မတ်မလီု၊ ဒဳဇြေမ်ဗာ (၁၄)
ကြဴနူပၞာန်သီအဝဵုတုဲဂှ် ဟိုတ်နူခရိတ်အိုတ်နာနာက္ဍၚ်ဒၟံၚ် ဂၠိုၚ်ကဵုဆ သီုကဵုမပါလုပ် ကပေါတ်ဗၞိက်တမ်တံဂှ်ရ သၟဂူာယာအပ္ဍဲတွဵုရးဍုၚ်မန်တံဝွံ သွက်ဂွံတဵုလွဳ သၞေဝ်ကေဝ်၊ သတ်ဒကောၚ် ပ္ဍဲရာသဳမုဟ်ကျာသၞာံဏံဂှ် ဒးဂဗဒၟံၚ် အခက်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်ဝါဲဓာတ် ကပေါတ်တမ် သုၚ်စောဲပရေၚ်တဵုလွဳတံဂှ်ဝွံ ကြဴနူဒပ်ပၞာန်သီအဝဵုတုဲဂှ် မွဲရိုက် နူကဵုၚုဟ်မၞုံ (၃၀၀၀၀) ဒ္ကေဝ်ဂှ် ၚုဟ်တိုန်ကၠုၚ် စဵုကဵု (၁၅၀,၀၀၀) ဒ္ကေဝ် ဗ္ဒါဲ (၅) ဆတုဲ ၚုဟ်ဂဥုဲဂစိုတ်စၟ မပါလုပ် သီုကဵုဂဥုဲကဵုဇြဟတ်သတ်တိတ်ဂၠိုၚ်တံဂှ်လေဝ် သၠုၚ်တိုန်ကၠုၚ် စဵုကဵု (၃) ဆပြၚ်ရ။
သ္အာၚ်နူဂှ်ပၠန် သၞေဝ်ကေဝ်၊ သတ်ဒကောၚ်မုဟ်ကျာ မဒးပၠောပ်ဍာ်တုဲ တဵုလွဳတံဂှ်လေဝ် ကြဴနူဒပ်ပၞာန်သီအဝဵုတုဲဂှ် ဒးဒုၚ်စသိုၚ်ဒၟံၚ် ဘဲဒဏ်ၚုဟ်ကၠေၚ်စက် သၠုၚ်တိုန်ဒၟံၚ်တံ ဇၞော်ကဵုဇြဟတ်ကီုရ။
ဟိုတ်နူအကာဲအရာ ဗီုလၟုဟ်တံတုဲ သၟာဂူယာလ္ၚဵုတံဝွံ သၞာံဏံဂှ် ဟွံတဵုလွဳသၞေဝ်ကေဝ်၊ သတ်ဒကောၚ်မုဟ်ကျာတံရတုဲ ဒေါအ်ဇူကၠုၚ် ကမၠောန်တံနွံဂှ် သၟာဂူယာမွဲတၠ ဟီုရ။
“ၚုဟ်ဝါဲဓာတ်တံဂှ်တှ်ေ တိုန်တုဲတှ်ေ ဟွံကလေၚ်စှ်ေဟဂှ်၊ ၚုဟ်ကၠေၚ်စက်က္ဍၚ် ၊ ၚုဟ်ကပေါတ်တမ်တံ က္ဍၚ်ဂှ်ရ သၟာဗ္ၚတံဂှ်လေဝ် ကလောန်ဗ္ၚတံဏံ ရနွံတုဲ ကၠောန်ဂှ် ဒးကၠောန်ဒၟံၚ် ဖေက်က်ဂံၚ်ၚ်ရ၊ မွဲဨကတှ်ေ အောန်အိုတ် (၁၀၀) နဂှ် ခရိတ်အိုတ် ၜိုတ် (၇) ကိုဋ် (၈) ကိုဋ်နွံရ၊ ဒမြိပ်တိတ် မချိၚ်လဝ်ဂှ် မွဲဨက တိတ် (၁၀) နမှ ပရဲဏောၚ်၊ ယဝ်ခါရ ဒမြိပ်တိတ်ဂှ် ယအ်စှ်ေအာ သၟဝ် (၁၀၀) မ္ဂး သၟာဂူယာတံဂှ် ပရဲဟွံမွဲရပုဟ်၊ သၞာံဏံဂှ် တော်ကဵုကပေါတ်တမ်တံဏံတုဲ သၟာဂူယာလ္ၚဵုတံ ဂွိၚ်တုဲ ဟွံကၠောန်တံလေဝ် နွံ” သာ်ဝွံ သ္ဂးရ။
သ္အာၚ်နူဂှ်ပၠန် သၟာဂူယာတံဝွံ သွက်ဂွံတဵုလွဳ သၞေဝ်ကေဝ်၊ သတ်ဒကောၚ် ပ္ဍဲမုဟ်ကျာဂှ် ပ္ဍဲဒၞါဲဒးကေတ်သြန်ဓလေံတံဂှ်လေဝ် သၞာံတုဲတေံ ဟိုတ်နူကျဗြံလဝ်ဂှ်ရ ကလေၚ်လေဲသြန်ဓလေံတံ ဟွံမာန်တုဲ တိုက်သြန်ပရေၚ်ဖောအ်ဗြေဝ်ဝါဗ္ၚ ဍုၚ်ဗမာ သၟဝ်တဲကံၚ်ဇြဳပၞာန်ဂှ် ဟွံပ္တိတ်ကဵု သြန်ဓလေံတံရတုဲ ဒးဒေါအ်ဇူလဝ် ပရေၚ်တဵုလွဳတံ နွံဂှ် ဂွံတီကေတ်ရ။
အခိၚ်လၟုဟ်ဂှ်လေဝ် သၟာဗ္ၚဂူယာတံဝွံ တဵုလွဳသၞေဝ်ကေဝ်၊ သတ်ဒကောၚ်မုဟ်ကျာတံ ဟွံမာန်တုဲ ပ္ဍဲကဵုဒၞါဲတဵုသြောံ ကသီုတံဂှ်လေဝ် ၚုဟ်ကပေါတ်တမ်တံ အိုတ်ဂၠိုၚ်သၟးဟွံက ဟိုတ်နူကဵုရာသဳဥတုတုဲ (၃) သၞာံအဆက်က် ဒးကျဗြံလဝ်ဂှ်ရ သွက်ဂွံကလေၚ်လေဲသြန်ဓလေံတံရဂှ် ဒးဒှ်ဒၟံၚ် အခက်အခုဲရောၚ် သၟာဗ္ၚမွဲတၠ ဟီုရ။
“သြောံသၞာံဏံဂှ် ပရေံအာ နူသၞာံတုဲတေံဏီ၊ သၞာံဏံ မွဲဨကဂှ် ၜိုတ် (၁၀) နဓဝ်ဂှ် ဟွံပေၚ်ပုဟ်၊ သၞာံဏံဂှ် ဒှ်စၟ၊ သၞာံတုဲတေံဂှ် ဍာ်ဇၞော်၊ သၞာံမွဲတေံဂှ် ကျာပိုက်တုဲတှ်ေ သြောံတံဂှ် ဒှ်အာစၟ၊ ဟွံပြေပြံၚ်ဒၟံၚ်ဂှ် (၃) သၞာံယျ၊ ဝါဲဂှ် တိုန်အာ ၜါဆပိဆ၊ တုဲတှ်ေ ကၠေၚ်ဂွံဗ္ၚုဟ်စက်ဂှ်လေဝ် တိုန်အာတၟာဂလိုၚ်၊ ကျဗြံအာတၟာဂလိုၚ်ရ၊ လၟုဟ် ဒးပၠောပ်လှုဲဟီုတှ်ေ ကေတ်လဝ် သၠုဲကၟိန်ဍုၚ် ဟွံသေၚ်ဟာ၊ သၞာံကၠာဂှ်တှ်ေ သွံဂၠဴ၊ သၞာံတုဲဂှ်တှ်ေ ထဝ်တံမုတံ နွံညိညတုဲ သွံထဝ်၊ သၞာံဏံဂှ် မုဟွံမွဲရပုဟ်၊ ဗီုလဵုဂွံပဂှ် ဟွံတီရပုဟ်” သာ်ဝွံ သ္ဂးရ။
သၟာဗ္ၚဂူယာတံဝွံ ပ္ဍဲအခိၚ်ကာလ တဵုသြောံကသီုတံဂှ်လေဝ် ဟိုတ်နူၚုဟ်ကပေါတ်တမ်တံ က္ဍၚ်တုဲ စုတ်ဝါဲတံ ဟွံမာန်ဂှ်ရ ဒမြိပ်သြောံတိတ်အောန်အာတုဲ အခိၚ်သြောံတိတ်ဂှ်လေဝ် ၜိုတ်ချိၚ်လဝ် ဟွံဂွံၚုဟ်ဂှ်ရ ပရဲပရာအောန်ကၠုၚ်လဝ်ရ။
အခိၚ်လၟုဟ်ဂှ် သၟာဗ္ၚဂူယာတံဝွံ တဵုလွဳသၞေဝ်ကေဝ်၊ သတ်ဒကောၚ် မုဟ်ကျာတံ ဗီုကၠာတေံ ဟွံမာန်ဂှ်ရ သၞာံဏံ ဒမြိပ်သတ်ဒကောၚ်မုဟ်ကျာတိတ် စှ်ေကၠုၚ်တီတီဒှ်ဒှ်မာန်ဂှ် သၟာဗ္ၚတံ သ္ဂးအိုတ်ရ။
ပ္ဍဲတွဵုရးဍုၚ်မန်ဂှ် နဒဒှ်ပရေၚ်တဵုလွဳ သၞေဝ်ကေဝ်၊ သတ်ဒကောၚ်မုဟ်ကျာတံဂှ် ၜဲနာနာ သီုကဵုမပါလုပ် ၜဲသ္ၚေက်၊ ၜဲဗ္စံက်တံ၊ တၞံသၟိၚ်တ္ၚဲ၊ လ္ၚဴ၊ သၞေဝ်ကေဝ်တံသၟးဟွံက ပ္ဍဲပရေၚ်တဵုလွဳ သြောံက္ညၚ်တံဂှ်လေဝ် ဗက်ကဵုဒေသတံတုဲ တဵုလွဳဒၟံၚ်တံ နွံရ။
ပရိုၚ်−သြၚ်လောန်တိုၚ်(မ်)