သဵု(လ်) ၊ ဒဳဇြေမ်ဗာ (၉)
အခိၚ်ပရေၚ်ချဳဒရာၚ် ထ္ၜးဆန္ဒ သၟာဒဳယာန်ဖ္ဍိုက်ဗၞိက်တံ ဂွံကၠုၚ် မရနုက်ကဵု (၁၄) တ္ၚဲဂှ် အလဵုအသဳကိုဝ်ရဳယျာသၠုၚ်ကျာဝွံ သွက်သၟာဒဳယာန်တံ ဂွံကလေၚ်စှ်ေကလောန်ဂှ် စဳဇန်ဒၟံၚ် သွက်ဂွံပ္တိတ်အမိၚ်မွဲရ။
ဂကောံအုပ်ဓုပ် ဍုၚ်ကိုဝ်ရဳယျာသၠုၚ်ကျာ မပလံၚ်ပ္တိုန်ဗၞိက်မာန် လ္တူဂၠးတိဏံဇၞော်အိုတ် မရနုက်ကဵုဆဌမဂှ်ဝွံ ပရေၚ်ပ္ညဳပ္ညပ် ကုသၟာဒဳယာန်ဖ္ဍိုက်ဗၞိက် မထ္ၜးဆန္ဒအာတ်မိက် သွက်ဂွံပပဵုပ္တိုန်ကဵုအာယုက် အစဳဇန်ဒုၚ်လျိုၚ်သြန်တံဂှ် ဟွံအံၚ်ဇၞးလဝ်ရ။
အတိုၚ်ဂလာန် ဌာနဝန်ဇၞော် ပရေၚ်ဘဏ္ဍာတံဟီုဂးလဝ်ဂှ်မ္ဂး သွက်ဂွံကလေၚ်ခါန်ကၞက်ကလောန် ကုသၟာဒဳယာန် မယိုက်ဒၟံၚ်ဝန် ပ္ဍဲကဵုရုၚ်စက် ကၠေၚ်ဍေန်၊ ဓာတု ကေုာံ ရုၚ်စက်ပသဲက္ဍာၚ်တံမာန်ဂှ် သွက်ဂွံဆဵုဂဗအာကဵု ဂကောံအလဵုအသဳတံ နွံဂှ် ဂွံတီကေတ်ရ။
သ္အာၚ်နူဂှ်ပၠန် အပ္ဍဲဂိတုတုဲကၠုၚ်တေံဂှ်လေဝ် နကဵုအလဵုအသဳကိုဝ်ရဳယျာသၠုၚ်ကျာဂှ် ကဵုလဝ်အမိၚ် ကုသၟာဒဳယာန် မယိုက်ဒၟံၚ်ဝန် ပ္ဍဲရုၚ်စက်တိဗဳလာတ်တံ သွက်ဂွံကလေၚ်စှ်ေကလောန်ရ။
ဟိုတ်နူပရေၚ်ဗကပ်ဗဗေၚ် သၟာဒဳယာန်ဖ္ဍိုက်ဗၞိက်တံဂှ်တုဲ လၟေၚ်အဆက်ပရေၚ်ထံက်ပၚ်ဗၞိက် ကိုဝ်ရဳယျာသၠုၚ်ကျာဂှ်ဝွံ အပ္ဍဲ ပွိုၚ်(၁၂) တ္ၚဲ ပထမဂှ်ဟေၚ် သွက်ဂွံရေၚ်တၠုၚ်ကဵု ဗၞိက်ၚုဟ်မးမၞုံ စဵုကဵု (၂ ဒဿမ ၆၅) ဗဳလျာန် ဒဝ်ဠာအမေရိကာန်တံမာန်ဂှ် က္တဵုဒှ်လဝ် ပရေၚ်လဇုဲလဇတံရောၚ် သ္ဂးရ။
ပရေၚ်ပလံၚ်ဗစိုပ် ကပေါတ်ဓာတုကၠေၚ်ဍေန် သွက်ဗၞိက်ပလံၚ်ပ္တိုန် နူကဵုအပ္ဍဲဍုၚ်တံဂှ်ဝွံ လ္တူနူကဆံၚ်ဓမ္မတာဂှ် ဒဒှ်ရစှ်ေအာလဝ် (၆၅) တၟံကၠံဂှ် ဌာနဝန်ဇၞော်ပရေၚ်ပလံၚ်ဗစိုပ် ဟီုဂးလဝ် ပ္ဍဲဂိတုဒဳဇြေမ်ဗာ (၇) တေံရ။
ကမ္ပဏဳဓာတုကၠေၚ်ဍေန်တံဝွံ ဟိုတ်နူဒၞါဲဂွံစွံ မၞိက်အပြောံဟွံမွဲ ဟွံသေၚ်မ္ဂး ဟိုတ်နူကပေါတ်ဗၞိက်အပြောံ ပိုတ်အိုတ်တံဂှ်တုဲ ပ္ဍဲကဵုသတ္တာဟကၠုၚ်စိုပ်ဏံအိုတ်မ္ဂး သွက်ဂွံထပိုတ် ပရေၚ်ကၠောန်ပ္တိတ်တံဂှ် ချပ်ဒၟံၚ်အိုတ်ရ။
ဟိုတ်နူအလဵုအသဳ ဟီုဂးလဝ် သွက်သၟာဒဳယာန်တံ ဂွံကလေၚ်လုပ်ကလောန်ဂှ်ရ ပေါဲထ္ၜးဆန္ဒတံလေဝ် ဆက်သၠုၚ်တိုန်ဒၟံၚ်ရ။
ဒၟါနူခရိတ်အိုတ် ကၠေၚ်စၞပၟတ်တံ သၠုၚ်တိုန်ကၠုၚ်တုဲ သၟာဒဳယာန်ဖ္ဍိုက်ဗၞိက် (၂၅၀၀၀) ဝွံ အစဳဇန် ကဵုသြန်ဂိတုယာယဳအောန်အိုတ်တံဂှ် သွက်ဂွံကဵုအာလၟိုန် ဗွဲမပြဟ်ဂှ် အာတ်မိက်ဒၟံၚ်ရ။
ဟိုတ်နူဗကပ်ဗဗေၚ်တုဲ သြန်လုပ်ဆောံလေၚ်ဂှ်ဝွံ သွက်သၟာဒဳယာန်တံ ဒှ်ကၠုၚ်အခက်အခုဲဂှ်လေဝ် ညးပါ်ပါဲတံ ဟီုဂးဒၟံၚ်အိုတ်ရ။
“ဗကပ်ဗဗေၚ်ဂှ် စှ်တ္ၚဲပြၚ်အာယျ၊ ဟိုတ်နူသၠုဲသ္ၚိကၟိန်တံကဵု သၠုဲပၠောပ်ကဵုကဝူ သွက်ကွဳစက်တံဂှ်တုဲ သၟာဒဳယာန်လ္ၚဵု သမဂ္ဂဟွံသေၚ်တံ ကလေၚ်စဒၟံၚ်ကလောန်ယျ၊ ညအ်ဂှ် သွက်စိုတ်ဒးအိုတ်ခိုဟ် ကွေံကွေံရ၊ သၟာဒဳယာန် မဗကပ်ဗဗေၚ် ဗွဲမဂၠိုၚ် ဂွိၚ်ဆက်ထိၚ်အာ ဒဵုကဵုသတ္တာဟဂတဏံဟွံမာန်ဂှ်ရ” သာ်ဝွံ လဳဂရာန်သာန် မဒှ်သၟာဒဳယာန် ဖ္ဍိုက်ဗၞိက်မပါလုပ်လဝ် ပ္ဍဲဗကပ်ဗဗေၚ်မွဲတၠ ဟီုဂးလဝ်ရ။
Ref; Reuters