မတ်မလီု၊ ဒဳဇြေမ်ဗာ (၉)
မၞိဟ်မချူပ္တိုန် ပရူထံက်ဂလာန် NUG, CRPH ကေုာံ PDF ပ္ဍဲမုက်လိက်ဇာဇၞိက်ပရေၚ်မၞိဟ်တံဂှ် ပ္ဍဲသၞာံဏံ နူဂိတုဂျာန္နဝါရဳ စဵုကဵု ဂိတုနဝ်ဝေမ်ဗာအိုတ် အမှုရပ်ဒက်ကေတ်ဒုဟ်အပံၚ် (၈၁၇) အမှု နွံလဝ်ဂှ် ထ္မံက်ထ္ၜးဒၟံၚ် ပ္ဍဲမဳဒဳယျာ သၟဝ်တဲကံၚ်ဇြဳပၞာန်တံရ။
စနူဂိတုဂျာန္နဝါရဳ (၂၇) တုဲကၠုၚ်တေံတုဲ ကံၚ်ဇြဳပၞာန်ဂှ် နူကဵုဇာဇၞိက်ပရေၚ်မၞိဟ်တံမွဲကဆံၚ် မၚ်ရံၚ်ရပ်ဒက်လဝ်တုဲ နူကဵုအကံက် Facebook, Facebook Group, Facebook Page ကေုာံ အကံက် Tik Tok အပံၚ်ဖအိုတ် (၈၀၆) ဂှ် ကေတ်လဝ်ဒုဟ် ကုညးမချူပ္တိုန်လဝ် ဒဒှ်ရထံက်ဂလာန်လ္ပာ်ဒစဵုဒစး အပံၚ်လၟိဟ် (၈၁၇) တၠဂှ် လ္ပာ်ကံၚ်ဇြဳပၞာန် လလောၚ်ပ္တိတ်ယၟု မွဲက္ဍိုပ်တုဲမွဲက္ဍိုပ်တုဲ ရပ်ဒက်လဝ်ရ။
ကေတ်ဒၟံၚ်ဒုဟ် သာ်ဏံတံဂှ်ဝွံ ကံၚ်ဇြဳပၞာန် ကၠောန်ဒၟံၚ် နကဵုတၚ်ရန်တၟံ မိက်သ္ဂောံကဵု ဂကောံဇြဟတ်ပၠန်ဂတးတံ ဇြဟတ်ဍိုန်လျစှ်ေဂှ်တုဲ ကၠောန်သ္ပရပ်ဒက်ဖျေံဒၟံၚ်ထံၚ် နကဵုနဲကဲနာနာသာ်တံ၊ စဵုကဵုဖျေံစၟတ်ဒဏ်ထံၚ်သၞာံဇမၠိၚ်တံရ။
ကံၚ်ဇြဳပၞာန်ဂှ် ပြဝမၞိဟ်ပူဂဵု၊ ဂကောံ မဆက်စပ်ကဵု NUG, CRPH တံဂှ် တီကဵုဒှ် ဟွံတီကဵုဒှ် ယဝ်ရကဵုဇြဟတ် ဆဝ်မ္ၚုဟ်မ္ဂး ကေတ်ဒုဟ် နကဵုသၞောဝ်ဗ္တိုက်ပလီု ပကီုပရာပ် ၝောံပိုဒ်−၅၂ (က) ၊ သၞောဝ်ဥပဒေရာဇာသာတ်ဇၞော် ၝောံပိုဒ်− ၁၂၄(က) ၊ ၝောံပိုဒ်− ၅၀၅ (က) ၊ ၝောံပိုဒ်ပရေၚ်ဆက်စၠောံ အဳလက်ထရဝ်နေတ်− ၃၃ (က) တံကီု သီုကဵုသၞောဝ်တန်တဴဒၟံၚ်တံရောၚ်ဂှ် တုဲကၠုၚ် ဂိတုဂျာန္နဝါရဳ (၂၅) တေံ လလောၚ်ပ္တိတ်လဝ်ရ။
သ္အာၚ်နူဂှ်ပၠန် ညးမထံက်ဂလာန်ကဵု ဂကောံဇြဟတ်ပၠန်ဂတးတံဝွံ ဒးဒုၚ်ရပ်ဒက်သၟးဟွံက သီုကဵုသီအာသ္ၚိဌာန် ကေုာံ ပိုန်ဒြပ် မပိုၚ်ပြဳလဝ်တၞဟ်ဟ်တံရောၚ်ဂှ်လေဝ် ကဵုလဝ်သတိရ။
နကဵုကံၚ်ဇြဳပၞာန်ဂှ် နူကဵုသီအဝဵုတုဲဂှ် ဖံက်ပ္ကဝ်ဒၟံၚ် အခေါၚ်အရာမၞိဟ် ကြိုက်စိုတ်တုဲ ပဒၟံၚ်ဒုဟ်ဂှ်ရ နကဵုညးဂွိုအ်ဒးဒုၚ်ရပ်ဏီတံဂှ်လေဝ် မွဲမွဲအခိၚ် ဒးဒုၚ်ရပ်ကၠုၚ်မာန်ရောၚ်ဟီုဂှ် သ္ပသတိတုဲ ဂပ်ဝ်ကဵုအခိၚ်ကၠောန်ၜိုတ် သွက်ပရေၚ်ပၠန်ဂတးထေက်ဂှ် ညးချဳဒရာၚ်ပရေၚ်ဍုၚ်ကွာန်တံ သ္ဂးရ။
မွဲလ္ပာ်ပၠန်ဂှ်လေဝ် ကံၚ်ဇြဳပၞာန်ဝွံ ကဵုလဝ်အခေါၚ်ဟွံမွဲမွဲသာ် ယဝ်ရသုၚ်စောဲဒၟံၚ် နဲကွတ်ပညာ VPN (Virtual Private Network ) မဒံၚ်သၠာ်မာန် ကုပွမစကာအေန်တာနိတ်တံဂှ်မ္ဂး သၞောဝ်ဂီုကၠီုသာ်ဗာ ဖျေံစၟတ် ဒဏ်ထံၚ် စဵုကဵုပိသၞာံမာန်ဂှ်လေဝ် ချူခၞံပလေဝ်ပလေတ်ဒၟံၚ်ရ။
အလုံမွဲကၟိန်ဍုၚ်ဂှ် ကြဴနူဒပ်ပၞာန်သီအဝဵုတုဲ ညးဍုၚ်ကွာန် (၁၆၀၀၀) ပြၚ် ဒးဒုၚ်ရပ်ဒက်လဝ်တုဲ ပ္ဍဲကဵုဂှ် ဗ္ဒါဲ (၁၇၀၀) ဂှ် ကံၚ်ဇြဳပၞာန် ဖျေံစၟတ်လဝ် ဒုဟ်ဒဏ်၊ ဒဏ်ထံၚ် နာနာသာ်ရောၚ်ဂှ် ဂကောံမၚ်မွဲရီုဗေၚ် ကောန်ထံၚ်ပရေၚ်ဍုၚ်ကွာန် (AAPP) လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)