နေဗျဳဒဝ်၊ ဂျောန် (၁၂)
ပ္ဍဲဗ္ဒါဲရုၚ်ပရေၚ်ဂီုကၠီု သ္ကိုပ်ဒပ်ဗၠာဲသၟိၚ် နေဗျဳဒဝ် မၞုံပွိုၚ်ဍုၚ်ဒက္ခိဏသဳရိ၊ ဍုၚ်နေဗျဳဒဝ် မပတေၚ်ဓရတ်လဝ် ပရေၚ်ဂီုကၠီုဂှ် သ္ကိုပ်စၞောန်ပ္ညုၚ် ကံၚ်ဇြဳပၞာန်မွဲတၠ ဒးဒုၚ်ပၠံၚ်ၜး ထ္ပက်လဝ်ကဵုၜုန်ရဂှ် ဗွိုၚ်နေဗျဳဒဝ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သ္ကိုပ်စၞောန်ပ္ညုၚ် ဌာနဝန်ဇၞော် ပရေၚ်ပလံၚ်ဗစိုပ် ကေုာံ ပရေၚ်ဆက်စၠောံ ကံၚ်ဇြဳပၞာန် မကၠုၚ်စုတ်ကၠေၚ်ဝွံ ဒေါအ်ကွဳစက် ပ္ဍဲဗ္ဒါဲရုၚ်ပရေၚ်ဂီုကၠီု သ္ကိုပ်ဒပ်ဗၠာဲသၟိၚ်နေဗျဳဒဝ်တုဲ အဃောမအာဒၟံၚ်တရဴသၟတ်ဂှ် မၞိဟ်ယၟုဟွံတီၜါတၠ ထံက်ကဵုၜုန်တုဲ တံၚ်ဓဇက်ဏာ လ္တူကွဳစက်ရ။
ကြဴနူဂှ်တုဲ ညးမပၠံၚ်ၜးၜါတၠ တီအာ ဒဒှ်ရ သၞာဲဒဴကံၚ်ဇြဳပၞာန်တုဲဗက် ကဵုဗဒေါအ်ကွဳစက် ထ္ပက်ကဵုၜုန်တုဲ ခၞိက်ဖျေံ ပ္ဍဲဗရံၚ်သဗာန်ဂၠံၚ်ဂှ်တုဲ ဒဒှ်ရဒဳဏာကွဳစက်ဂှ် သၞာဲဒဴကံၚ်ဇြဳပၞာန် ကလေၚ်လဴထ္ၜးလဝ်ဂှ် ညးမစုက်လုက်ကဵု ဒပ်ဗၠာဲသၟိၚ်မွဲတၠ ဟီုရ။
ကုသ္ကိုပ်စၞောန်ပ္ညုၚ် ဌာနဝန်ဇၞော်ပရေၚ်ပလံၚ်ဗစိုပ် ကေုာံ ပရေၚ်ဆက်စၠောံ ကံၚ်ဇြဳပၞာန် မဒးဒုၚ်ထ္ပက်လဝ်ကဵုၜုန် ပၠံၚ်ၜးဂှ် ပလံၚ်ဗစိုပ် လွဳလွတ်လဝ် ပ္ဍဲရုၚ်ဂဥုဲနေဗျဳဒဝ် ခါတ် (၁၀၀၀) မ ဂှ်ရ။
အပ္ဍဲဒဒှ်မပၠံၚ်ၜးဏံဂှ် သြန်ဒ္ကေဝ်ညိည၊ ဖုၚ် ကေုာံ ကံက်စိန်ထဝ် မွဲဇြေဟ် ပါအာဂှ်ကီု သွက်လၟေၚ်ဒဒှ်ဏံဂှ် ပံက်လဝ်အမှု ပ္ဍဲဗ္ဒိုပ်ဗၠာဲသၟိၚ် ဒက္ခိဏသဳရိ နေဗျဳဒဝ်ဂှ် ဂွံတီကေတ်ရ။
ဗွဲကြဴဒပ်ပၞာန်သီအဝဵုတုဲ ပ္ဍဲနေဗျဳဒဝ် မပတေၚ်ဓရတ်လဝ် ပရေၚ်ဂီုကၠီုဂှ် ခြာဟွံလအ်ဟီုဂွံ ပွမပၠံၚ်ၜးတံ က္တဵုဒှ်ဒၟံၚ်တုဲ တုဲကၠုၚ်ဂိတုဂျောန် (၆) ပ္ဍဲပွိုၚ်ဍုၚ်ဥတ္တရသဳရိဂှ် မၞိဟ်ဇၞော်ဗျု အာယုက် (၇၀) သၞာံ သမ္ဘာတၠသ္ၚိၜါတၠ ဒးဒုၚ်ဂစိုတ်ပၠံၚ်ၜးလဝ်တုဲ ဒဵုကဵုအခိၚ်လၟုဟ် ကုညးမဂစိုတ်လဝ်တံဂှ် လ္ပာ်ကံၚ်ဇြဳပၞာန် ရပ်ဒက်ဂွံလဝ် ဟွံမွဲဏီရ။
ပရိုၚ်−သြၚ်လောန်တိုၚ်(မ်)