ပရေၚ်ကော်ဘိက် သွက်ဂွံဆဵုဂဗ ကုကံၚ်ဇြဳပၞာန်ဂှ်ဝွံ ဒှ်အရာပ္တိတ်ဇြဟတ် သွက်ပေါဲသဳကၠဳပရေၚ်ဍုၚ်ကွာန် သီုဖအိုတ်ဂွံပါလုပ်ရောၚ် ဂကောံဒေါအ်ပန်ပှော် (၇) ဂကောံ ဟီု

လ္ဂုၚ်၊ ဒဳဇြေမ်ဗာ (၁၀)

ဒဒှ်မကော်ဘိက် သွက်ဂွံဆဵုဂဗ ကုကံၚ်ဇြဳပၞာန်သီအဝဵု ဗွဲပလးဂှ်ဝွံ ဒှ်အရာပ္တိတ်ဇြဟတ် သွက်ပေါဲသဳကၠဳပရေၚ်ဍုၚ်ကွာန် ညးမဆက်စပ်အိုဿီပါလုပ် ဂွံဒှ်ဂှ် ညးမၞုံအခေါၚ်ဟီုဂး ဂကောံဒေါအ်ပန်ပှော် (၇) ဂကောံ သ္ကိုပ်ဗိုလ်ဇၞော် သဝ်ကျဝ်ညောအ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဂကောံ EAOs (၇) ဂကောံ မထ္ပက်လဝ်စၟတ်တဲ ပ္ဍဲလိက်ကသုက် NCA ဂှ်ဝွံ ဒှ်ဂကောံတိုန်စိုပ်သဳကၠဳလဝ် ပေါဲသဳကၠဳပရေၚ်ၜိုဟ်လလမ် ကံၚ်ဇြဳပၞာန် မကော်ဘိက် (၂) ဝါကိတ်တ်တုဲ အခါလၟုဟ်ဂှ် သွက်ဂွံဆဵုဂဗကဵု ကံၚ်ဇြဳပၞာန် ဗွဲပလးဂှ် ပ္ဍဲဂိတုဒဳဇြေမ်ဗာ (၇) တေံ ပလံၚ်ဗ္စိုပ်လဝ် လိက်ကော်ဘိက် ဇရေၚ်ဥက္ကဌ ကမ္မတဳပ္ညဳပ္ညပ် ထ္မံက်ရုပ်ရဴ ပရေၚ်ၜိုဟ်လလမ် ကေုာံ ပရေၚ်ညဳသၟဟ်ကောန်ဂကူ (NSPNC) ဒုသ္ကိုပ်ဗိုလ်ဇၞော် ယျာပျေအ်ရ။

ပ္ဍဲကဵုလိက်ကော်ဘိက် EAOs (၇) ဂကောံတံ မပ္တိုန်လဝ်ဂလာန် ကုကံၚ်ဇြဳပၞာန်ဂှ် ကၠုၚ်စိုပ်ဂိတုဒဳဇြေမ်ဗာ (၁၂) ဏံ စအာ ပရေၚ်ဆဵုဂဗသဳကၠဳဗွဲပလး ကၠာတဲဏံ ကုညးစၞးမွဲလ္ပာ်တေံညိည ပ္ဍဲဍုၚ်ချေၚ်မာဲ၊ ဍုၚ်သေံ သ္ၚိတ်တ်ရောၚ် ထ္မံက်ထ္ၜးလဝ်ရ။

ပ္ဍဲကဵုဂိတုဒဳဇြေမ်ဗာ နူစၟတ်တ္ၚဲ (၁၅) စဵုကဵု (၁၇) တံဂှ် ညးစၞးၜါလ္ပာ်ဇဳဇဳ ဆဵုဂဗဗွဲပလး ပ္ဍဲဍုၚ်တံၚ်ကျဳ ဟွံသေၚ်မ္ဂး ပ္ဍဲဍုၚ်မတ်မလီုတုဲ သဳကၠဳပ္ညဳပ္ညပ်အာ လစွံစိုတ်ၜါလ္ပာ်တံရောၚ် ပါလုပ်ရ။

သ္အာၚ်နူဂှ်ပၠန် ပ္ဍဲဂိတုဒဳဇြေမ်ဗာ နူစၟတ်တ္ၚဲ (၂၀) စဵုကဵု (၂၁) တံဂှ် ကၠောန်သ္ပအာ ပရေၚ်သဳကၠဳဗွဲမလုပ်သၞောဝ် ပ္ဍဲဍုၚ်လ္ဂုၚ်တုဲ ဆက်သဳကၠဳပ္ညဳပ္ညပ်အာတုဲ တၚ်တုပ်စိုတ် သီုၜါလ္ပာ်ဒုၚ်တဲမာန်တံဂှ် ပ္ဍဲအခိၚ်အခါ ကေုာံ ဒၞါဲ မဒးရးတံဂှ် သွက်ဂွံထ္ပက်အာစၟတ်တဲဗွဲမလုပ်သၞောဝ်ဂှ် ကော်ဘိက်လဝ်ရ။

ညးမၞုံအခေါၚ်ဟီုဂး ဂကောံပ္ညဳပ္ညပ်သဳကၠဳ ဗွဲပလး ဂကောံဒေါအ်ပန်ပှော် (၇) ဂကောံ သ္ကိုပ်ဗိုလ်ဇၞော် သဝ်ကျဝ်ညောအ်ဂှ် ပရေၚ်ကော်ဘိက် သွက်ဂွံဆဵုဂဗ ဗွဲပလးတံဂှ်ဝွံ ဒှ်အရာပ္တိတ်ဇြဟတ် ညံၚ်ပေါဲသဳကၠဳပရေၚ်ဍုၚ်ကွာန် ညးမဆေၚ်စပ်အိုဿီု ပါလုပ် ဂွံဒှ်ဂှ်ရောၚ် ဟီုရ။

“သွက်ဂွံတတ်ထ္ပာ် အကြေပ်အဂြတ်ပရေၚ်ဍုၚ်ကွာန်လၟုဟ်ဂှ်ဟီုတှ်ေ ပေါဲသဳကၠဳပရေၚ်ဍုၚ်ကွာန် ညးမဆက်စပ်အိုဿီုပါလုပ် ဂွံဒှ်မွဲရဏောၚ်၊ ၜိုန်ဂှ်ကီုလေဝ် နဒဒှ်ကဆံၚ်ပထမဂှ် နူကဵုဂကောံမအာဒၟံၚ် (၇) ဂကောံ ( EAOs ဆဵုဂဗကဵု ကံၚ်ဇြဳပၞာန်) တံ ဂ္စါန်ဒၟံၚ် သွက်ဂွံကလိဂွံ တၚ်တုပ်စိုတ်ပ္ညဳပ္ညပ် ကုအကာဲအရာပံၚ်တောဲတုဲ အာစိုပ်မာန်မွဲ မဒှ်ရ၊ လအာတုပ်သာ်ဂှ်ကီု EAOs (၇) ဂကောံ ပံၚ်ကောံတုဲ သွက်ဂွံအာစိုပ်ပ္ညဳပ္ညပ်တံ တုပ်စိုတ်တုဲမ္ဂးလေဝ် ပရူပရာ အာဂျာန်ဒါပိုယ်တံ မသဳကၠဳအာတံဂှ် ဒစးဒုၚ်တုဲ သွက်ဂွံပ္ညဳပ္ညပ်သဳကၠဳဗွဲပလး ရန်ကဵုတၚ်တုပ်စိုတ်ဝွံတုဲ ဂ္စါန်ဒၟံၚ်ရောၚ်” သာ်ဝွံ ညးသ္ဂးရ။

သ္အာၚ်နူဂှ်ပၠန် နူကဵုဂကောံပ္ညဳပ္ညပ်သဳကၠဳဗွဲပလး ဂကောံ EAOs (၇) ဂကောံဂှ် သွက်ဂွံကလိဂွံ အကာဲအရာ Win-Win သီုၜါလ္ပာ်ဒုၚ်တဲမာန် ဗီုပြၚ်သၟိက်ဂွံရေၚ်တၠုၚ် ကုပူဂဵု နူ NSPNC ကံၚ်ဇြဳပၞာန်တံဂှ် စပ္တိုန်လဝ်ဂလာန်ရောၚ် သ္ကိုပ်ဗိုလ်ဇၞော် သဝ်ကျဝ်ညောအ် ဆက်ဟီုရ။

နကဵုဂကောံ NCA-S EAO (၇) ဂကောံတံ ရန်တၟံ သွက်ဂွံဒက်ပ္တန်ပရေၚ်ၜိုဟ်လလမ် ဂွံတန်တဴအာအဓာန်ဇမၠိၚ်မာန်ဂှ်တုဲ ပ္တိုန်လဝ်ဂလာန် သွက်ဂွံဆဵုဂဗသဳကၠဳ ဗွဲပလး ညံၚ်သ္ဂောံဂွံ တၚ်တုပ်စိုတ် သီုၜါလ္ပာ်ဒုၚ်တဲမာန်တံဂှ် သ္ဂးလဝ်ရ။

ညးလ္ၚတ်သ္ၚဳဂၠိပ် ပရေၚ်ကောန်ဍုၚ်အရၚ်မွဲတၠဂှ် ဂကောံ EAOs တံ စၞးအာဆဵု ကုကံၚ်ဇြဳပၞာန် မွဲဂကောံတုဲမွဲဂကောံဂှ် သီု (၇) ဂကောံ ပံၚ်ကောံတုဲ သဳကၠဳပရူ ပရေၚ်ချူခၞံသၞောဝ်သ္ဇိုၚ်တွဵုရး ကေုာံ လိက်ကသုက်တုပ်စိုတ် ကၟိန်ဍုၚ်ပံၚ်ကောံ သ္ကုတ် (၃) သ္ကုတ်တံမာန်ဂှ် သ္ၚဳဂၠိပ်လဝ်ရ။

“ ဂကောံ EAOs တံဂှ် ၝညးတံအာတ်လဝ် ချူခၞံသၞောဝ်သ္ဇိုၚ်တွဵုရးဂှ်ကီု၊ လိက်ကသုက်တုပ်စိုတ် ကၟိန်ဍုၚ်ပံၚ်ကောံ သ္ကုတ် (၃) သ္ကုတ်တံကီုဂှ် ညးတံ သွက်ဂွံသဳကၠဳနွံဏောၚ်ထေၚ်ရ၊ ဆ္ဂး ဒဵုဗၞတ်ၜိုတ်လဵုအာမာန်ရောဟီုဂှ် တၚ်ရန်တၟံဂှ် ချူလဝ် ဒက်ပ္တန်လၟေၚ်ဒဒှ်ပရေၚ်ၜိုဟ်လလမ် တန်တဴအာအဓာန်ဇမၠိၚ်ဏောၚ်ဂှ်ရ အဲညာတ်ဂှ် ရံၚ်ကေတ်တှ်ေ ကလေၚ်ပၠောပ်လမျီု ကုလိက်ကသုက်တုပ်စိုတ်ကၟိန်ဍုၚ် မသဳကၠဳလဝ်ကဵု အလဵုအသဳဒဝ်သု ကၠာတေံဂှ်ရဏောၚ်” သာ်ဝွံ ထံက်ထ္ၜးလဝ်ရ။

ပ္ဍဲကဵုဂကောံ EAOs (၇) ဂကောံ မဂ္စါန်ဒၟံၚ် သွက်ဂွံဆဵုဂဗသဳကၠဳ ဗွဲပလး ကုကံၚ်ဇြဳပၞာန်တံဂှ် ဗော်ဍုၚ်မန်တၟိ (NMSP) ၊ ဗော်ဗၠးၜးရးရခေၚ် (ALP) ၊ ဒပ်ပၞာန်ဒတုဲဖဵု ဒဳမဝ်ကရေဇြဳကရေၚ် (DKBA) ၊ ကံၚ်ဇြဳၜိုဟ်လလမ် ဒပ်ပၞာန်ဗၠးၜးကောန်ဂကူကရေၚ်/ ဗော်သွးကောန်ဂကူကရေၚ် (KNU/KNLA-PC) ၊ ဗော်သွးဒဳမဝ်ကရေတ်တေတ်လာဟူ (LDU) ၊ ဌာန်ဂအုပ်ဗၠးၜးကောန်ဂကူပအိုဝ် (PNLO) ကေုာံ ကံၚ်ဇြဳကလေၚ်ဒက်ပ္တန်ရးသေံ (RCSS) တံ ပါလုပ်ရ။

ကောန်ဂကောံပရေၚ်ပ္ညဳပ္ညပ်သဳကၠဳဗွဲပလး မဒက်ပ္တန်လဝ် နကဵုညးစၞး နူဂကောံရပ်လွဟ်ကောန်ဍုၚ်အရၚ် (၇) ဂကောံတံ မွဲဂကောံမွဲတၠဂှ် နူကဵုသြၚ်လောန်တိုၚ်(မ်) ဂ္စါန်သၟာန်သၟုက်ဆက်စၠောံလဝ် (၄) ဝါဟွံကကီုလေဝ် ဒုၚ်တဲသှ်ကဵုလဝ်ဂှ် ဟွံမွဲရ။

ပရိုၚ်−သြၚ်လောန်တိုၚ်(မ်)