မျေတ်ဂျဳနာ – ဒဳဇြေန်ဗာ(၁၅)
က္ဍိုပ်သ္ကိုပ်ပၞာန်သီအဝဵု သ္ကိုပ်ဗိုလ်ဇၞော်မေန်အံၚ်လှာၚ်ဂှ် သွက်ဂွံယှအ်သုၚ်စောဲ ကၠေၚ်ဍေန်တုဲ ဍိုက်အာကွဳလိုန် နကဵုစိုတ်ဓာတ် ဆာန်ဍုၚ်ကွာန်ညိဂှ် ဟီုသ္ဂးကၠုၚ်ရ။
တုဲကၠုၚ်ဂိတုဒဳဇြေန်ဗာ ပ္ဍဲစၟတ်တ္ၚဲ (၁၃) အခိၚ်ဆဵုဂဗလဝ်ကဵု ညးတၠကမၠောန် အဇာဍောတ် အဇာလဒေါဝ်ဂမၠိုၚ် ပ္ဍဲတွဵုရးဍုၚ်ကချေၚ် ပွိုၚ်ဍုၚ်မျေတ်ဂဳနာဂှ် ဟီုသ္ဂးကၠုၚ်လဝ်သာ်ဏံရ။
“ဟိုတ်နူ ဒးပၠုပ်နၚ်ဒၟံၚ်ကၠေၚ်ဍေန် နူကဵုဍုၚ်မ္ၚးတုဲ ပရေၚ်ဒးသုၚ်စောဲသြန်ဍုၚ်သ္အာၚ် ဒးအိုတ်ဒၟံၚ်ဂၠိုၚ်ဂၠေၚ်ကီု၊ ဟိုတ်ဂှ်ရ ၜိုတ်သ္ပမာန် ယှအ်ဖအောန်သုၚ်စောဲဖျေံအာ ကၠေၚ်ဍေန်ကီု၊ နကဵုစိုတ်ဓာတ်ဆာန်ဍုၚ်ကွာန် မိက်ဂွံကဵုသုၚ်စောဲအာ ယာဉ်ဟွံဒးစုတ်ကၠေၚ် ဗီုကဵုကွဳလိုန်တအ်ဂှ်ကီု” ဂှ် က္ဍိုပ်သ္ကိုပ်ပၞာန် သ္ကိုပ်ဗိုလ်ဇၞော် မေန်အံၚ်လှာၚ် ဟီုသ္ဂးလဝ်ရ။
သ္အာၚ်နူဂှ်ပၠန် ပ္ဍဲပရေၚ်ပလံၚ်ဗစိုပ် ကပေါတ်ဗၞိက်လေဝ် နကဵုကွဳပၟတ် ဒးသုၚ်စောဲကၠေၚ်ဍေန်အောန်သာတုဲ ပလံၚ်ဗစိုပ်ကပေါတ်ဗၞိက်မာန်ဂှ် ဒးရေၚ်တၠုၚ်ပလံၚ်ဗစိုပ်ကဵုကီု ယဝ်ရယှအ်ဖအောန်ဖျေံ ပရေၚ်သုၚ်စောဲဇၟာပ်ညးအဲမ္ဂး ပရေၚ်သြန်ဍုၚ်မ္ၚးဒးအိုတ်ဂှ် အောန်ယအ်စှ်ေကၠုၚ်မာန်ကီုရဂှ် ညးဟီုလဝ်ဏီရ။
ပ္ဍဲပရေၚ် ရေၚ်တၠုၚ်ပရေၚ်ဖောအ်ဗြေဝ် သွာၚ်ပရေၚ်ပိုန်ဒြပ်ကၟိန်ဍုၚ်ဂှ် ညံၚ်ပရေၚ်ဍုၚ်ကွာန်ဂွံညိၚ်ဝတ်ဂှ် ပၟိက်နွံဒၟံၚ်ကီု တၚ်နွံပၟိက် ပၟတ်ဓာတ်လလဳလေဝ် ပၟိက်ဇၞော်ဒၟံၚ်တုဲ ပ္ဍဲကၟိန်ဍုၚ် ယဝ်ရကၠောန်ပ္တိတ် ပၟတ်ဓာတ်လလဳဍာ်မ္ဂး ကၠောန်ပ္တိတ် မဳဂါဝပ် (၄)လက် မာန်ဒၟံၚ်ရောၚ်ဂှ် ဟီုသ္ဂးလဝ်ရ။
ပ္ဍဲအခိၚ်လၟုဟ်ဏံဂှ် ဟိုတ်နူဟိုတ်နာနာသာ် ကိုန်စဳမာန်ဂမၠိုၚ် ဒးဒေါံဇူလဝ်တုဲ ပ္ဍဲတွဵုရးဍုၚ်ကချေၚ် တမ်ရိုဟ်ကၠောန်ပ္တိတ် ပၟတ်ဓာတ်လလဳ ဇြဟတ်ဍာ် နွံဒၟံၚ်ဗွဲမဂၠိုၚ်ဂှ်ရ မိက်ဂွံကဵုသုၚ်စောဲ ညံၚ်ဂွံဒှ်ဂုဏ်ဖိုလ်ရဂှ် က္ဍိုပ်သ္ကိုပ်ပၞာန်ဂှ် ဟီုသ္ဂးလဝ်ရ။
ကြဴနူဒပ်ပၞာန်သီအဝဵုတုဲဂှ် ပ္ဍဲကၟိန်ဍုၚ်ဗၟာ ဟွံက္လိဂွံ ပၟတ်ဓာတ်လလဳ ပ္ဍဲအခိၚ်ဍာံကီု ကမၠောန်သ္ပပဓာန်ကဵု ပၟတ်ဓာတ်လလဳတုဲ မ္ဒးကၠောန်ဒၟံၚ်ဂမၠိုၚ်တအ်ဂှ်လေဝ် ဒးဒေါံဇူကၠုၚ်အိုတ်ကီုဂှ်ရ အကြာညးဍုၚ်ကွာန်ဂမၠိုၚ် ပရေၚ်ဟီုဂးပါ်ပါဲ နွံကၠုၚ်ဒၟံၚ်ရ။
ပရိုၚ် – သြၚ်လောန်တိုၚ်(မ်)
ဗီုဓာတ်-ရုၚ်ဂအုပ်ပၞာန်