ဒဳမအ်သဵု၊ ဒဳဇြေမ်ဗာ (၉)
ပ္ဍဲကဵုဗ္ဒိုပ်ပါဲဒဴဘဲပၞာန် နူလ္ပာ်ပလိုတ်၊ ပွိုၚ်ဍုၚ်ဒဳမအ်သဵု၊ တွဵုရးကရေၚ်ဍာဲတံဂှ် ဇွောံမစၞစပိုတ်အိုတ်ကၠုၚ်ဂှ်ရ နွံပၟိက်ဒၟံၚ်ကဵု အရီုဗၚ်ကာတၟေၚ်တံရောၚ် ညးမရီုဗၚ်ကဵုဒၟံၚ် ပရေၚ်ပါဲဒဴဘဲပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗ္ဒိုပ်ပါဲဒဴဘဲပၞာန်တံဝွံ လ္ပာ်ကံၚ်ဇြဳပၞာန်တံ ဟိုတ်နူကၟာတ်ဂဒဵုလဝ် အခေါၚ်ယိုက်ပလံၚ်ဏာနၚ် ဇွောံမစၞစတံကီု၊ ဟိုတ်နူပေါဲဗ္တိုက်ၜါလ္ပာ်တံကီု၊ အခက်အခုဲ ပရေၚ်ဆက်စၠောံဂၠံၚ်ဍာန်တံဂှ်တုဲ ဒးဂဗကၠုၚ်ကဵု ဇွောံမပိုတ်အိုတ်တံရ။
ပၞောဝ်ကဵုဂှ် ပ္ဍဲကဵုဗ္ဒိုပ်ပါဲဒဴဘဲပၞာန် သဳတူဒဝ် (ဆီးသူးတော်) လၟိဟ်မၞိဟ် (၁၀၀၀) ပြၚ်နွံဂှ် ဟိုတ်နူဇွောံမပိုတ်အိုတ်တုဲ ဒးပ္တိတ်သုၚ်စောဲဒၟံၚ် ဇွောံမကာတၟေၚ်တံဂှ်ရ အပ္ဍဲအခိၚ်ခြာဟွံလအ်ဏံ ဇွောံမပိုတ်အိုတ်ကၠုၚ် လးလးမာန်ဂှ် သ္ဂးရ။
စပ်ကဵုအကာဲအရာ ဇွောံမပိုတ်အိုတ် ပ္ဍဲဗ္ဒိုပ်ပါဲဒဴဘဲပၞာန်တံဂှ်တုဲ ညးမရီုဗၚ်ကဵု ပရေၚ်ပါဲဒဴဘဲပၞာန်မွဲတၠ ဟီုလဝ် ဗီုလၟုဟ်ရ။
“ဗ္ဒိုပ်သဳတူဒဝ်သၟးဟွံကပုဟ်၊ ပ္ဍဲကဵုဒၞါဲဗွဲမဂၠိုၚ်တအ်ဂှ်လေဝ် ဇွောံမတံ ပိုတ်ဒၟံၚ်ကီုဏောၚ်၊ မူဟိုတ်ရောတှ်ေ တၠဒါန် အောန်စှ်ေကွေံကွေံကီု၊ ဂၠံၚ်ပလံၚ်ဗစိုပ်တံ ဝါတ်ဂါတ်ကီု၊ ဗ္ဒိုပ်ဏံသၟးဟွံကပုဟ် သီုကဵုပ္ဍဲဗ္ဒိုပ်ပါဲဒဴဘဲပၞာန်တၞဟ်ဟ် နူကဵုပလိုတ်ဒဳမအ်သဵုတံ ဗွဲမဂၠိုၚ်ရ” သာ်ဝွံ သ္ဂးရ။
တၠဒါန်တံ ဟွံစိုပ်ဒၟံၚ် ဗ္ဒိုပ်ပါဲဒဴဘဲပၞာန်တံဂှ် ပိဂိတုပြၚ်ရတုဲ အရီုဗၚ် ပရေၚ်ဗ္စာရဏာမၞိဟ် ဍုၚ်သ္အာၚ်တံလေဝ် ဟွံဂွံဏီပုဟ်ဂှ် ညးသ္ဂးရ။
ညးဍုၚ်ကွာန်ပါဲဒဴဘဲပၞာန်တံဝွံ ဒပ်ကံၚ်ဇြဳပၞာန်တံ ဟိုတ်နူပန်ပှော်ဒၟံၚ် လွဟ်ဇၞော် ဇရေၚ်ဗ္ဒိုပ်ပါဲဒဴဘဲပၞာန်တံ အရိုဟ်ဒဒှ်တ္ၚဲဂှ်ရ ဒးမံၚ်ဒၟံၚ် နကဵုဓဝိၚ်ဂွိၚ်ဂွါဲ မဖေက်တံရ။
သ္အာၚ်နူဂှ်ပၠန် ညးဍုၚ်ကွာန်ပါဲဒဴဘဲပၞာန်တံဝွံ ဟိုတ်နူကံၚ်ဇြဳပၞာန် ကၟာတ်ဂဒဵု သၞောတ်ဗ္ၜတ်လဝ်တံတုဲ ဂဥုဲဇဗဟွံရုမ်ဂပ်ဂှ်ရ ဒးချိုတ်အာတံလေဝ် နွံဒၟံၚ်ရ။
ပ္ဍဲတွဵုရးကရေၚ်ဍာဲဂှ် ကြဴနူဒပ်ပၞာန်သီအဝဵုတုဲ ဟိုတ်နူပေါဲဗ္တိုက် ဒပ်ကံၚ်ဇြဳပၞာန်တံကဵု ဂကောံဒပ်စဵုဒၞါဒေသတံတုဲ လၟိဟ်မၞိဟ် (၂) ကိုဋ်ပြၚ်ဝွံ ဒးကၠုၚ်စိုပ်စ္ၜုဲစ္ၜော်ဒၟံၚ် ပ္ဍဲကဵုဗ္ဒိုပ်ပါဲဒဴဘဲပၞာန် ပလိုတ်ဒဳမအ်သဵုတံရ။
ပရိုၚ်−သြၚ်လောန်တိုၚ်(မ်)