် ကောန်ဂကောံဒပ်ကံၚ်ဇြဳပၞာန်တံကီု သီုကဵုမၞိဟ်မစုက်လုက်ကဵုကံၚ်ဇြဳပၞာန်လ္ၚဵုတံဂှ်ဝွံ ကေတ်လဝ်တိဗ္ၚ မၞုံဗ္ဒါဲကိုန်စဳမာန်တံဂှ်တုဲ သွံစဒၟံၚ် ဂအာၚ်တိတုဲ တိဗ္ၚညးဒေသ ဒၟံၚ်ပ္ဍဲကွာန်တံဂှ်လေဝ် ကဵုၚုဟ်ခိုဟ်ဟ်တုဲ ရာန်ကေတ်ဒၟံၚ်ဂှ် ညးဒေသမွဲတၠ ဟီုရ။
“လ္ပာ်ပိုယ်တံဟီုတှ်ေ ဂအာၚ်ကၠအ် တိဗ္ၚလၟုဟ်တံဂှ်တှ်ေ ပါလုပ် သီုသ္ကိုပ်တမ်ဒပ်ရ၊ ပ္ဍဲကဵုမၞိဟ်ကၠုၚ် သွက်ဂွံပံက်ဂအာၚ်ကၠအ်တံဂှ်တှ်ေ မၞိဟ်ဂှ်လေဝ် ပါရ၊ ဍေံတံဂှ် ဥပမာ မွဲဨကတှ်ေ ကၠာတေံ တိဗ္ၚမၞုံၜိုတ် (၄၀) ၊ (၅၀) တံဂှ် ဍေံတံ ကဵုထောံ သၟာဗ္ၚတံ ၜိုတ် (၁၀၀) ပြၚ်ရ၊ ကဵုဗီုဏံတုဲ ဍေံတံဂှ် (၄၀−၆၀) တံ (၃၀−၇၀) တံ ဗီုပြေပြံၚ် ပံက်ဒၟံၚ်ဂအာၚ်တံရ” သာ်ဝွံ သ္ဂးရ။
တိဗ္ၚ ညးမစုက်လုက်ကဵု ကံၚ်ဇြဳပၞာန်တံ ပံက်ဂအာၚ်တုဲ သွံစဒၟံၚ်တံဂှ်ဝွံ ဟိုတ်နူညးဒေသတံ ဟွံဂွံတီလဝ် အခေါၚ်သုၚ်စောဲ ဂၠံၚ်ဍာန်တၞဟ်ဟ်တံ နွံ၊ ဟွံမွဲဂှ်ရ နကဵုညးဒေသလ္ၚဵုတံ ဟွံကၠိုဟ်တုဲ သိုၚ်သ္ၚိဂွံဂးတုဲ ရာန်ဒၟံၚ်တံ နွံဂှ်ရ ဒးဂိကၠုၚ် နွံမာန်ဂှ် သ္ဂးရ။
အခိၚ်လၟုဟ်ဂှ် ညးမစုက်လုက်ကဵု ကံၚ်ဇြဳပၞာန်တံဝွံ တိဗ္ၚ ကြပ်ကဵုကွာန်တံဂှ် ကဵုၚုဟ် မွဲဨက စဵုကဵု (၂၅၀) ကိုဋ်ဒ္ကေဝ် ရာန်ကေတ်တုဲ ပါ်ပန်ဂအာၚ် ပန်ကရေက်တုဲ ကၠောန်သ္ပကလေၚ်သွံစဒၟံၚ်တံဂှ် ညးဒေသမွဲတၠ ဟီုရ။
“သၟာဗ္ၚ ကြပ်ကဵုကွာန်တှ်ေ ကဵု မွဲဨက (၂၅၀) ကိုဋ်ရ၊ ဂးလဝ် ကမ္ပဏဳတံ ရာန်ကၠုၚ်ရ၊ သ္ကိုပ်အုပ်ဓုပ်တံ ဍေံတံ လဴထ္ၜးရ၊ ကဵုဂအာၚ်တၟိရ၊ အဓိက ဂအာၚ်ဣစဳတံ လ္ပာ်သၟဝ်ဂမၠိုၚ်ဂှ် သေဌဳတံ ကၠုၚ်ရာန်ဏာရ၊ ညးအုပ်ဓုပ်တံ ဟီုဂှ်တှ်ေ သေဌဳတံ ရာန်တုဲ ကလေၚ်ဖျေံဒၞါဲပၠန်၊ မွဲဨကဂှ် ကဵု (၂၅၀) ကိုဋ်၊ ကဵုတုဲတှ်ေ မွဲဨကဂှ် ကလေၚ်ပံက် (၄) ဂအာၚ် (၄)ကရေက်တုဲ မွဲဂအာၚ်မ္ဂး ကလေၚ်သွံကဵု (၈၀) ကိုဋ်ရ၊ မၞိဟ်ရာန်ဂှ်လေဝ် ရာန်အိုတ်ရ၊ ပြဟ်ဟ်ဏံ လ္ပာ်ဂၠံၚ်ဇၞော် မုဟ်ဍုၚ်ကအ်ပြာၚ် လ္ပာ်တေံ ဗ္ဒါဲရုၚ်သိုဟ်ပၠိုတ်ပၟတ်တံဂှ် သွံတိတ်အာယျ၊ ဒၞါဲသုသာန် မကလေၚ်ပံက်လဝ် ဂအာၚ်ဂှ်လေဝ်” သာ်ဝွံ သ္ဂးရ။
ညးမစုက်လုက်ကဵု ကံၚ်ဇြဳပၞာန်တံဝွံ သွက်ဂွံရာန်ကေတ် တိဗ္ၚတံ ကၠာတဲဂှ် ကဵုၚုဟ်ခိုဟ်ဟ်တုဲ ဗက်ရာန်ကေတ်ဒၟံၚ် တိဗ္ၚ မၞုံအပ္ဍဲကွာန်တံဂှ်တုဲ နကဵုသၟာဗ္ၚလ္ၚဵုတံဂှ် သွံကဵုဒၟံၚ်တံ နွံတုဲ သၟာဗ္ၚလ္ၚဵုတံဂှ်တှ်ေ မၚ်ကျောဝ်ဒၟံၚ် အကာဲအရာတံဂှ် ဂွံတီကေတ်ရ။
ကံၚ်ဇြဳပၞာန်ဂှ် သွက်ကိုန်စဳမာန် သၞေဟ်က္ၜၚ်ကျာ ကဆံၚ်ဂၠးတိ မသိုၚ်ခၞံအာတၟိ ဗ္ဒါဲဍုၚ်မတ်မလီုဂှ် ရာန်လဝ် တိဨက အပံၚ် (၄၃၀၀) ပြၚ်တုဲ တိဨက မၞုံပၟိက် သွက်ကိုန်စဳမာန် သၞေဟ်က္ၜၚ်ကဆံၚ်ဂၠးတိဂှ် ရန်လဝ် (၃၆၀) ပြၚ်တုဲ နဒဒှ်သြန်လေဲ သွက်တိဗ္ၚဂှ် စဳဇန်လဝ် သွက်ဂွံကဵုကေတ်အာ သြန် (၂၇) ဗဳလျာန်ပြၚ်ဂှ် ဟီုဂးလဝ်ရ။
ကံၚ်ဇြဳပၞာန်ဂှ် သွက်ကိုန်စဳမာန် သၞေဟ်က္ၜၚ်ကၟိန်ဍုၚ်နာနာကဵု သၞေဟ်က္ၜၚ်ကျာ ကဆံၚ်ဂၠးတိတံဂှ် ပ္ဍဲဂိတုဒဳဇြေမ်ဗာ (၁၀) တေံ ဒက်ပ္တန်လဝ် ကမ္မတဳ ဗဟဵုကောပ်ကာဲထ္မံက်ရုပ်ရဴ ကိုန်စဳမာန် သီုဝန်ဇၞော်ကၟိန်ဍုၚ် သၟဝ်တဲကံၚ်ဇြဳပၞာန်တံ ပါလုပ်ဂှ်ရ။
ကိုန်စဳမာန် ကံၚ်ဇြဳပၞာန် မကၠောန်ဗဒှ် သီု (၂) ဂှ်ဝွံ ဒက်ကမ္မတဳတုဲ လအ်ဂွံစဵုကဵု ဗ္ဒါဲ (၁) သၞာံဂှ် ထ္မံက်ရုပ်ရဴ ကမၠောန်ဟွံမာန်ဏီရ။
ကမ္မတဳသ္ပစၞး ကၠတ်ထဝ်တွဵုရးဍုၚ်မန်ဂှ် ကိုန်စဳမာန်ကံၚ်ဇြဳပၞာန်ဝွံ ဒဒှ်ရ ဒှ်ဆၜိုတ်ကိုန်စဳမာန်တၠအဝဵု မၞိဟ်မွဲဂကောံဓဝ် ဂွံခိုဟ်စတံဂှ်ကဵု ဟိုတ်နူဒှ်အလဵုအသဳ လုပ်သၞောဝ်ဟွံသေၚ်ဂှ်ရ ပရေၚ်သီဂိုၚ်တိဗ္ၚ၊ ပရေၚ်သွံတြး ကေုာံ ပရေၚ်လှဲပြံၚ်သၠာဲတၠ ဍေံတံဂှ် ဟွံလုပ်သၞောဝ်ပုဟ်ဂှ် လလောၚ်တြးလဝ် ပ္ဍဲဂိတုဂျူလာၚ် (၁၁) တေံရ။
ပရိုၚ်−သြၚ်လောန်တိုၚ်(မ်)