ဒဳမအ်သိုအ်၊ ဂျောန် (၁၂)
အရီုဗၚ် ပရေၚ်ဗ္စာရဏာမၞိဟ် နူကဵုရုၚ်သၟိၚ်ဇၞော် စပ်ကဵုညးဒှ်ဒဒိုက်ကုလသမဂ္ဂ UNHCR တံဝွံ ဒဒှ်မစိုပ် ဇရေၚ်ညးပါဲဒဴဘဲပၞာန် နူအပ္ဍဲတွဵုရးကရေၚ်ဍာဲ မနွံပၟိက်ဒၟံၚ် ဍာံဍာံတံဂှ် ဍိုန်လျဒၟံၚ်ရောၚ် ညးမရီုဗၚ်ကဵုဒၟံၚ် ပရေၚ်ပါဲဒဴဘဲပၞာန်တံ ဟီုဂးလဝ်ရ။
ပ္ဍဲဂိတုမေ တုဲကၠုၚ်တေံကဵု ဂိတုဂျောန်မံက် ပြဟ်ဟ်ဏံဂှ် ရီုဗၚ်ထံက်ပၚ်ကဵုလဝ် ကပေါတ်ပရေၚ်ဟံၚ်ပြာ် ကာတၟေၚ် ဇရေၚ်ညးဍုၚ်ကွာန်ပါဲဒဴဘဲပၞာန် နူကဵု ပွိုၚ်ဍုၚ်ဒဳမအ်သိုအ် ကေုာံ ပွိုၚ်ဍုၚ်လွိုက်ကဝ် တွဵုရးကရေၚ်ဍာဲတံရဂှ် ရုၚ်သၟိၚ်ဇၞော် စပ်ကဵုညးဒှ်ဒဒိုက်ကုလသမဂ္ဂ UNHCR လလောၚ်ပ္တိတ်ကၠုၚ် ပ္ဍဲဂိတုဂျောန် (၉) တေံရ။
UNHCR ဂှ်ဝွံ ထံက်ပၚ်ကဵုလဝ် ကပေါတ်ပရေၚ်ဟံၚ်ပြာ်ကာတၟေၚ် ကုညးဍုၚ်ကွာန်ပါဲဒဴဘဲပၞာန် (၅၀၀၀၀) ပြၚ် နွံဣရဂှ် သ္ဂးရ။
ဆ္ဂး အရီုဗၚ် UNHCR ဝွံ ဒဒှ်မစိုပ်ကၠုၚ် ဇရေၚ်ညးဍုၚ်ကွာန် ပါဲဒဴဘဲပၞာန် မနွံပၟိက်ဒၟံၚ် အရီုဗၚ်ကာတၟေၚ်ဂမၠိုၚ် နူကဵုဒေသပေါဲဗ္တိုက် ဆက်က္တဵုဒှ်ဒၟံၚ်တံ ဟွံမွဲဏီပုဟ်ဂှ် ညးမရီုဗၚ်ကဵုဒၟံၚ် ပရေၚ်ပါဲဒဴဘဲပၞာန် မွဲတၠ ဟီုရ။
“မွဲဒမြိပ် camp ဒၞါဲပိုယ်တံ စှ်ေဒၟံၚ်တှ်ေ ဖအိုတ်ရ၊ ဒၞါဲတံဏံသီုဖအိုတ်ဂှ် ဟွံစိုပ်ပုဟ်၊ ဒၞါဲဒေသဟွံပြေပြံၚ်တံ ဒၞါဲမအာကၠုၚ် ဝါတ်ကျာတ်တံဂှ် ၜိုန်ရအာဟွံစိုပ်ကီုလေဝ် ဂကောံမရီုဗၚ်ကဵုဒၟံၚ်တံ နွံရ၊ ကေတ်အဆက်ကဵုညးတံတုဲ မိက်သ္ဂောံကဵုအရီုဗၚ်အိုတ်ရ” သာ်ဝွံ သ္ဂးရ။
အရီုဗၚ် UNHCR တံဝွံ ဇရေၚ်ညးဍုၚ်ကွာန်ပါဲဒဴဘဲပၞာန် နူဗ္ဒါဲပွဳပွူ မကြပ်ကဵုဍုၚ်တံဂှ်ရ စိုပ်ဒၟံၚ်တုဲ ဒဒှ်မစိုပ်ကၠုၚ် ဇရေၚ်ဗ္ဒိုပ်ပါဲဒဴဘဲပၞာန် မသ္ၚောဲဒၟံၚ်ကဵု ဍုၚ်တံဂှ် ဍိုန်လျဒၟံၚ်ရ။
ဟိုတ်ဂှ်ရ နကဵု UNHCR သွက်ဂွံထံက်ပၚ်ကဵုအရီုဗၚ် ဇရေၚ်ညးဍုၚ်ကွာန်ပါဲဒဴဘဲပၞာန် နူကဵုဒၞါဲဒေသဇမ္ၚောဲတံမာန်ဂှ် ကေတ်အဆက် ကုညးမရီုဗၚ်ကဵုဒၟံၚ် ပရေၚ်ပါဲဒဴဘဲပၞာန်တံတုဲ သွက်ဂွံရေၚ်တၠုၚ်ကဵုဂှ် အာတ်မိက်လဝ်ရ။
အလုံမွဲတွဵုရးကရေၚ်ဍာဲတံဂှ် ဟိုတ်နူပေါဲဗ္တိုက်ၜါလ္ပာ်တုဲ ညးဍုၚ်ကွာန်ပါဲဒဴဘဲပၞာန် (၂) ကိုဋ်ပြၚ် ဒးဂြိပ်ဒဴပါဲဒလေတ်ဒၟံၚ်တုဲ အခါလၟုဟ်ဂှ် ညးဍုၚ်ကွာန်ပါဲဒဴဘဲပၞာန်တံဝွံ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ် ကာတၟေၚ်ရ။
ပ္ဍဲကောံဓရီု အကြေပ်ဂြတ် စပ်ကဵုပရေၚ်ဗ္စာရဏာမၞိဟ် အာဇြဳယာန် မကၠောန်ဗဒှ်လဝ် ပ္ဍဲကာမ္ဗောဒဳယျာ ပ္ဍဲဂိတုတုဲကၠုၚ်တေံဂှ် ပအပ်ကဵုအာ အရီုဗၚ်ဂမၠိုၚ် နူကံၚ်ဇြဳပၞာန် မွဲကဆံၚ်ရောၚ် သ္ဂုတ်သွာတ်လဝ်ရ။
အလဵုအသဳညဳသၟဟ်ဂကူ NUG ကေုာံ ဂကောံရပ်လွဟ်ကောန်ဍုၚ်အရၚ် (၃) ဂကောံတံဂှ် ကံၚ်ဇြဳပၞာန် စကာကၠုၚ် အရီုဗၚ်ပရေၚ်ဗ္စာရဏာမၞိဟ်ဂမၠိုၚ် ညံၚ်ကဵုလွဟ်လက်နက်မာန်ရောၚ်ဂှ်ရ ကုတၚ်သ္ဂုတ်သွာတ်ဏံဂှ် ညိမှ ဒုၚ်တဲဟွံမာန်ရောၚ်ဂှ် လလောၚ်ပ္တိတ်လဝ်ရ။
ပရိုၚ်− သြၚ်လောန်တိုၚ်(မ်)