ကွာလာလာမ်ပူ၊ ဒဳဇြေမ်ဗာ (၁၅)
ကြဴနူဂကောံအခေါၚ်အရာမၞိဟ် ထ္မံက်ပ္တိတ်ဟီုဂးကၠုၚ် ဒဒှ်ရစဳဇန်ဒၟံၚ် သွက်ဂွံကလေၚ်ပလံၚ်ဖျဴ အနိၚ်အထက် ကုကောန်ဍုၚ်ဗၟာ (၁၁၄) တၠ မဒးဒုၚ်ရပ်လဝ် ပ္ဍဲမလေဝ်ယှာတံတုဲဂှ် လ္ပာ်ရုၚ်သၞောဝ်ဓဝ် ဍုၚ်မလေဝ်ယှာတံ ကလေၚ်ရုပ်သီထောံ တၚ်ရေၚ်တၠုၚ်ဏံယျဂှ် ညးရေၚ်တၠုၚ်ဂဗုတ်တံ ဟီုရ။
ဂကောံအခေါၚ်ဗၠးနူဒုဟ်ဒဏ် ကၟိန်ဍုၚ်နာနာ ကေုာံ Acess Asylum Malaysia တံဝွံ ဖ္တိုက်ဖ္အောဝ်လဝ် အလဵုအသဳမလေဝ်ယှာ သွက်ဂွံကလေၚ်ဗ္စာကဵု အစဳဇန်မကလေၚ်ပလံၚ်ဖျဴ ကဵုဂအုံဗွဝ် သာ်ဏံဂှ်ရ။
ညးရေၚ်တၠုၚ်ဂဗုတ် Lim Wei Jet မကေတ်လဝ်တာလျိုၚ် ပရေၚ်ဍုၚ်ဗၟာ နူကဵုဂကောံအခေါၚ်ဗၠးနူဒုဟ်ဒဏ် ကၟိန်ဍုၚ်နာနာဂှ် လုပ်ဂရၚ်ပ္တီ ကုတၚ်စဳရေၚ် ရုၚ်သၞောဝ်ဓဝ်လ္တူ ကွာလာလာမ်ပူရောၚ် ဟီုဂးလဝ်ရ။
“ဂ္စါန်ဒၟံၚ် ညံၚ်ဂွံဆဵု ပ္ဍဲရုၚ်သၞောဝ်ဓဝ်ဂရၚ်ပ္တီတံ ဗွဲမပြဟ်ရ၊ ခြာဟွံလအ် ကဵုဒဏ်ဗက်ဗဒဴပ္တိတ် နူကဵုဍုၚ်ဟာ ဟွံကဵုပုဟ်ဟာဟီုဂှ် ဟွံဂွံတီကေတ် ဗွဲလစှ်ေဏီရ၊ တုဲတှ်ေ လုပ်ဂရၚ်ပ္တီလဝ် ဝန်ဇၞော်အပ္ဍဲဍုၚ်ကဵု ရုၚ်သၞောဝ်ဓဝ် ဂရၚ်ပ္တီတံရ” သာ်ဝွံ ညးသ္ဂးရ။
ပ္ဍဲကဵုကောန်ဍုၚ်ဗၟာ (၁၁၄) တၠ မဒးဒုၚ်ရပ်ထိၚ်လဝ် နူကဵုဌာနကောပ်ကာဲပရေၚ်မၞိဟ်လုပ်တိတ်တံဂှ် ကောန်ၚာ်သၟတ်တံလေဝ် ပါလုပ်တုဲ ဒှ်ညးမဂၠါဲအခေါၚ်ဂွံစ္ၜုဲစ္ၜော်တံရောၚ်ဂှ် ဒါရိုက်တာစပ်ကဵုဍုၚ်မလေဝ်ယှာ ဂကောံအခေါၚ်ဗၠးနူဒုဟ်ဒဏ် ကၟိန်ဍုၚ်နာနာတံ ဟီုဂးလဝ်ရ။
ညးရေၚ်တၠုၚ်ဂဗုတ် ဂကောံတံဏံဝွံ နကဵုတၚ်ထ္ၜးဟိုတ် စပ်ကဵုပရေၚ်ဗ္စာရဏာမၞိဟ်ဂှ် သွက်ဂွံဖ္တိုက်ဖ္အောဝ် ညံၚ်ဂွံဒေါအ်ဒေၚ်ကဵု ဒဒှ်မကလေၚ်ပလံၚ်ဖျဴ ဌာန်ဒၟံၚ်တံမာန်ဂှ် ဂ္စါန်ဒၟံၚ် သွက်ဂွံဆဵုဂဗကဵု ဝန်ဇၞော်အပ္ဍဲဍုၚ် မလေဝ်ယှာရ။
ဍုၚ်မလေဝ်ယှာဝွံ ဒှ်ဍုၚ်ထ္ပက်လဝ်စၟတ်တဲ ပ္ဍဲကောန်ဝေန်ယှေန်ညးဒဒိုက် သၞာံ ၁၉၅၁ တေံ ဟွံသေၚ်ပုဟ်၊ ဂကောံအခေါၚ်ဗၠးနူဒုဟ်ဒဏ် ကၟိန်ဍုၚ်နာနာကဵု Access Asylum Malaysia ဂှ် “အလဵုအသဳမလေဝ်ယှာဝွံ ဒးရှ်ေသှ်ေဒ္ဂေတ်ဗက် သၞောဝ်ဍုၚ်သ္အာၚ်တံကဵု အခေါၚ်အရာမၞိဟ်တုဲ တၚ်သ္ဂုတ်သွာတ် မဖ္အောဝ်ကလေၚ်ပလံၚ်ဖျဴ မၞိဟ်ဂမၠိုၚ် ပ္ဍဲဒၞါဲအကာဲအရာ ဒှ်အန္တရာယ်တံကဵု မသ္ကာတ်မြဟ်တံ သာ်လဵုဟွံဟီု ဒးဒေါအ်ဒေၚ်ဏောၚ်” သာ်ဝွံ ဟီုဂးလဝ်ရ။
“အကြာဍုၚ်သ္အာၚ်ဂမၠိုၚ် ပ္တိုန်ဒုဟ်ဖျေံကဝုဂှ် ထ္ၜးဒၟံၚ်သက်သဳ ဒဒှ်ရသ္ပလဝ်မၛ္ဇဟ်ဖိုဟ် ကုတၚ်အာတ်မိက် သ္ဂောံဒေါအ်ဒေၚ်ကဵု တၚ်သ္ဂုတ်သွာတ် မကလေၚ်ပလံၚ်ဖျဴ ကၟိန်ဍုၚ်ဗၟာ အနိၚ်အထက်တံဂှ်ရ“သာ်ဝွံ ဂကောံအခေါၚ်အရာမၞိဟ်တံ ထ္မံက်ထ္ၜးလဝ် ပ္ဍဲတၚ်လလောၚ်တြးပံၚ်တောဲဂှ်ရ။
ပ္ဍဲကဵုကောန်ဍုၚ်ဗၟာ (၁၅၀) ဒးဒုၚ်ပလံၚ်ဖျဴလဝ် နူမလေဝ်ယှာ အပ္ဍဲဂိတုအံက်တဝ်ဗာဂှ် ရဲဂြိပ်နူဒပ်ပၞာန်တံလေဝ် ပါလုပ်ဂှ် အလဵုအသဳညဳသၟဟ်ဂကူ NUG လလောၚ်ပ္တိတ်လဝ် တၚ်ကဵုသတိရ။
ပ္ဍဲကဵုကောန်ဍုၚ်ဗမာ (၂၀၀၀) ပြၚ် မဒးဒုၚ်ကဵုဒဏ် ဗက်ဗဒဴပတိတ် နူဍုၚ် စနူဂိတုဨပရဴဂှ် ညးတံလေဝ် ပါလုပ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး ဂကောံမၚ်ရံၚ်အခေါၚ်အရာမၞိဟ်တံရ။
သၟိၚ်တၠမလေဝ်ယှာတံဝွံ ပ္ဍဲဂိတုသေပ်တေမ်ဗာဂှ် ရပ်ဂွံလဝ် သၞာဲဒဴဒပ်ပၞာန်ဗၟာ (၆) တၠတုဲ ပ္ဍဲဂိတုအံက်တဝ်ဗာ (၆) ဂှ် ကဵုလဝ်ဒဏ်ဗက်ဗဒဴပ္တိတ် နူဍုၚ်ရောၚ် ဌာန်ပရိုၚ်ရိုက်တာ ထ္မံက်ထ္ၜးလဝ်ရ။
အာတ်လဝ်စရၚ် ညးဒဒိုက်ကုလသမဂ္ဂ မၞုံဍုၚ်မလေဝ်ယှာတံတုဲ မၞိဟ်ဒးဒုၚ်ကဵုဒဏ် ဗက်ဗဒဴကၠေံနူဍုၚ်ဂှ် စဵုကဵု (၄) တၠနွံတုဲ သၞာဲဒဴပၞာန်မွဲတၠ ကေုာံ သမ္ဘာညး ၜါတၠတံ အခိၚ်စိုပ်လ္ဂုၚ်ဂှ် ဒးဒုၚ်ရပ်ထိၚ်လဝ်ရောၚ် သ္ဂးရ။
အခိၚ်ဝန်ဇၞော်ကာအပ္ဍဲဍုၚ်မလေဝ်ယှာ ဆဵုဂဗကဵု ကုလသမဂ္ဂ ကေုာံ ဂကောံတၞဟ်သ္အာၚ်တံ ပ္ဍဲကၞောတ်ဂိတုအံက်တဝ်ဗာဂှ် ဒဒှ်မပါလုပ်ပထုဲပလာပ် ပ္ဍဲပရေၚ်အပ္ဍဲဍုၚ်မလေဝ်ယှာဂှ် ဒေါအ်ဒေၚ်ထေက်ဂှ် နူကဵုဌာနဝန်ဇၞော်ကာအပ္ဍဲဍုၚ် မလေဝ်ယှာ ကေၚ်ဟီုဂးလဝ်ရ။
Ref: RFA