လ္ဂုၚ်၊ ဒဳဇြေမ်ဗာ (၁၄)
အလုံမွဲကၟိန်ဍုၚ် အပ္ဍဲကာလဒပ်ပၞာန်သီအဝဵု ပွိုၚ်ဗ္ဒါဲ (၂) သၞာံဂှ် ပ္ဍဲကဵုကောန်ထံၚ်ပရေၚ်ဍုၚ်ကွာန် မဒးဒုၚ်ရပ်လဝ် ဟွံဗဗွဲဓဝ် (၁၆,၃၀၀) ဂှ် ညးဗြဴကောန်ထံၚ်ပရေၚ်ဍုၚ်ကွာန် (၂၆၀၀) ပြၚ် ပါလုပ်ဒၟံၚ်ဂှ် ဂအုပ်ဂကောံညးဗြဴဂမၠိုၚ် (ဍုၚ်ဗၟာ)− WLB လလောၚ်ပ္တိတ်လဝ်ရ။
ကြဴနူကောံဓရီု မရနုက်ကဵု (၁၁) ဝါ ဂအုပ်ဂကောံညးဗြဴဂမၠိုၚ် (ဍုၚ်ဗၟာ) မကၠောန်ဗဒှ်လဝ် နူဂိတုဒဳဇြေမ်ဗာ (၅) စဵုကဵု (၉) တုဲဗက် ပ္ဍဲကဵုလိက်လလောၚ်ပရေၚ်ဍုၚ်ကွာန်ဂှ် ထ္မံက်ထ္ၜးလဝ် လ္တူအကာဲအရာညးဗြဴတံ မဒးဒုၚ်ရပ် ကြဴနူသီအဝဵုတုဲတံ မဒှ်ရ။
ပ္ဍဲကဵုလိက်လလောၚ်ပရေၚ်ဍုၚ်ကွာန်တံဂှ် ပြဝမရပ်စပ်ဒၟံၚ် ပွပကီုပရာပ်စပ်ကဵုလိၚ် လ္တူညးဗြဴတံ ညံၚ်ရဴလွဟ်မွဲသာ်တံဂှ်ကီု၊ ပွမဖံက်ပ္ကဝ်အခေါၚ်အရာမၞိဟ်တံ၊ စွံပွန်ရပ်ဒက် ပျဲပျာံ ဘပဠအန္တရာယ်လမျီု ကုညးမစဵုဒၞါ အခေါၚ်အရာမၞိဟ်တံ ကေုာံ အခေါၚ်အရာညးဗြဴတံဂှ်ဝွံ စှ်ေစးကဵု သၞောဝ်ဗ္ၜတ် အခေါၚ်အရာမၞိဟ် ကၟိန်ဍုၚ်နာနာရောၚ် သ္ဂးလဝ်ရ။
သ္အာၚ်နူကဵု ဘပဠ အခေါၚ်အရာညးဗြဴတံ ကေုာံ အခေါၚ်အရာမၞိဟ်တံ သာ်ဏံသၟးဟွံက သီုကဵုဘပဠဒၟံၚ် ပရေၚ်ၜိုဟ်လလမ် ကေုာံ ပရေၚ်ဂီုကၠီု ညးဗြဴတံဂှ်ရောၚ် ဂအုပ်ဂကောံညးဗြဴဂမၠိုၚ် (ဍုၚ်ဗၟာ) သ္ဂးရ။
ဟိုတ်ဂှ်ရ သွက်ဂွံကဵုဒုဟ် ကုဗွိုၚ်ဒပ်ပၞာန် မကလိလောန်ဒၟံၚ် အမှုရာဇာဝတ်ပၞာန်တံ ပြာပြာကတ်တ် နကဵုသၞောဝ်ကၟိန်ဍုၚ်နာနာတံဂှ် နွံပၟိက်ဒၟံၚ်ရောၚ် ညးအုပ်ကာ ဂအုပ်ဂကောံညးဗြဴဂမၠိုၚ် (ဍုၚ်ဗၟာ) နာန်မိုအ်အ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဒပ်ပၞာန်ပကီုပရာပ် မကလိလောန်ဒၟံၚ်ဂှ် သွက်ဂွံပလံၚ်ဗစိုပ် ဒၞါဲသၟဟ်ကဵု ICC တံမာန်ဂှ် နွံပၟိက် ဒးပ္တိတ်ဇြဟတ် သွက်ဂွံကၠောန်အာဂှ် ညာတ်ရ။ တုဲပၠန် လၟုဟ်ဂှ် ဟိုတ်နူအခိၚ်ပၠန်ဂတးတုဲ ပ္ဍဲအခိၚ်မဒက်ပ္တန် ကၟိန်ဍုၚ်ပံၚ်ကောံဖေဝ်ဒရာ အခိၚ်ကာလအပြံၚ်အလှာဲတံဂှ် သၞောဝ်အပ္ဍဲဍုၚ်ဂှ်လေဝ် ညံၚ်သၞောဝ်ဂွံကဵုဒုဟ် ကုညးမကလိလောန်ဒၟံၚ် သာ်ဏံတံမာန် ဂွံမိက်တိတ်ကၠုၚ်ဂှ် ဒးကၠောန်ၜိုတ်လဝ် နူကဵုလၟုဟ်ရောၚ် ညာတ်ရ” သာ်ဝွံ ညးသ္ဂးရ။
သ္အာၚ်နူဂှ်ပၠန် စပ်ကဵုပရေၚ်ဗဗွဲဓဝ် အခိၚ်ကာလအပြံၚ်အလှာဲဏံဂှ်တုဲ နကဵုသၞောဝ်အပ္ဍဲဍုၚ်ဂှ် သွက်ဂွံကဵုဒုဟ် ကုညးမကလိလောန်ဒၟံၚ်တံ ဗိုန်န်ဗတ်တ်မာန်ဂှ်ကီု၊ သွက်ဂွံထ္မံက်ကဵုပရေၚ်ဗဗွဲဓဝ် ညးမဒးဒုၚ်ကလိလောန်လဝ်တံဂှ် သၞောဝ်ဥပဒေသာ်လဵု၊ မူဝါဒသာ်လဵု စၞောန်ပျးရောၚ်ဟီုဂှ် နူအခိၚ်ဏံ သွက်ဂွံပလေဝ်လဝ်ဂှ် နွံပၟိက်တၟာဂလိုၚ်ဏောၚ် နာန်မိုအ်အ် ဆက်ဟီုလဝ်ရ။
ထပိုတ်ရိုဟ်ကၞက် ဗ္တိုက်ပလီုအာ ဇၟာပ်တၠအဝဵု သီုကဵုမပါလုပ် သၞောတ်တၠအဝဵုပၞာန်တံဂှ်တုဲ ချူခၞံစၞောန်ပျး သၞောဝ်သ္ဇိုၚ်ဒက်ပ္တန်ကၟိန်ဍုၚ် မကဵုတၚ်ဒုၚ်လျိုၚ် ဍိုက်က်ပေၚ်ၚ် ကုအခေါၚ်စၞောန်ပျးအပိုၚ်၊ ပရေၚ်ကဆံၚ်တုပ်သၟဟ် ကေုာံ ပရေၚ်ဒဳမဝ်ကရေဇြဳတံမာန်ဟေၚ် ဒက်ပ္တန်ကၟိန်ဍုၚ်ပံၚ်ကောံ ဖေတ်ဒရာဒဳမဝ်ကရေဇြဳ မခိုၚ်ကၠိုက်မွဲမာန်ရောၚ် ဂအုပ်ဂကောံညးဗြဴဂမၠိုၚ် ပတှ်ေစှ်ေစိုတ်ရ။
မွဲလ္ပာ်ပၠန်ဂှ် ၜိုန်ရပွမကော်ဆော ကေုာံ ပွမပ္ဍဵုပ္ဍိုက်တံ နွံဒၟံၚ်ဗွဲမဂၠိုၚ်ကီုလေဝ် ညးဗြဴဂမၠိုၚ်ဝွံ ပ္ဍဲကဵုပရေၚ်ဒစဵုဒစး တၠအဝဵုပၞာန် သဗ္ဗအိုဿီုဂှ် ဆက်ပၠန်ဂတးလုပ်ဒၟံၚ်ပေါဲဗ္တိုက်ဖိုဟ် ပ္ဍဲကဵုကဏ္ဍ မပ္တံကဵု ဂကောံဇြဟတ်ဗကပ်ဗဗေၚ် ညးဗြဴဂမၠိုၚ်၊ ဂကောံဒပ်ဒမၠုက်ညးဗြဴဂမၠိုၚ်၊ ကောန်သ္ဂံၚ်ညးဗြဴဂမၠိုၚ် ကေုာံ နဒဒှ်ညးမထံက်ပၚ်ပလံၚ်ဗစိုပ် ဇွောံမတံ မဒှ်ရ။
ပရိုၚ်−သြၚ်လောန်တိုၚ်(မ်)