နျူဒေလဳ၊ ဒဳဇြေမ်ဗာ (၇)
အလဵုအသဳအိန္ဒိယဝွံ ကဵုက္ဍိုပ်ချပ်ဗ္စာ ကုတၚ်နွံပၟိက် ကၠေၚ်စၞပၟတ် ဇကုတံတုဲ ဆက်ရာန်ကေတ်အာ ကၠေၚ်ဍေန် ဇရေၚ်ရုယှာတံဏောၚ်ဂှ် ဟီုဂးကဵုလဝ်ဒမြိပ်အရေဝ်ရ။
ကြဴနူဆဵုဂဗသဳကၠဳကဵု ဝန်ဇၞော်ကာဍုၚ်သ္အာၚ် ဂျာမနဳ မကၠုၚ်စိုပ်ဂေတ်ဝေၚ်ဒၟံၚ်ဂှ်တုဲ ဝန်ဇၞော်ကာဍုၚ်သ္အာၚ်အိန္ဒိယ သူဘရာ မာန်ယာန် ဂျာရဳယှာန်ကာ ဟီုဂး ကဵုလဝ်တၚ်စၟတ်သာ်ဏံရ။
ကၠေန်ဍေန်ရုယှာ မွဲစေဝ် သမဂ္ဂဥရဝ်ပကဵု ဂကောံဍုၚ်ကွတ်စက်အဓိက ထပှ်ဍုၚ်တံ မစၟတ်လဝ်ၚုဟ် (၆၀) ဒဝ်ဠာတံဂှ် အိန္ဒိယဝွံ စဵုကဵုအခိၚ်လၟုဟ် ပရေၚ်ဒုၚ်တဲသ္ဂုတ်သွာတ်ဂှ် ဟွံမွဲဏီရ။
တၚ်စၟတ်ဏံ လမျီု မစလုပ်ကၠုၚ် ပ္ဍဲဂိတုဒဳဇြေမ်ဗာ (၅) ဂှ်ဝွံ သွက်ဂွံကၟာတ်ဂဒဵု ပရူပရာအဓိက မထံက်ပၚ်ကဵုဒၟံၚ် ရုယှာ မသၠိုၚ်လုပ်ၜက်ၜေတ်လဝ် ယူကရုၚ်တံဂှ် ဒှ်အရာအလဵုအသဳ လက္ကရဴတံဏံ ပ္တိတ်ဇြဟတ်ဂ္စါန်လဝ်ရ။
ဂျာရဳယှာန်ကာဝွံ ၜိုန်ရရန်တၟံဟီုဂးလဝ် အရာသၞောတ်ဗ္ၜတ်ၚုဟ်နှေန်တံ တိုက်ရိုက်ဟွံမွဲကီုလေဝ် စပ်ကဵုပရေၚ်ရာန် ကၠေၚ်ဍေန် ဇရေၚ်ရုယှာတံဂှ်တုဲ ဒဒှ်ရဍုၚ်အဳယူတံဟေၚ် ပၠောပ်ပ္တိုန်ဒၟံၚ် ကၠေၚ်ဍေန်ရုယှာတံ ဂၠိုၚ်နူကဵုအိန္ဒိယဂှ် ခၠေဝ်ပၠန်ဟီုဂးလဝ်ရ။
ဍုၚ်အိန္ဒိယဝွံ စနူရုယှာသၠိုၚ်လုပ်ၜက်ၜေတ် ယူကရုၚ်တုဲဂှ် သၠုၚ်ပ္တိုန်အသိၚ် ရာန်ကေတ်ဒၟံၚ် ကၠေၚ်ဍေန် နူကဵုရုယှာ နကဵုၚုဟ်မဖအောန်ဖျေံလဝ်တံဂှ် သိုက်က်တုဲ ပွမပၠောပ်ပ္တိုန်ကၠေၚ်ဍေန်ဂှ်လေဝ် ပ္ဍဲဂိတုအံက်တဝ်ဗာဂှ် သၠုၚ်တိုန်ကၠုၚ် ၜက်အာဗ္ၜတ်ရ။
အိန္ဒိယ ကေုာံ ရုယှာတံဝွံ ပရေၚ်ဆက်ဆောံ ကြပ်ပ်နွံတုဲ နျူဒေလဳဝွံ ဟွံထံက်ဂလာန် ပရေၚ်ဍုၚ်ပလိုတ်တံ မကေတ်အရေဝ် ကၟာတ်ဂဒဵု လ္တူမဝ်သကိုဝ်ဂှ်မွဲသာ် သွက်လွဟ်ရုယှာတံကၠောန်ဂှ် ဒှ်ကၠုၚ်ဗွဝ်ဖျာအဓိကမွဲရ၊ သ္အာၚ်နူဂှ်ပၠန် နကဵုအိန္ဒိယ စဵုကဵုအခိၚ်လၟုဟ် ဟွံကဵုမာဲ ကုတၚ်သ္ဂုတ်သွာတ် ကုလသမဂ္ဂ မပျုတ်ဗ္ဒေက်ဟီုဗျိ ပေါဲပၞာန်မဝ်သကိုဝ်ဂှ်တုဲ မံၚ်ဒၟံၚ်ရ။
အိန္ဒိယ ကေုာံ ဂျာမနဳတံဝွံ သွက်ဂွံပံၚ်တောဲရေၚ်တၠုၚ် ပရေၚ်ကူသာန်သွံရာန် အကြာၜါဍုၚ်၊ ဖဵုအဆက်လက္ကရဴ ပေါဲပၞာန်ယူကရုၚ် စပ်ကဵုဂၠးတိ ကေုာံ ပရေၚ်ပြံၚ်လှာဲ ဇြဟတ်ဓာတ်စၞပၟတ်တံဂှ် သဳကၠဳလဝ်တုဲ သွက်ပရေၚ်ပံၚ်တောဲရေၚ်တၠုၚ်အဖဝ်မိတ် ပွမဆုဲပြံၚ်ပဒတဴတံကဵု ပရေၚ်ဆုဲပြံၚ်အာကၠုၚ်တံဂှ် ထ္ပက်လဝ်စၟတ်တဲရ။
ဂျာမနဳဝွံ ပ္ဍဲဥရဝ်ပဂှ် ဒှ်မိတ်ကူသာန်သွံရာန် အန္ဒိယဇၞော်အိုတ်တုဲ ပ္ဍဲဍုၚ်အိန္ဒိယဂှ် ကမ္ပဏဳဂျာမာန် (၁၇၀၀) ပြၚ် ကၠောန်ဒၟံၚ်ကမၠောန်ရ၊ ကမၠောန်ဓလိုက်တမ်ရိုဟ် ဂျာမနဳအဓိကတံဂှ် ပရေၚ်ပလံၚ်ဗစိုပ်၊ ကပေါတ်ဓာတ်လလဳဂမၠိုၚ်၊ ကမၠောန်ပရေၚ်သိုၚ်ခၞံ၊ ပရေၚ်သွံရာန် ကေုာံ ကမၠောန်ပရေၚ်ကၠောန်ပ္တတ်ကွဳစက်တံ မဒှ်ရဂှ် ဂွံတီကေတ်ရ။
Ref: Aljazeera